جاء اليوم المنتظر عرس ياسمين و أحمد
كيما كانو مخطين العرس يكون في العطلة تاع الربيع
دارو عرس واحد بين أحمد وياسمين وتفاهمو يكون غير للاشخاص المقربين والعائلة كان عرس جزائري مية بالمية وسط الالبسة التقليدية والحلويات والاطباق الجزائرية كان العرس إسلامي حيث ان ياسمين قررت و متديرش الغناء واستبدلتو بالمدائح
تفاصيل العرس مميزة نبداوها بيومين قبل العرس لي كان نهار الجمعة في هدا النهار صباح راحت ياسمين مع كوثر للحفافة باش دير نطواياج للبشرة تاعها وكل ما يخص الجمال العروسة كي كملو ولاو لدار بعد الفطور كانو متفاهمين يروحو يشورو دار لي راحو في التشوار هما يماها وكوثر وخلتها الكبيرة وعمتها فرحو بيهم عائلة احمد وستقبلوهم بالطبع والشان غدوة منداك كان نهار السبت لي دارت فيه ياسمين حمام العروسة اما في دارها محبتش ديرو في الحمام باعتبار الحمام حرام كملت اخر تجهيزات العرس وفي الليل بداو يجو الوفود 🤣🤣🤣 بأعتبار غدوة العرس دارو سهرة عائلية مع الخلات و بنات الخالات والعمات وبنات العمات ... بالدربوكة واللتاي والڨريوش والسيقار الله الله
يوم العرس ناضو كامل مصروعين اما ناضو بكري ياسمين و كوثر و داو معاهم علي الصغير لي مكاش شكون يشدو راحو صباح مع ايوب للحفافة
اما بقية الجيش لي خلاوه في الدار فجابولو حفافة لدار وكاين لي خدمة وحدها المهم كانو كامل شابين الا العروسة كانت تحفة كي وصلت 12.30 جا ايوب دا ختو و مرتو لدار بعد ماكملو مع الحفافة كي وصلو لدار لقاو نص من اهل ياسمين سبقو راحو لصالة باش يتولاو التحضيرات والنص الثاني بقا في الدار باش يجي في الكورتاج كملو اخر اللمسات وقعدو يسناو في العريس يجي يدي عروستو هنا نحبسو ونروحو نشوفو احمد كيفاش راه يحضر
عند احمد لي كانو كامل تحضيراتو في نهار واحد صباح راح للحفاف نص نهار راح لدوش على 2 ديمار الكورتاج ههههه كون نقلكم بلي اسامة هو لي مخطط لعرس احمد كثر من احمد متامنوش مخلا بوق مخلا فيميجان مخلا العواد مخلا البارود كلش في الكرتاج دارلوو حسابو طبعا مع نسيم ونزيم وكيفكيف نص من عائلة احمد سبقو لصالة باش يوقفو على تحضيرات العرس من بينهم عائشة ام احمد لي كانت مع جدات ياسمين وخالتها الكبيرة يستقبلو في المعازيم بعتبار مريم متقدرش تجي وتخلي بنتها وحدها والعرس مشترك يعني لزم يكون كاين لي يستقبل المعازيم من اهل العروس و من اهل العريس انطلق الكورتاج في اهازيج جزائرية و العواد والبارود والمفرقعات حتى وصلوو لدار ياسمين حبطت نور وسلمى ومعاهم شوية نساء وطلعو لعند ياسمين باش يخرجوها في هذي اللحظة ياسمين تلفتلها و حكما البكا مع الستراس مع الخلعة حكمتها كوثر لبستلها البرنوس فوق الكاراكو باش تسترها اما يمها توصي وتعاود جا باباها ونطق
سي علي : واش واجدين خلاص
مريم : ايه خلاص واجدين
سي علي : اي نتكلو على ربي
وخرجت تحت جناح باباها جا محمد و احمد باش يدو لعروسة نطق سي علي : عطيتهالكم امانة صونوها وجا يكمل حبسو محمد: بلا متكمل الهدرة عندي زوج بنات مديت وحدة وقريب نزيد الدوزيام ودك ربي زاد رزقني بالثالثة راهي بنتي لي منرضهاش على بنتي منرضهاش على بنتك كيما جيناك على سنة الله و رسول نعاملوها بشرع ربي سبحانو
احمد لي قعد ساكت معندو ما يزيد فوق هدرت باباه ركبت ياسمين مع شيخها محمد و لوستها سلمى و يماها
وفي طونوبيلة ايوب ركب ايوب مرتو وليدو و عماتو اما احمد ركبت معاه نور و إسراء برك طبعا اسامة مع نسيم ونزيم وزاد جاب صحابو يزهو معاه الحالة وديمارو كامل في الكورتاج لي دار حالة وصلو للصال ستقبلتهم عائشة وجدة وخالة ياسمين بالتمر و الحليب للعروسة و من بعد كل واحد حكمة بلاصتو طبعا العرس بدون غناء بالمدائح تصدرة ياسمين وين لبسة الكاراكو لي دخلت بيه وصدرتها بيه نور لي كانت لبسا حتى هيا كاراكو و الجبة قبايل لي صدرتها بيها عجوزتها لي كانت لبستها حتى هي و والشاوي لي صدرتها بيه كوثر بعتبار كوثر شاوية وحتى هي لابسا شاوي و القسنطيني لي كانت لبساتو سلمى وصدرتها بيه و الجبة نايلي كاخر لباس تقليدي لي صدرتها بيه يماها وكانو في زوج لبسينو الام وبناها و في الاخير لبسة لغوب بلونش اما خيطتها سبيسيال لي يجو مستورين ودارت معاها خيمار كيما لي يديروهم التراكا نحب نقلكم انو إسراء كانت تتصدر مع ياسمين واش تلبس ياسمين تلبس إسراء نفس اللون ونفس التفاصيل خرجت ما شاء الله
في اخر العرس دخلو الرجال بعد منبهو جميع النساء انهم يتسترو الرجال لي دخلو هم رجال العيلتين فقط الزوج أحمد ههههه و شيخها محمد و باباها سي علي ( كاين في عداتنا وتقاليدنا انو الاب ميحضرش عرس بنتو ام بما انه عرس مشترك فكان لزم يحضر باش يقوم بواجب المعازيم لي من طرفو ) و ايوب و اسامة و نسيم ونزيم وحتى منصور و عمومها و خوالها باش يتصورو معاها من بعد خرجو وبقا احمد باش يدو تصاور خاصين و حتى داو تصاور مع اسراء يعني احمد و ياسمين و إسراء وخلاص العرس وبداو الدموع من جديد يماها و كوثر دارو حالا بسيف باش قدرت تخرج
كي كانت خارجة صرا مشكل و كاي عرس جزائري لزم فيه المشاكل 🤣🤣
عائشة : اي خلاص حبسو علينا الدموع يا جماعة يهديكم ربي ياك هدا النهار تاع فرح
مريم : الله غالب هدي بنتي
عائشة : يا مريم ياك بنتك تزوجت و راهي قريبة عليك وقت لي تحبي اروحي شوفيها ولا تجي تشوفك
مريم : الدمعة وحدها راها طيح
نور: خزرت في ختها سلمى ونتي لاه راكي تبكي 🤣 سلمى : مزال متعرفيش هدي اللحظة شحال صعيبة بزاف
نور : خزرت فيهم لقاتهم كامل مشخشخين بدموع
نطقت اسمعو انا عرسي راه قريب ادا نوين تندبولي فيه و تبكو غير مكلاه تجو ملخر
طرطوڨو كامل بالظحك 🤣🤣🤣
مريم : يعطيك الربح يابنتي
كوثر : هزعما باش نبانو بلي نحبوك و غيظنا فراقك قدام دار شيخك ...ولا تحبيهم يتوسوسولك بلي تهنينا منك حتى البكية مبكيناش عليك
عائشة : بهدلتيني يا بنتي مزيا هدو توعنا مشي براويا
سلمى : انا وحدا دمعة منطيحاش عليك نقلهم تهنينا منها هدي الفيڨورا
ياسمين كانت تسمع فيهم والخلعة حاكمتها والدموع محبوش يحبسو وحدهم وحدهم
جا نزيم وفي يدو إسراء ونطق : ماما هاكي إسراء قالك خالو احمد مديها لنور و قوليلهم ادا واجدين نتكلو على ربي
سلمى : لينة وين راهي
نزيم : عند بابا محبتش تدخل
سلمى صحة اسنى دقيقة دك نجي
سلمى : يما احمد يحوس يروح
عاىشة : ايه هداك هو الحال دك انا نهدر مع مريم و نتي قوليلو يجي
سلمى راحت عند وليدها قاتلو قلو يجي
اما عائشة عيطت لمريم وهدرت معاها قتلها بلي هديك هيا باش يوجدو ياسمين تخرج
راحت مريم عند بنتها تنصح فيها وتوصي كاي ام مقلقة على بنتها كوثر توجد في الفاليزا و تتاكد من صوالح ياسمين وتلم في دوزانهم
حتى جاء داخل احمد لقاهم مستورين
عطاتلو نور الفاليزا
خزر في ياسمين قالها مزال موجدتيش روحك
نور : راهي واجدة
خزر وقال مفهمتش كيفاش
ياسمين : راني واجد
احمد : تخرجي هكا قدام الناس
نور : واش فيها ياك لبسا روب طويلة و مستورة وبالخيمار عادي شابة كلاص ومستور وزيد هي عروسة هكا راهي طوب
احمد : نور مدخليش روحك ياسمين وين راه البرنوس تاع مقبيل
ياسمين : علا ش ياك راني مستورة والله مفهمتك
احمد و هدا المكياج كيفاش نديرولو اه و زيد لغوب جياتك سور طاي مفصلاتك هكا ناوية تمشي في وصت الرجال
ياسمين سكتت حكمها البكا من نبرة صوتو وطريقتو في الكلام
دخلت مريم وعاىشية لشومبرا تاع العروسة بعدما حسوهم بلي طولو تخلعو كي شافو ياسمين تبكي ونور تعيط وتشالي واحمد وجهو ميتفسرش
عاىشة : واش كاين غير الخير
احمد : وين راه البرنوص لي دخلناها بيه
عاىشة : علاه تحوس عليه
مريم : راه في الفليزات لي فيهم التصديرة بصح علاه تحوس عليه
احمد باش تخرج بيه جيبوهولي
عاىشة : ياك راها مستورة والدنيا ليل مكاش لي راح يشوفها
احمد : يما بلا تكثار هدرة جيبيه
راحت نور عند كوثر باش تمدهولها جابتو وجات
نور : هاك ربي يجوز هدي الليلة على خير برك
لبسة ياسمين البرنوس عونتها يماها هبطاتولها على وجها جات عائشة قربت احمد لياسمين وحطتلو يدو على يدها وقاتلو دير بالك عليها من الليوم راهي مرتك و عرضك وشرفك نحبكم يد وحدا المفاهمة هي الصح
خرج احمد مع ياسمين لي كانت تبكي من المشكل لي صرا خايفة متوترة وزيد التقلاق هدا كامل واحد مشافو بعتبار البرنوس كان مغطي على وجها فواحد مراح يقدر يشوفها
اما احمد لي تمتم عاود ولى لجووالفرح وخرجو في وسط زغاريت النساء و البارود نسيم ونزيم واسامة دارو رايهم بالبوق حتى وصلو لطنوبيل احمد يعاون في ياسمين باش تركب سقملها لغوب والبرنوس وراح ركب جيهة تاعو محبش يدير كورتاج راحو وحدهم
اما لي كانو في الصالة خملو دوزانهم و كل واحد راح لدارو ونتهى العرس
في الطريق نتبه احمد بلي ياسمين راهي تبكي اما قال بلاك كي العرس اليوم ونساء كامل يبكو حاول انو يوانسها اما شافها مجوبتوش قال بلاك حشمانة
وصلو لدار حبط احمد الفاليزا وحبط دخلو لدار لي كانت عبارة عن فيلة (من بعد نوصفها) دخلها ليها دخلت برجلها الايمن وسمات بسم الله
ورالها غرفة النوم لي كان فيها الحمام الخاص فيها
حط الفاليزا و راح جيهتها رفعلها البرنوس وخزر فيها كان وجها حمر من جيهة القلق و من جيهة الحشمة دموعها دايرين حالة جا يقرب منها بعدت للور ودارة
احمد واش بيك ياسمين فهميني هدرت معاك في الطنبيل بقيتي ساكتة مطفيتني طول الطريق
دك نقرب ليك تبعدي واش كاين حبيبي
ياسمين : ساكتة
احمد : دورها عندو بكل حنية فهميني حشمانة خايفة واش بيك ؟
ياسمين : تنفست ودارت شهيق زفير مقلقة وزعفانة
احمد غير الخير واش كاين قوليلي شكون قلقك
ياسمين : نت مقبيل تعيط عليا و تحشم فيا قدام نور و ماما وماماك
احمد : ونتي من نيتك كنتي خارجة هكاك
ياسمين : منتبهتش كون نبهتني بيني وبينك عادي حتى انا منيش مهبولة باش نعصي ربي سبحانو بصح منتبهتش بلي لغوب مفصلة بزاف بصح نت لالا غير شفتني هكاك بديت تعيط و تبهدل فيا حط روحك في بلاصتي يدخل بابا و باباك و ايوب و يلقاوني نعيط عليك واش دير اه
احمد : خلاص اسمحيلي حبيبي كنت مضغوط من العرس و المشاكل وجات فيك
ياسمين سكتت
احمد : هاهو الدوش توضاي باش نصلو انا نروح لدوش لخور
ياسمين : دخلت لدوش دوشت توضات ودارت روتين تاع العرايس لبست طقم الصلاة وخرجت
لقاتو يسنا فيها
ياسمين مصليتش المغرب والعشاء
احمد : صلي المغرب تاعك من بعد نصلو العشاء كيفكيف
صلاة المغرب سلمت من بعد صلاة العشاء في جماعة وزادو الشفع و من بعد صلاو ركعتي سنة تاع الزواج باش صلاو الوتر من بعد دار ليها حط يدو على ناصيتها ودعا دعاء تاع الزواج ......
غدا صباحا
ناض احمد هو اللول وجد الفطور قهوة حليب لياسمين وقهوة ليه الميلفاي و الكروسو و الجو الماء راح لشومبرا لقاها مزال راقدة
احمد : ياسمين حبيبي نوضي
ياسمين : امم نظت وناضت
احمد : بقا مدهوش خلاص نظتي
ياسمين : علاه واش كاين
احمد : تنوضي تمتم
ياسمين : ايه رقادي خفيف
احمد : ما شاء الله العيباد لي نعرفهم كامل رقادهم صعيب عليها ستغربت
ياسمين : صباح الخير
احمد : صباح النور هيا تستقهواي راني وجدت القهوة
ياسمين : نت وجدت القهوة !!!
احمد : ايه انا واش بيك حايرة
ياسمين : متخيلتش بلي واحد كيما نتا يعرف يوجد القهوة
احمد : نوضي اغسلي وجهك خلينا نستقهواو دخلت لدوش غسلت ودارت روتينها خرجت للكوزينا وفي نفس الوقت تستكشف في الدار
ياسمين : ايه الورد والحالة ما شاء الله
احمد : ايه متستهينيش بالقدرات
ياسمين : لالا عرفت ندي الله يبارك كل صبع بصنعة
احمد : اقعدي تمسخري حتى ترجعي تكحلي على فطور كيما هدا و ميصحلكش لالا خلاص راجلي شاطر خموس
احمد يااااسمين
ياسمين : خلاص وحطت يدها على فمها مكلاطية بالضحك
خلصو فطورهم و دارو في الدار يوريلها فيها
المنزل عبارة عن طابقين الارضي فيه غرفة نوم تاعهم وغرفة نوم إسراء فيها صالة كبيرة و مطبخ وغرفة فارغة و فيها هول
الطابق الاول فيه غرف فارغة اما الطابق الثاني فيه السطح برك الفيلا فيها ايضا جنان صغير محيط بالمنزل هدا مكان
كمل ورالها الدار من بعد وجدت روحها باش تروح للحفافة لانو اليوم صباح العرس باش يديرو فطور العروسة
يتبع ...
VOUS LISEZ
إسراء الياسمين
Short Storyقصتنا اليوم هي عبارة عن حكاية من نسج الخيال باللهجة الجزائرية عن رجل فقد زوجته اثناء ولدتها لبنته التي حملت اسم والدتها احداث القصة ستبدا بعد 3 سنوات من الحادثة
