حابه نشكركم ع تعليقاتكم يلي تهبل وتشجيعكم المستمر رغم تأخري 💗
هي نبدو
في الصبح
ناض أنور شاف لفاطمه يلي كانت مزال غارقه فـ النوم حط ايده ع راسها يشوف ف حرارتها
أنور: الحمدلله نزلت
ومشي للمطبخ دار فطور خفيف فطر هوا وخلى لفاطمه فطور وخدي طاست القهوه يلي مايكمل صباحه من دونها وطلع للجنينه
ناضت فاطمه بكسل
فاطمه: مغباني دروحني مابنرقد لكن التعب غلبني غلبني ...زعما هداك وين ؟...خ نمشي ندوش وناضت
دوشت وصلت الصبح
فاطمه :جيعانهه خ نوض ناكل
ومشت للمطبخ لقت صفرة فطور واتيه
فاطمه: شكلا هداك موتيها لروحه ههه خ ناكل ماقاله حد يخليها ويمشي
وفطرت خدت طاسة حليب وكاكاو ومشت للبيت من الخلف ع المسبح
غطست رجليها في امية المسبح البارده وتشرب في الكاكاو لين حست بحد خلفها وتلفتت
فاطمه:ك.ك..ككلب
ونطت في المسبح
أنور يجري ويكلم في الكلب: وين مشيت تعالا
شاف للمسبح لقى فاطمه غارفه فيه قعد يضحك ع تصرفاتها ونسى ان واضح انها ماتعرف تعوم والمسبح غريق.. بعدها بثواني فاطمه غرقت وجسمها خف حركه انور انفجع ونط وراها وطلعها
فاطمه تكح: تضحك ..وانا ...غارقههه
أنور برفعت حاجب: بالك مش عاجبك
ناضت فاطمه وهيا تتكلم: كنت بنموت..وانت تضحكك
وخشت لداخل دوشت وغيرت حوايجها وخشت لسريرها وهي تبكي
أنور وفي أيده مفتاح السياره: نوضي
فاطمه: لوين
انور:, نوضي كلمه هي ومشي
فاطمه مشت لبست عبايتها ولحقاته
مشو بالسياره للملاهي قعمزو ف الحديقه وتلفون أنور ماوقف اتصالات من المقر لعند المغرب ولعو ضي الملاهي لملون وكان المنضر جميل
بعد ماكمل انور مكالماته تلفت ع فاطمه لقاها عيونها فـ الملاهي وكيف يلعبو كأنها بيبي
أنور: نوضي هي
فاطمه بعد فاقت من سرحانها: لوين
أنور شافلها برفعت حاجب ومشي
لحقاته فاطمه
وصل للعبت الكرسي الدوار🎡 وخلص الراجل ومسكها ورفعها بين يديه وركب بيها الكرسي والناس تشوفلهم وفاطمه تحشمت من الموقف وبدت اللعبه ومن لعبه للعبه لين تعبت فاطمه
فاطمه: ياأنت هيا نروحو
أنور بعصبيه: عندي أسم نضن
فاطمه بخوف: نن..نسيته
أنور بهدوء: أنور
فاطمه: تمام أنور ممكن نروحو
أنور: تمام هي
ورجعو للبيت
مشت فاطمه طوول للثلاجه خدت شكلاطه ومشت للدار
أما أنور خش لداره الخاصه
فاطمه كانت تاكل فـ الشكلاطه وتتفرج ع مسلسل تركي خش عليها أنور
أنور قربلها وحط ايده ع راسها :شن تتفرجي؟
لقى حراراها مرتفعه شوي سكت وقمز جنبها
فاطمه: مسلسل تركي زي ماتشوف
أنور: به وتمدد ع طرف السرير
وفاطمه تراقب ومش عاجبها
تفرجو الزوز لين فاطمه حست روحها بتنعس مشت للدولاب طلعت وسايد وقعدت أدير فيهم بينها وبينه ع السرير
أنور: خيير
فاطمه تكذب: بيش ماأنوشك انا نتقلب واجد
أنور عزق الوسايد بعصبيه: به كويس أرقدي ترا
فاطمه بخوف: ححاضر
بعد شوي حط انور ايده ع جبهت فاطمه لقاها سخون ناض بيش يجيب الخافض بس وقفاته هلوست فاطمه
فاطمه: ماتضربنيش مادرت شي ني ...مانبي نجوز مانبيي...وقف ضرب بنموت
أبتسم أنور ع الجنب وناض جاب الخافض حطه ع جبهتها ورجع تمدد وستند ع أيده يشوفلها
بعد شوي قربت منه فاطمه وقعدت ف حضنه وترعش من الحمه حضنها وقعد يلعب بشعرها ويشوفلها
بعد فتره من العناء نزلت الحراره بس فاطمه ماتبي تسيب حضن أنور ....قرب عليها أنور وباسها وقعد يشوفلها وبعدها صار يلي صار عيب عرسان 😌
في مكان ثاني
منى: الله ستاحشت فاطمه زعما شن حالها
نهال: اكيد متهنيه العقيالناا
فرح: مالا كل من تزوج تهنى شوفي حالنا
منى: صح بس ان شاء الله ربي يكتب الخير انا بنوض لعملي
فرح: انتبهي ع روحك
نهال: بالتوفيق
منى: حاضرر ومشت
أحمد: يابوي غير اسمع انت اخدم هنا مع بنتك وانا خليني نرجع للجنوب البيت غادي فاضي
عماد: لالا خليكك ياوليدي متونسين اهو
أحمد بغل داخله: حاضر به
احمد: ماباش يقتنع
مراته: توا يقتنع شوي شوي وناخدو البيت قصدي نسكنو فيه
احمد: مشعارف
في مكان ثاني
محمد: وينك ياأنور ردد
الجندي: عريس كيف بيرد🤣
محمد: باهي به😒
محمد: لازم نشدها وراه لين يرد الموضوع ضروري
عند أنور
فاطمه ناضت بكسل تمسح ف عيونها
أنور طالع من الدوش: صبح الخير
فاطمه شافتله واذكرت : صصبحنور
ومشت تجري للحمام"حشاكم"
فاطمه تحت الدوش تحكي مع روحها: لالالا كنت نحلم أكيد مستحيل يلي صار انا نكرهااا....توا شن بيفكر فيا ...هففف غبيهه
أنور قعمز ع الصالون يلي كان موجود فـ الغرفه وفتح تلفونه ولقى مكالمات محمد استغرب وعاودله
انور: ايواا
محمد: وأخييراا باهي يلي عبرتنا
أنور: اختصر
محمد : صاير موضوع ضروري تجي للمقر
انور: تم
وسكر
رفع مفتاح السياره والبيت وقفل الباب الخارجي ع فاطمه وطلع
طلعت فاطمه من الدش صلت الصبح ومشت للمطبخ خدت شكلاطه واستغربت من الهدوء
فاطمه تنادي: ياأنتت ...الووو ...شكلا طلع
فاطمه: اللههه بنطلع للجنان نغير جو من غيره واخيرااا بنتنفس وندير يلي نبييه
خدت كتاب كاينه جايبته معاها من بيت هلها ودارت نسكفي وماشيه تجري للباب من الفرحه
حاولت تفتحه بلا فايده اكثر من مره وتجمعو الدموع ف عيونها
فاطمه: ممقفوولل ...ليش هكي ياربي لييش
ومشت للمطبخ كسرت الطاسه متاع النسكفي وعزقت الكتاب ومشت تجري لدارها تبكي
عند أنور
وصل انور للمقر جاه محمد يجري
محمد: تي ويين ياراجل
انور: قاعد اهو
نزل من السياره وقعد ماشي لمكتبه في المقر ويهدرزو
محمد: والله الا عاش من شافك هيي
أنور: مغلا عليك القطاف شن صاير ف غيابي
محمد: صارو اشتباكات فـ منطقه
انور: فيه ضحايا؟
محمد: العدو فيه جثث بس والباقين حاصرنلهم وجبناهم
انور: كمل
محمد: فيه مدنين جرحى وتعالجو وطلعو بس فيه بنت اصابتها قويه شوي ويتيمه المشكله ومش عارف شن قصتها كل يوم نزور فيها او نبعث حد من جماعتنا يطمن وخلاص
انور: صاحب اصل ياصاحبي والله
محمد: عارف روحي ...باهيي شن صار معاك انت😉
انور بنضره حاده: في شنو بزبط ؟!!!
محمد بتوتر : ششي شي...باه بتبدا اداوم والا مزال
انور: لا خلاص
محمد: كويس تاخد الحمل مني شوي
انور أبتسم بهزوه 😏
روح انور للبيت وكان هدوووء
خش لدار النوم لقاها راقده ع نفس الوضعيه يلي كانت تبكي بها
طفى الضي ومشي للمطبخ خدي Red Bull فـ ايه ومشي رجعلها حط ع فلم و تمدد جنبها ويلعب بشعرها ويشرب فـ العصير
شوي وحست عليه فاطمه
ناضت مفجوعه(مخلوعه)
فاطمه: نحي ايدك عني معاش تلمسني
أنور : بعد ايده وهو بااارد ومستمر يتفرج
فاطمه: انا مانقعدش معاك ف مكان واحد ياحقير وناضت من السرير فتحت الخزانه بتاخد وساده وغطاء
في نفس الوقت ناض انور بكل هدوء وبرود قفل الدار وخلا المفتاح عنده ورجع يتفرج
فاطمه: افتحلي مابنقعدش معاك
انور: ماأتعبيني ولا توجعي راسي ارجعي لمكانك خيرلك
فاطمه: لاااا طلعني
انور بعصبيه: كلمه هياا
عزقت يلي في ايدها فاطمه ومشت تجري لمكانها وهي خايفه
يتبع.....
أنت تقرأ
في قلبي عسگري ✨🥀
Romantizmالقصة عن بنت بعقليه طفوليه وشاب كاره حياته الزوز عندهم أسرار لكن كيف بيجتمعو وبيصلح كل هالخراب فـ حياتهم ؟✨🥀 قصة من داخل المجتمع الليبي🇱🇾
