عائشة : انا والله كون تولو على رايي مدابيا العرس يندار غدوة بصح باش منكونوش ظلمنا الطفلة و دارهم نقترحوو عليهم العرس في الربيع و نشوفو رايهم كفاش يكون قبلو اللهم بارك مقبلوش اللهم بارك وزيد حنا من اللول قلنالهم بلي حنا مناش ناويين نطولو في فترة الخطوبة
محمد : مدام نتوما مكمش معارضين خلي نتفاهمو معاهم قبلو اللهم بارك مقبلوش اللهم بارك
كملو العشاء وكل واحد طلع لبيتو أحمد كان متكسل اما خمم في هدرة نور و قعد يطلع و يهبط وقرر يروح لنور باش تعيط لياسمين تسقسيهالو على رايها
نور : كانت هدا وين كملت الدوش و راح تنشف شعرها سمعت طبطيب في الباب
أحمد : نقدر ندخل
نور : ايه
أحمد : سحقيتك في موضوع ادا تقدري تعيطي لياسمين و تشوفيلي واش رايها في موضوع العرس
نور : علاه معندكش رقمها (حبت تهبلو🙃)
أحمد: لالا مين راح يجيني
نور : ارا تيلفونك نكتبهولك
أحمد: متقعديش بيا طفلة مزال مهيش مرتي واش تحبيني نهدر معاها
نور :😂😂😂
أحمد: واش بيك تدحكي
نور :سبحان الله تليقو على بعظاكم
هو ستغرب الطفلة واش راهي تهدر
كملت نور : تعرف بلي سقسيتها نفس السؤال قتلها كفاش باش تتواصل معاك بالحمام الزاجل قاتلي ماهو راجلي ما مفتح عليا ما عاقد عليا وادا سحقيت من عندو حاجة كاين بابا و كاينا انا و علاش انا ختك في باطل
كملة تهدر الظاهر انا راح نخدم مكتب بريد ومواصلات المهم خزرت في الساعة لقاتها 11:05 جاوباتو منقدرش نعيطلها دك روطار
أحمد علاه متخدميش فليل
نور مش انا لي منخدمش فليل مرتك لي ترقد بكري و دير التلفون مود افيو باش منوضهاش
أحمد راها غير ل11 سيي عيطيلها بلاك راهي نايضة
نور عيطتلها ودارتو اون باغلوغ : ان هاتف مراسلك مغلق او خارج مجال التغطية يرجى إعادة المحاولة لاحقا
نور : قتلك بلي هديك شكارة نوم ل10 تكون راقدة يصرا واش يصرا متفرطش في الرقاد ياو نهار خطبتكم زعما نهار مميز على قداش رقدت على ل11 قاتلي خلاص منقدرش نزيد كتر من هك دك هدي مشي شكارة تاع نوم
أحمد : المهم خلاص غدوة نهدر مع باباها و نشوف كيفاش
نور : تسمى منهدرش معها
أحمد : لالا خلاص كنت حاب نعرف رايها بلا مواحد يضغط عليها اما دك خلاص
طلع نهار و محمد علم علي بلي راهم جايين يتكلمو في موضوع وهو رحب بيهم
دار ياسمين لي كانو حايرين لسبب هدي الزيارة المفاجأة وخصوصا ياسمين لكانت خايفة كتر ملي حايرة
في المساء و بضبط في صالون دار علي كان أحمد وباباه مع سي علي وأيوب يڨصرو و يضحكو حتى نطق سي محمد علبالي راكو حاييرين علاش جينا
نطق علي : حاشى الدار داركم مرحبا بيكم في أي وقت
محمد : كيما علبالكم بلي حنا رانا مستعجلين في عرس الطفل و قررنا العرس يكون في عطلت الربيع شفناها مناسبة لضر فنا و ان شاء الله تساعدكم حتى نتوما
أيوب خزر في باباه خزر تاع إندهاش و هبط راسو ملقاش واش يجاوب اما علي مبين والو على وجوه ولتزم الصمت لمدة دقيقة من بعد جا يهدر حتى قاطعو أحمد : عمي علبالي بلي المدة هدي صغيرة بزاف باش تقدر توجدو فيها الطفلة اما كيما سبق و قتلكم بلي انا راني مزروب و تاني راني واجد اما لقرار الاخير يرجع ليكم و لياسمين
علي : شوف يا وليدي أنا منقدرش نجاوبك ضك كيما نتوما تشاورتو و خرجتو بهدا القرار فحنا تاني لزم نتشاورو وكيما قلت ياسمين تاني معنيا بهدا القرار فأكيد راح نعرف رايها ونرجعلكم بالخبر و ان شاء الله ربي يجيب الخير
رجع أحمد و محمد لدارهم وكل واحد لتى بشغالاتو أما في عايلة علي كل واحد واش كان عندو راي اما بصفة عامة كانو ضد فكرة العرس يندار في عطلة الربيع على الاقل كانو يصبرو لصيف
مريم : هوما صح قالونا مستعجلين اما كنت نضن انو العرس راح يندار مور عرس بنتهم
كوثر : فهمت علاه قدموه يمكن خافو ايمات عرس بنتهم واحد ما يلتى بإسراء و حتى مور العرس تقعد مدة بلا عمتها فحبو يجبوها قبل متروح نور
هنا ايوب داقتلوو: ايه هوما يديرو حساب لبنتهم ومشاعرها اما لبنتنا ميحسبوش حسابها
علي لي كان غير ساكت يخمم في كيفاش راح يقدر يجهز بنتو في هدي المدة و لعرس و ....
نطقت كوثر : ايه ياسمين نتي واش رايك مصباح ساكتة
ياسمين لي كانت تشوف في باباها وتعرف مليح فاش كان يخمم نطقت : منيش عارفة مزال مخممتش خلوني نخمم و غدوة نمدلكم رايي
علي : خذي وقتك و قوليلي
جاء الليل و مريم دخلت عند بنتها لبيت حبت تعرف راي بنتها وين مايل : واش راكي ديري
ياسمين: اني نخمم
مريم : ايه واش بانتلك
ياسمين: المدة صغيرة بزاف ودراهمنا ميكفوش نجهز روحي و ..
مريم : متخميش في الدراهم خمي في نفسيتك قادرة بعد شهرين تتزوجي و تولي ام و مسؤولة على عايلة ولا لزملك وقت كثر
ياسمين: ماما نسقسيك ياك حنا نهار خطبنا كوثر سقسيناها وقتاش يساعدك الحال و نهار لي خطبك بابا سقساك على رايك ولا لالا
مريم : مفهمتش وين حابا توصلي
ياسمين: نجاوبك هدا قرار مصيري حياتي و حياتو راح تتبدل على كلمة مني و كلمة منو يجي هو و يقول بعد شهرين لعرس عجبك الحال مرحبا معجبكمش اخبطوو راسكم مسقسا على رايي محوس يفهم حتى باش يقدر ضروفنا بلي ميكفيناش الحال محسبش حسابها
مريم : خزرت في بنتها و كانو فهمت بلي بنتاها غاظها الحال من تصرف أحمد معاها ،
ياسمين : ماما نتي واش رايك
مريم : راني خايفة عليك بلي متقدريش تحظري نفسك نفسيا في مدة هذي اما من ناحية أخرى كلش مطمنة عليك
ياسمين: ماما معليش تخليني نرقد
مريم : فهمت بلي بنتها موجوعة من الجاست هي بنتها و تعرفها طول عمرها كانت تكره واحد يحطها تحت امر الواقع غطاتها و خرجت
ياسمين غير خرجت يماها طاحتلها دمعة مقدرتش تشد روحها و على غير العادة مقدرتش ترقد هدي الليلة راحت صلاة ركعتين إستخارة و دوشة وعودة ولات لبلاصتها تطلع و تهبط حتى طلع النهار دخلت للكوزينا وجدتلهم خفاف و سنيوة تاع القهوة كان باباها ناض يصلي لفجر مع يماها حارو في بنتهم نايضا هدا الوقت على 5:00 و دير في الخفاف اما سكتو عرفوها بلي مقلقة و مش حابة تحكي كملو ستقهواو خزت في باباها وقاتلو منيش قابلة العرس يكون في العطلة تاع الربيع هكا رجعلهم لخبر
خزر فيها باباها نطقت يماها ادا بيك دراهم ياك قتلك متخميش فيهم ياسمين ليل كامل وانا نطلع ونهبط مدام هو محوسش يتناقش معايا في حاجة تخصني كيما تخصوو وجا و حب يفرض رايو عليا انا تاني منحوسش نفهم ضروفو و منيش قابلة العرس في ربيع وادا معجبوش الحال يروح يشوف في جهة وحدخرة
سي علي نطق : شوفي يا بنتي نتي راح تفتحي دار و تكوني مسؤولة عليها مش من اول مشكلة تنسحبي و ترفدي قشك و تهربي حاولي تحاوري و تفهمي وجهة نظر تاعو و تتناقشوو و تدرسو الموضوع من كل النواحي مشي هكا تنحل الامور
ياسمين : الغلطة مشي مني لبارح كان هنا و في دارنا و هدر معاك و مع ايوب و كان قادر يهدر معايا يبينلي وجهة نظرو يشرحلي ضروفو ونشرحلو ضروفي اما هو جا قال هدرتو وخرج مام انا عندي الحق نرفض إقتراحو
سي علي : كلمتك الاخيرة
ياسمين : ايه
سي علي : اني خارج نصلي ربي يهدي نفوس
خرج سي علي و مريم قاعدو تخزر في بنتاها ملقات واش تجاوبها ولا تنصحها
ايوب لي راح مع باباه للجامع وسمع راي ختو لي عجبو (حسيتو مهوش حاب ختو تتزوج 😂😂 ولا يسال أحمد حسيفا)
طلع نهار و كوثر هبطت عند دار شيخها وكانت مريم حكاتلها قرار ياسمين و قتلها تحاول تقنعها باش تتراجع عليه
دخلت كوثر لبيت ياسمين بعد ما دقدقت لقاتها راقدة والبيت ضلما راحت نوضتها و جات تهدر معاها ياسمين تحت الغطاء ادا جاية تڨصري اسمحيلي منيش قادرة نوض ضك بيتا قاعدة وادا جاية تبدليلي رايي غير روحي عند مريم كشما تڨصرو ولا شوفي واش ديري قراري منبدلوش
جات خارجة من البيت لقات تلفون ياسمين يطفا ويشعل قتلها تليفونك راه يصوني نور راهي تعيط فايت 5 مرات
ياسمين : بڨرة متفهمش بلي منيش حابة نهدر معاها، تعيشي اهدري معاها قليلها راهي راقدة ولا نقلك جيبي تلفون
كوثر : غير بلعقل راهي صحبتك متخسريهاش
ياسمين : رفدت التلفون يا بنادم متخليش الواحد يرقد مع صباح ربي تعيطي غير الخير
نور : يا شكرة نوم وانا نقول علاه مراهيش ترفد
ياسمين : واش تسحقي وادا على خوك غير متهدريش عليه منيش حابة نربحلك العيب
نور : خلاص مدام راكي زعفانة انا نكوبي خير من بعد كي يروحلك الزعاف عاوديلي روحي ارقدي
ياسمين : كوبات بلا متقول كلمة
نور : راهي زعفانة للخر كيما قتلكم لبارح مشكيتش راح تقبل
عائشة : مقدرتيش تعرفي علاه
نور : طفلة مرهيش قادرة تهدر معايا باش متربحليش العيب في جرة وليدك و انا كيفاه حبيتي نعرف علاه
هنا نفهمو بلي حتى عايلة أحمد وصلهم الاجابة على سؤالهم
يتبع ...
VOUS LISEZ
إسراء الياسمين
Short Storyقصتنا اليوم هي عبارة عن حكاية من نسج الخيال باللهجة الجزائرية عن رجل فقد زوجته اثناء ولدتها لبنته التي حملت اسم والدتها احداث القصة ستبدا بعد 3 سنوات من الحادثة
