ناضت صباح دارت رتينها راحت للمدرسة قرات حصصها تلقات مع نور و قضات يومها كيما العادة لكن تجنبت تحكي في موضوع احمد لسببين باش نور متاثرش عليها في قرارها والثاني باش تحافظ على صداقتهم
تعدى نهار ككل الايام و ياسمين طلعت عند مرت خوها تحب حتى هي تشاورها بعتبارها وحدة من العائلة
ياسمين : سلام واش راكي ليوم وشراه المينوش
كوثر: لباس الحمد لله وبدلت صوتها لتاع اطفال زعما علي يهدر ماما انا لباس يا عمتو متزيديش تقولي عليا مينوش انا راجل 🤣🤣
ياسمين : سمعتي الجديد واش رايك يا كوثر
كوثر :صراحة خوك خايف عليك من نقطة وحدة وعلبالك بيها اما انا نقلك الحاجة لولة صلي إستخارة وربي أكيد راح يفتحلك الطريق، تشفاي نهار خطبتوني قلتولي ايوب طالب تقعدي في الدار و انا كنت حابة نكمل الماستر و نخدم لو جتي قبل شهر من خطبتي لايوب و قلتيلي راح تتزوجي و متكمليش كنت نضحك عليك اما نهار جاء ايوب لدارنا و درنا رؤية الشرعية و حطلي الشروط و حطيتلو شروط و كيما يقولو حطينا النقاط على الحروف قنعت بيه وبلي نقدر نكمل حياتي مع إنسان كيما هو وسمحت في بعض من أشياء كنت نشوف فيها أساسيات مع انو زواجنا كان تقليدي و كنت قادر نرفض نصارحك بحاجة انا كنت رافضة ايوب بنسبة 85 % حتى لدقيقة الشوفة غيرت رايي
تحوسي على رايي منيش راح نكون حيادية فيه السيد من غير بنتو منيش شايفة فيه حتى ديفو و حتى بنتو مش عيب الطفلة عاقلة و صغيرة محتاجة غير حنانة الام بلعكس ربي عطالك سبب زيادة تدخلي بيه الجنة و عطالك بونيس بنت بلا اي مجهود منك غدوة تعيطلك ماما و تحبك وتحن عليك اعرفي برك قيمتها و متظلميهاش
و ادا عندك تساؤلات صدقيني واحد ميقدر يجاوب عليهم من غير أحمد . لا نور لا يما لا انا لحتى واحد ادا خايفة من حاجة و لا مش مرتاحتلها سقسيه هو من فمو لودنك ترتاحي اكثر بلا تزواق الهدرة بلا والو كيما يقول ناس بكري الهدرة في الوجه دواء
نجيبهالك من الاخير أسناي بابا واش يجاوبك على أخلاقوو و سمعتو و تدين تاعو من بعد أطلبي رؤية شرعية و شوفي روحك تمة وحدك تلقاي الجواب بلا متسقسي حتى واحد
ياسمين : عادي كون ندير الرؤية و من بعد نرفضوو
كوثر : هي علاه دارو رووية شرعية باه تشوفيه و يشوفك تحكي معاه و هو كيفكيف باش تاخدي رايك في الاخير ويكون يا لقبول يا رفض فهمتيني
ياسمين :ايه
شافة في علي لي كان قاعد في حجر يماه و مركز مع عمتو ضحكت معاه وقاتلو ونتا واش رايك يا عمتو نقبل و لا تقعد معاك هنا هيا قول و لا يضحك بالصوت و هيا تلاغي معاه
تعدات سمانة هكاك و ياسمين كل يوم تصلي استخارة وتدعي في ربي ادا كان خير قربو و ادا كان شر بعد وحد نهار جا ايوب و احمد كيفكيف لدار مور العصر كانت كوثر مع ياسمين في البيت يڨصرو حتى عيطتلهم مريم دخلو لصالو كوثر و ياسمين رافدة علي في يدها خزر فيها باباها قالها سقسيت عليه شحال من واحد في الخدمة في الجامع عند الجيران ... وين منروح يشكروه ملقيت منقول دك صح الراي رايك
خزرت في يماها و في خوها وفي مرت خوها كانها تقرا في وجوهم على ردود افعالهم من بعد خزرت في باباها و خرج صوتها مهزوز من الحشمة اما هدرت وقالت حابا نشوفو خزر فيها باباها وكانو مفهمش واش راهي تهدر كوثر هبطت راسها حكمها الضحك نطق ايوب واش قصدك بحابة نشوفو ياسمين : حابة على رؤية شرعية عندي أسئلة حابة يجاوبني هو عليهم منقدرش نمد راي قبل منلقى اجوبة عليهم
نطق سي علي : هدا من حقك كيما من حقو تساعدك الجمعة خزرت في يماها و مرت خوها في زوج شجعوها على هدي الخطوة خزرت في باباها قاتلو ايه تساعدني قلها خلاص وجد روحكم نهار الجمعة. نهدر مع سي محمد و نخبرو
في جهة وحدخرة بتحديد في دار نور
كوبا سي محمد على سي علي و خزر في مرتو قالها الطفلة حابة روية شرعية وجدي روحك لنهار الجمعة مور الصلاة نروحو نشوفوها عائشة فرحة و حست بلي كاين امل في هدي الاثناء دخلو أحمد و إسراء و نور لي كانو برا يشرو فحوايج لاسراء لانو حويجها كبرة عليهم لقاو يماهم فرحانة كي سقساوها قتلهم لخبر نور مام هي فرحت اما أحمد محبش يطمع روحو لانو بالنسبة ليه مزال مقالتش ايه اما اسراء لي فرحتها وحدها بعد مقالتلها نور بلي راهم رايحين يشوفو طاطا ياسمين هي غير سمعت اسمها فرحت و قاعدة تقول طاطا ميمين طاطا ميمين هنا نور مقدرتش متصورهاش فيديو و تبعثها لياسمين و كتبتلها مساج اسمحيلي مشي قصدي ناثر على رايك اما اول مرة نشوفها هكا فرحانة
كانت قاعدة مع ماماها وكوثر يخمو واش يوجدو ماكلة وحلوة وضيافة لدار أحمد حتى سمعت ميساج دخلها من عند نور شافت في حجر يماها كان علي راقد ياسمين : خلاص كوثر اطلعي ارقدي ورقدي علي في بلاصتو مام ماما نتي هدا هو وقتك خلي غدوة ونكملو التخطيط
كوثر : مابيك علي ما والو من بكري شكارة رقاد نتي
ياسمين ضحكتها هذيك الضحكة الصفرة وتفرقو كل واحدة راحت لبيتها
قبل مترقد فتحت التلفون قرات المساج من بعد فتحت الفيديو جاها إحساس غريب مخلط بين الخوف والحب والحنان مش اول مرة تشوف إسراء اما اول مرة راهي تتخيل بلي يقدر يجي نهار وتولي إسراء بنتها من مسؤوليتها تغيرت النظرة لي كانت من شفقة ورأفة لمسؤولية و خوف
بعثت لنور قلوبا على الفيديو ورقدت محبتش تبقى تخمم في الموضوع وأجلت التفكير لبعد الرؤية
VOUS LISEZ
إسراء الياسمين
Short Storyقصتنا اليوم هي عبارة عن حكاية من نسج الخيال باللهجة الجزائرية عن رجل فقد زوجته اثناء ولدتها لبنته التي حملت اسم والدتها احداث القصة ستبدا بعد 3 سنوات من الحادثة
