إسراء الياسمين

4

تعدات سمانة أخرى و ياسمين تخمم في الحقيقة هي كانت عرفت الاختيار في دقيقة لي دارو فيه الرؤية اما حبت تزيد تصبر تقول معليش نزيد نتاكد راهو قرار مصيري مشي اواح و ازوج
  كان يوم خميس و ياسمين متخدمش ناضت من بلاصتها على 7:00 و فتحت التاقة هوات البيت دارت روتينها و بدات الميناج الاسبوعي للمنزل هي نهار شافت جدول التوقيت لي طاحاها هدا العام فرحت على اللخر وبالاخص كي عندها الخميس و جمعة و سبت راحة فقررت يوم الخميس من كل اسبوع يكون الميناج الاسبوعي و كي تكمل تتهلا في روحها بدات تمسح الغبرة تنفض تبدل في الفراشات تشوف الصوالح لي لازم يتغسلوو تحطهم في الحوايج لغسيل ... مجات تكمل حتى وصلت ال1 راحت فطرت مع يماها و لمت الطابلة وغسلت لماعن كي كملت راحت لدوش دوشت و حطت كريمات و دارت تقشير و كل مايخص العناية بالشعر والبشرة لبست بيجاما دافية لانو جو بدا يبردو جات رايحة تتكسل في بلصتها اما شمت ريحة بنينة راحت للكوزينة لقات يماها دير في البغرير و كوثر عندهم فرحت سلمت على راس يماها وقعدت تلعب مع علي و تڨصر معاهم وجدت السنيوة تاع القهوة هنا يماها ستغلت الفرصة و غمزت كوثر باش تفاتحها في السيرة و كوثر بدات دون مقدمات :ايه ياسمين  مقلتيناش واش رايك
ياسمين : فاش
كوثر : في أحمد قابلة ولا لالا ؟
ياسمين خزرت في يماها ولقات بلي خلاص لازم تهدر ياسمين : في الحقيقة القرار عندي مدة ملي خذيتوو كوثر : ايه واش قررتي
ياسمين : راني قابلة هنا كوثر فرحت و زغرتت غير بالشوية لانو علي راقد خافة لينوض وسلمت عليها و مريم هي ثاني سلمت على بنتها اما في قلبها كانت تتمنى نصيب احسن من هكا مش تنتقص من قيمة أحمد و عايلتو أما حبت بنتها تكون عندها عائلة كيفها كيف لبنات (ان شاء الله نكون وصلتلكم شعور مريم )
ستقهواوو في جو عائلي و فرحة و بداو يهدرو على التجهيزات و التوصيات ... حتى دخل علي و ايوب ستقهواوو معاهم و ڨصرو مع بعضاهم و ايوب و كوثر طلعو لدارهم و ياسمين لمات السنيوة تاع القهوة و بدات تغسل في الماعن وتوجد في العشاء في الصالون كانتقاعدة مريم مع سي علي لي كانت تخبى فيه على قرار بنتها انها قبلت باحمد  لي حتى هو  تقبل قرار بنتو بصدر رحب و قرر يسناو مكالمة من عند محمد باش يبلغوهم بالقرار اما ايوب بعد ما سمع الخبر فمعجيوش الحال منكرش اخلاق أحمد وانو مستحيل يلقى راجل كيما هو يامنو على ختو اما خاف على ختو من المسؤولية .... اما كيما يقولو هو دار لي عليه نهار جات سقساتو على رايو و تان وقف معاها وراح دار تحقيق على السيد و سقسا على العايلة كامل مشي غير أحمد و دك يبقى دورو انو يوقف مع ختو في قرارها و يدعمها و نهار تحتاجو راح  تلقاها واقف معاها و في كتافها
  جات الجمعة و ياسمين صبحت راقدا حتى لل 9:00 باش ناضت اصلا الشغل كامل مخدوم راحت دارت روتينها و ستقهوات و عاودت ولات لشمبرتها تكمل تصحيح الورق تاع الفروض لي بقاولها دخلت عليها يماها قاتلها بلي باباك عيطلو عمك محمد و قالو على رايك و قالو بلي غدوة راهم جايين باش يتفاهمو على تفاصيل العرس و الخطوبة واش رايك نتي
  هنا ياسمين تشوكات يعني مكانتش متوقعت بالسرعة هدي و بدات تخاف
  مريم شافت الارتباك لي في وجه ياسمين اما حاولت طمنها : عادي يعني هما مشي غدوة جايين يخطبوك جايين برك يحدو موعد الخطوبة و ..و اصلا الدار نقيت و كلشي في بلاصتو بقا غير كشما نوجدولهم الحلوة و الضيافة ضك نتي توجدي نوع و انا نوع و نقولو لكوثر  كشما تزيد تعاونا و هي فرات ياسمين : طمنت شوية من هدرت يماها اما بقات حاسة وبالخوف كيما يقولو الضرب بدا يقوا
جا السبت و هدي المرة مجاتش غير نور و عائشة جات حتى سلمى لي حبت تشوف مرت خوها و تڨصر معاها وكي العادة قعدو نساء وحدهم والرجال وحدهم كوثر يد بيد مع ياسمين مخلاتهاش ولا دقيقة و تفاهمو يديرو الخطوبة في عطلة تاع الشتاء بعتبار ياسمين خدامة و مبقاش بزاف على العطلة واحد شهر هكاك يكفيها باش توجد روحها
  سلمى عجبتها ياسمين بزاف و متوقعتش تكون كيما هكا هي صح شافتها في تصاور مع نور اما في الواقع حاجة مختلفة تعدى شهر يجري على ياسمين بين تحضير إختبارات التلاميذ و تصحيح الورق و بين توجاد للخطوبة وجات العطلة و جا نهار الحفلة كل لابسين أحلى ما عندهم و متجملين ما الحاج محمد للينة و إسراء رايحين للخطبة عند دار سي علي لي هما تاني كانو محضرين الدار و الديكور و الحلويات و كل شي وكانو لبسين موجدين روحهم و عارضين الافراد الكبار من عائلتهم عماتها و خلاتها و نسا عموهما و نسا جوالها ورجال العيلة طبعا من عموم وخوال .. مام عايلة أحمد محبتش تجيب معاها بزاف ناس جابو غير الكبر كيما الخالات و العمات و تعدات خطبة روعة لبستلها عجوزتها الخاتم (هي فرحت من قلبها لانو مدخلش من جيهة انها تحشم و من جيهة مجاياش يشد يدها ولا يشوفها بلا خيمار و هي بالمكياج وهي اصلا مهيش مرتو شرعا ) شطحو و ضحكو و تعدى نهار شباب
  جاء الليل وكانو ليمو الحالة و كل حاجة رجعت لبلاصتها كيما تقولنا ماما 😂😂 وراحت دوشت و لبست بيجاما دافية و دخلت تحت الكوات تكونيكتي حتى جاها ميساج من عند نور : كشما بقاتلكم بتيسري كلاوها عليا
  ياسمين : تشوفي انا زعما مسمية على اسمي بصح مقدرتش نطلب حقي قسموها في السما كون مشي المورصو لي كليتو قدامكم والله منعرف واش هو  الڨو تاعها 😂😂
  نور : 😂😂 ونا زعما قلت تخبي لصحبتك حقها تاع البتيسري تدوقيني الفال
  ياسمين : علاه ياك ديتو حقكم
  نور : راني نقلك مشبعتش منها و زيد انا صحبتك و خت راجلك تسمى نسال من زوج جوايه
  ياسمين : يا بنتي راني نقلك انا و مكليتش طاروو بيها لي تقولك لفال لبنتي لي تقلك لوليدي ...
  نور 😂😂😂 خلاص خلاص دك نقول لخويا يجيبلك وحدخرا
  ياسمين : اويلي على التبهديلة واش تقولي لخوك يقلك مشتاقة باتيسري راني نهدر معاك نتي برك وقيلا نولي ندير معاك حساب ادا كل كلمة توصليهالوو
  نور : 😂😂😂 خلاص يا لالة متخافيش منقولوش
  ياسمين : اسمعي ابعتيلي تصاور لي صورتيهم شفتك قاعدة تصوري مقبيل
  نور : ايه دك نبعتهملك خرجتي بزاف شابة زلة مرت خويا صبر ونال
  ياسمين : 😊😊😊 متحشمينيش و ديجا علابالي بروحي شابة
  نور : حوحو شاكر روحو
في وسط التصاور لي بعتتهم نور تعمدت تبعتلها تصويرت أحمد و تشوف ردت فعلها
  ياسمين : والله صح خرجت شابة اسمعي زيدي ابعتيلي تصويرة تاع الڨطو و الحطة والله مالتيت نصور
  نور اوكي
  ياسمين : مزية الواحد ميحشمش منك كون راهي حكمتني البكية على تصاور الڨاطو والديكور و ملقيت منوري لولادي هههه😂
  نور : ههه عادي، مالا كي متحشميش مني جاوبيني واش رايك في خويا
ياسمين  🙃🙃
نور :🤨🤨🤨
  ياسمين : صراحة شفت ناس تزوجو لي عن حب و لي يماه شافتهالو و لي.... وكل وحدة والقصة تاعها اما كامل كي دارو رؤية شرعية حسو بحاجة كي شافو رجالهم كاين لي تقلك عجبني شكلو وكاين لي تقلك قنعني بهدرتو و كاين لي تقلك هو صح ميشبه لوالو بصح حسيت بالاطمئنان من جيهتو ... اما أنا خوك  منيش عارفة واش نقلك اما حسيت بزاف أحاسيس حسيت بلي نعرفو هدي شحال حتى اني كي كنت نهدر معاه مجاتنيش الحشمة ودخلت في الموضوع مباشرة حسيتو بلي متفهم و قد المسؤولية حسيتو انو نقدر نتكل عليه ... اما منقدرش نكدب عليك خفتو حسيت انو صح يقدر يعطيني حريتي اما في نفس الوقت راح نكون مقيدة معاه
نور : في قلبها هدي قعدة وحدا وحسيتي هكا ملا كون تعيشي معاه كيفاش
نور : علاش قبلتي ؟
ياسمين : منعرفش
نور : متهبلينيش هدا زواج و نتي معلبالكش علاه قبلتي
ياسمين : كانت كاينة حاجة في قلبي تقلي أقبلي مكيش راح تندمي
نور : حبيتيه؟
ياسمين : ادا كان هدا تعريف الحب فيمكن حبيتوو اما منظنش
نور : ملا واش تسميه هدا الاحساس
ياسمين : يمكن مشي حب اما نقدر نقول عليه انو خممت بقلبي
نور : وعقلك واش يقول
ياسمين : كون عقلي لقا الجواب كون اصلا مخممتش بقلبي
نور : ربي يجيب لي فيه الخير و ان شاء الله تعيشو أيام حلوة كيفكفم ، اسمعي وقتاش ناويين العرس
ياسمين : منيش عارفة اما ليوم خطبتي فباينا الحكاية مطولة و القرار منيش باش نديه وحدي لزم دارنا و داركم ونشوفو الوقت لي يساعدنا
في هدا الوقت لحق لنور مساج من عند حسام
حسام : سلام واش راكي لباس مبروك على خوك عيطتلو باركتلوو مقبيل و حبيت نزيد نباركلك
نور : ياسمين باي عند شغل دك
نور : وعليكم السلام انا لباس الحمد لله  يسلمك يبارك فيك واش راك لباس
حسام : الحمدلله
وبقاو يڨصرو
بعد ربع ساعة
ياسمين : واش لكيديتيني على جال حسام
نور : زوجي سر سعادتي 😂😂 و ديجا مفتحة و عاقدة ماني ندير في عيب ولا في حرام وأصلا نهدرو خطرة في السمانة باش نعرفو على بعضانا هدا مكان
ياسمين : قلت كلما طرتي فيا يا حفيظ متسكتيش 😂😂
نور : ياسمين نسقسيك أحمد محوسش على تليفونك ؟
ياسمين : لالا علاه
نور : السيد راح يولي راجلك كيفاش راح تتواصلو بالحمام الزاجر

ياسمين : 😂😂 يا بنتي قتلتيني بالضحك الحاجة اللولة مانا مفتحين مانا عاقدين يعني حتى ويطلب الرقم تاعي منمدهلوش و زيدي راح يولي راجلي مزال مرهوش راجلي نهار يولي راجلي تما ساهل الحال و كي. نسحق منعندو حاجة كاين بابا يهدر معاه و لا نتي واش راكي ديري ختو في باطل المهم خليني نروح نرقد راني ميتا بالنعاس نظت بكري ليوم علجالكم
نور : نهار خطبتك و ترقدي بكري والله صح شكارة نعاس بونوي
ياسمين : بونوي

بعد يومين من الخطبة و بضبط في غرفة محمد و عائشة لي كانت تحاول تقنعو يديرو عرس أحمد قبل عرس نور والظاهر من ملامح محمد انو إقتنع بالفكرة وبقى غير انو يحاولو يقنو أحمد لي تفاهمو يجبدولو الموضوع في طاولة العشاء

في العشاء وين كل أفراد الاسرة متلايمة و كل واحد مركز مع طبسيه حتى سمعو محمد يهدر : واش رايك كون عرسك يكون في عطلة الربيع
هنا نور و أحمد في زوج خزرو في باباهم وكانو يسناو فيه يوضح معامن راه يهدر لانو نور خلاص تحدد عرسها بلي في الصيف لكن خافت يكونو بدلو رايهم او شيء هكا لكن غير كمل محمد الهدرة : بما انك واجد من كلش يعني متسحقش وقت كبير باش توجد روحك فيظهرلي انو منا لعطلة الربيع يكفيك الحال تكمل نواقصك وتوجد للعرس بكل راحة هنا فهمت نور بلي الهدرة لأحمد مشي ليها
أحمد بقا ساكت حتى نور بقات ساكتا اما مخها داها لياسمين لخمت انو مستحيل تقدر تكمل تجهز روحها و توجد للعرس في هدي الفترة الصغيرة
أسامة عجباتو الفكرة : تسمى قبل رمضان راح تكون مزوج مبروك عليك من درك
أحمد : هي صح انا واجد اما يظهرلي الطفلة مش واجدة والمدة هذي متكفيهاش و حتى من يومين برك كانت الخطبة كيفاش نعطيها أقل من 3 شهر ونقلها وجدي فيهم روحك
نور : ايه صح انا مع احمد في الهدرة لي راهو يقول فيها ديجا شوفوني غير انا عندي شحال وانا نجهز و مزال مكملتش و تاني كلش غلا و هوما قد حالهم ونفسهم عزيزة مشكيتش يقدرو يكملو تحضيراتهم في 3 اشهر على الاقل لزمهم عام
يتبع ...