إسراء الياسمين

25

في دار احمد وين كانت ياسمين وحدها قاعد في الظلمة  لانو قبل ميخرج غلق عليها الڨاز والماء والتريسيتي وكانو حطها في الحبس
خافت بكات حتى عيات  جاعت عطشت مكاش واش تاكل  على الرغم لي هي متاكدة بلي مدارة والو بصح خافت  قد ما عصرة مخها "عمار ***" شكون لكن لا جواب  معرفتوش خمت حتى يكون ولي احد التلاميذ بصح معندهاش تلميذ بهذا اللقب وكلت امرها لربي راحت قضات صلاتها لي فاتتها بالتيمم بما انو الماء مقطوع  وزادت قامت الليل باش ربي يظهر الحق ودعات "يارب اني مغلوب فانتصر" "يارب لا اسالك رد القضاء ولكن اسالك اللطف فيه" "يارب لا تحملني مالا اطيق" مفاقتش كيفاه غفات 

اما احمد لي كان في بوست بوليس وبالضبط الساعة كانت 4 صباحا كان فطن المدعو بلال طبعا بعد ما خذا طريحة تاع الكلاب اعترف بالحقيقة وبلي المدعوة نوال هي لي قاتلو دير هكا وهو ميعرفش ياسمين والمعلومات لي جابهم جابهم من عند نوال والخطة كانت انو كل مدة يبعث لاحمد جزء من المعلومات باش يزع في قلبو الشك وتفرق بين احمد وياسمين كل هذا حسد وغيرة من نوال
خرج البوليسي من غرفة التحقيق واحمد كان يسمع كلش نطق البوليسي كاشما خصك تزيد تسمع
احمد: لا خلاص ديت لي يفيدني
بوليسي: ان شاء الله متكونش تسرعت وكشما درت لطفلة
أحمد:جاتو لحظة ادراك ونطق انا لازم نروح
بوليسي: وهدا واش نديرلو
أحمد: انا راني حاط شكوة حطو فالحبس وحولو على المحكمة تحبني نوريلك خدمتك وحتى نوال ادا قدرت دخلها للحبس راني رايح
وصلت الستة تاع صباح كان احمد عند باب الفيلا تاعو بصح متردد انو يدخل وفي الاخير دخل لقاها في الصالو راقدة على السجدة تاع الصلاة ودموعها ناشفين على خدها لام روحو كيفاش مسمعش منها اما ندامة تجي من تالي
جا يرفدها يحطها في بلاصتها ناضت لقاتو في وجها خزرت فيه خزر لخصة كلش جا يهدر سبقاتو هي
ياسمين: النتيجة طلقني ولا نطلقك واش لقيت
أحمد: ياسمين حبي انا
مخلتوش يكمل
ياسمين: طلقني ولا نطلقك

أحمد: اسمعيني انا كنت مقلق وخسرة الهدرة و
زادت قاطعاتو
ياسمين: انا لبارح كي كنت نسنى تفهمني نت واش درت سبيتني هكا عمرو واحد في حياتو مسبني بهدي الطريقة هنتني قللت من احترامي شكيت فيا قذفتني وزيد وزيد ليل كامل وانا نطلع ونهبط شكون هدا عمار ***
المشكل معرفتوش بصح نقلك حاجة حسبي الله ونعم الوكيل
أحمد: حطي روحك في بلاصتي يجي واحد يبعثلك مساج فيه وفيه وتحبيني نبقا ساكت
ياسمين: تعرفو لي بعثلك المساج متعرفش بصح نت خيرت تثيق في هدرتو ومتثقتش فيا
أحمد: قليلي كيفاش نقدر نعوضك مستعد ندير اي حاجة
ياسمين: حاجة ساهلة متجرجرنيش في المحكمة حابة نفريها بجلسة وحدة منيش قادرة نزيد نتعب معاك كثر ولا نشوف وجهك مرة اخرى
أحمد: ندير اي حاجة غير هذي مستحيل
ياسمين:دبر راسك انا لي عندي قلتها دك خليني نوجد روحي عندي خدمة ولعشية نجي مع بابا ندي قشي
أحمد: ملا نقلهالك منلخر ادا قدرتي تخرجي اخرجي
ياسمين: وقيلا ناوي تحبسني عندك قاطع عليا الما التريسيتي الڨاز الماكلة كيما البارح ههههه متخوفنيش علبالك علاه معايا ربي راني موكلاتو عليك وريني شطارتك مع ربي سبحانو
أحمد: ياسمين حبي هدا أول مشكل راكي رايحة ومخليتني هدا لي تحبيني و إسراء شكون بيها
ياسمين: هدي الهدرة قولها لروحك اول مشكل رياجيت هكا اما على اسراء مشي مشكل تعيش عندي ميخصها والو وفي الويكاند ارواح شوفها (واش راهي تهدر هذي الطفلة بنتو وحابة تنحيهالو)
أحمد: منيتك بنتي ومرتي يعيشو في دار وحدخرا بعيد عليا
ياسمين: شوف الحل لي يخرج عليك ديرو مع بنتك انا بريت ذمتي منك وحتى من بنتك وعطيتك حل باش متقولش راحت وخلات الطفلة متعلقة بيها
أحمد: دوك موليتيش تقولي بنتي وليتي تعيطيلها بنتك قسيتي قلبك حتى على طفلة صغيرة معندهاش ذنب
ياسمين: جبلي ربي نحبسو الهدرة هنا وكل واحد يشوف حياتو رجعلي تلفوني خليني نعيط لايوب يجي يديني
كل هدا الحوار وياسمين كانت تهدر بهدوء عكسو هو لي كان خطرة يعلي صوتو خطرة ينقصو مشاعرو متلخبطة بين حزن وندم
أحمد: بعياط مكاش خرجت من دار حتى ترضاي
ياسمين: بسيف يعني
أحمد: ايه بسيف
ياسمين: طرطقت في وجهو بعياط واشمن دار راني فيها يرحم باباك كانت تعيط وتبكي و تهدر معاه : مشي داير فيا ثقة اول مشكل تهمتني وشكية فيا قذفتني وانا حتى منيش عارفة واش كاين اههه اهدر ولا راني نكذب صدقة الناس عليا قلي ادا راني غالطة رحت وخليتني نهار كامل لا ماكلة لا شراب لا ضوء وحدي تقول شي واش دايرة تسبني تقول عليا وحدة عاهرة جاوب وفي لخر تقلي اسمحيلي وحبي واشمن حب اهدر كيفاش تحبني نسمحلك اه صح مشي كرامتك لي نهانت هنا بصح تعرف وشنو انا لكلبة لي قبلة بزواج كيما هذا كل يوم نسمع ناس تقول طمعت فيه على جال دراهمو وهدرات وحدخرين يمرضو لبنادم بصح قلت معليش انا نشوف وجه ربي في هدي الملايكات ونعوضها عمري ولا شكيتلك ولا بيكتلك بصح تكون هكا جزاتي ومنعندمن منعندك انت لي حبيتك مضنيتش يجي يوم ونسمع منك كلمات كيما هدو قلي دك جاوب اهدر
احمد كان قاعد يسمع فيها وهو ساكت خلاها فرغة قاع واش في قلبها من بعد انطق : انا لي غالط نستعرف اسمحيلي ومتخليش الشيطان يدخل بيناتنا اطلبي عينيا نمدهملك غير الطلاق لالا
ياسمين: مكش حاب طلق
احمد: مستحيل
ياسمين: ملا ياوليد الناس مليوم نت في حدك وانا في حدي وضك اعطيني تلفون وصاك خليني نروح نخدم
احمد: اصبري نوصلك نروح نستقهواو برا و قاطعتو ياسمين منيتك احمد ولا تتبهلل هدا وين تفكرة الماكلة والشراب منسحقش مزيتك راني ناذرة صوم كي ربي يجيب برائتي
أحمد: بصح من لبارح مكليتيش خلي غدوة صومي
ياسمين: ياعمري خايف عليا امنتك علبالك
راحت خلاتو في بلاصتو دخلت للبيت لقات شوية حوايج ملي خلاتهم بدلت وخرجت لصالو لقاتو حايطلها التلفون والصاك فوق طابلة عيطت لنور قاتلها تجيبلها شوية ادوات راهم في بيتها وخرجت لقاتو عند الباب يسنا فيها باش يوصلها تجاوزاتو كملت رايحة للاري دو بيس خرج جبدها من يدها طلعها بسيف
احمد: وين كنت رايحة
ياسمين: للخدمة
أحمد: متلعبيليش باعصابي فهمنا بلي ضلمتك بصح تلحق لتجاهل منقبلش مرتي تتجاهلني
سكتت مجوباتوش ديمار طنوبيل باش يوصلها
احمد: فهميني برك كيفاش كنتي رايحة
ياسمين: فلبيس
أحمد: مليح مليح راني نشوف فيك بديتي تركبي راسك بصح مشي عليا
ياسمين: خزرت فيه كانت راح تجاوبو من بعد قرت تسكت خير وصلت للخدمة هبطت بلاما تهدر معاه كلمة دخلت كانت وصلت بكري
قعدة تطلع وتهبط وتخمم حالة المهموم واش هو الحل للمشكل لطاحت فيه دك
حتى جاتها نور مدتلها دوزانها
نور: فهميني برك واش صرا  واش بيه احمد مقلق ونتي ساكتة لبارح عيطتلك مترفديش
ياسمين: خزرت فيها عينيها معمرين دموع من بعد نطقت اسمحيلي بصح البيوت اسرار بصح ادعيلي
راحت نور عنقتها ياسمين كانت محتاجة كتف تسند راسها عليه غير حطت راسها بدات تشهق ونفس ينقطع عليها معرفتش تتنفس عرفة بلي حكمتها نوبة ربو المشكل عندها شحال قريب 5 سنين محكمتهاش مولتش ترفد معاها الدوا
نور: بلعقل برك اتنفسي مليح
ياسمين: نور اديني لسبيطار
نور:علاه
ياسمين : حكمتني لكريز (كانت تهدر بهوان وتقطع)

يتبع
خلولي ارائكم في التعليقات 🥰