= عشان خاطرى يا إياد بلاش تخرج دلوقتى إستنى بس شويه.
إياد بشدة/ بس إبعدى إيدك دى عنى إيه حنيتى ولا إية ياقطة؟؟ مش يوم ماقولتلك إنى مش عاوز أعرفك تانى قولتى مستحيل أرجعلك وكانت كرامتك فوق كل شيئ!! إية دفنتيها ولا إية؟؟
= أنت إزاى دماغك كدة؟؟ يابنى إفهم أرجوك، أنت لو خرجت من هنا مش هتلحق توصل بيتك هتموت.
إياد بضحك هيستيرى/ لا بجد!! وأنتى عرفتى منين بقى؟؟ مسلطة عليا حد ولا إية؟؟
= بص إتريق براحتك بس أنا مش هسيبك تخرج دلوقتى.
زقها إياد بمنتهى القسوة وخرج من باب الكافية إللى شغالة فيه وبمجرد ماخرج لف وشه عشان يغمزلها ويضايقها وأثناء ما كان بيعمل كدة جات عربية بأقصى سرعتها وشالتة من مكانة قصاد عيون ميرال والبنات والشباب إللى شغالين معاها وكمان الزبائن إللى سمعت الحوار من أولة.
ريم صديقة ميرال بصدمة/ إز .. إزاى دة حصل؟؟
واحد من الزبائن/ البت دى دجالة ولا إية؟؟ إزاى تشغلوا واحدة زى دى هنا؟؟
واحدة من الزبائن/ أعوذ بالله اللهم أحفظنا يلا نقوم نمشى من المكان دة.
المدير/ عجبك كدة ياست ميرال؟؟ طفشتى الزبائن من المحل أنتى فعلا دجالة ولا ليكى فى السحر؟؟
ميرال بدموع/ والله أبدا يافندم أنا بخاف ربنا جدا.
المدير/ أومال عرفتى إزاى إن الواد إللى كان واقف هنا لو خرج هيموت؟؟
ميرال بإنهيار/ معرفش معرفش حرام عليكم بقى هو الدجال ولا الساحر بيطلع على الغيب؟؟ كفاية بقى.
المدير/ روحى لمدير الحسابات خدى شغل يومك النهاردة ومشوفش وشك هنا تانى ولا فى أى مكان لأنى هنبه على أى صاحب مطعم أو كافيه فى نطاق المحافظة كلها منك عشان متكونيش سبب فى خسارتهم زى ماخسرتينى النهاردة.
ميرال/ مش عاوزة منك حاجة خليلك الفلوس دى حسبى الله ونعم الوكيل فيك وفى أمثالك.
ريم/ كفاية ياميرال يلا بينا من هنا.
المدير/ إستنى عندك ياريم أنا قولتلها هى تمشى مش أنتى.
ريم/ أنا أسفة يارفعت بيه أنا وميرال واحد إشتغلنا مع بعض وأظن إنك مشوفتش مننا أى حاجة وحشة وبما إنك طردتها فإعتبرنى مطرودة زيها عن إذنك.
أخدت ريم ميرال على مكان التغيير وخرجوا من الكافية.
ميرال/ مكانش لازم تعملى كدة أنتى ماصدقتى لقيتى شغل.
ريم/ إن شاء الله نعوضه بالأحسن إنما أنتى أعوضك إزاى ها؟؟
ميرال/ يابنتى ومين قال إننا كنا هنخسر بعض؟!! أنتى إتسرعتى.
ريم/ ممكن تقفلى الموضوع دة، أصلا أنا مكنتش عاوزة أكمل فى الشغل دة.
ميرال/ ليه يعنى؟؟
ريم/ نظرات وتصرفات إللى إسمه رفعت دة مكانتش مريحانى وماصدقت إن دة حصل أصلا المهم دلوقتى أنتى كويسة؟؟
ميرال/ أكدب عليكى لو قولتلك أيوة بس الحمد لله على كل حال.
ريم/ هو فى حد من البيت يعرف بالحوار إللى بيحصل معاكى دة؟؟
ميرال/ لا بتسألى ليه؟؟
ريم/ كنت هقولك ممكن يكون حد منهم عندة تفسير للى بيحصل معاكى دة.
ميرال/ ياريم أنا لو حكيت لبابا أو مروان أخويا على إللى بيحصلى هيقولوا عليا مجنونة، الموضوع دة بدأ معايا من خمس سنين تحديدا من يوم وفاة ماما شوفت قرينها وبعدها بعشر دقايق ماتت وأتكرر الموضوع مع خالتوا ومع مرات عمى وكذا حد وأنا بجد تعبت ومش عارفة أعمل إيه؟!!
ريم/ خلاص بطلى تفكير فى الموضوع دة دلوقتى وسبيها لله وأكيد إن شاء الله هيكون فى حل.
ميرال/ يارب.
ريم/ وصلنا أهو ياسيتى، يالا إطلعى خدى شاور وأرتاحى.
ميرال/ طب تعالى إطلعى معايا شوية.
ريم/ مش هينفع يدوب ألحق أروح عشان ماما ليها ميعاد مع الدكتور، خلى بالك من نفسك وأما تصحى طمنينى عليكى.
طلعت ميرال على شقتها وفتحت ولقت والدها موجود/ حبيبة بابا حمد الله على السلامة.
ميرال بتعب/ الله يسلمك ياحودة.
محمود/ راجعة بدرى من الشغل يعنى!! فى حاجة ولا إية؟؟
ميرال/ مفيش يابابا أنا إنطردت.
محمود/ إنطردتى!! ليه؟؟؟
فكرت ميرال ياترى لو أخبرت أبوها بالحقيقة هيصدقها؟؟ طب واقع الخبر علية هيكون عادى بعد مايعرف إللى بيحصل معاها؟؟
قاطع تفكيرها صوتة/ يابنتى بكلمك.
ميرال/ مفيش يابابا أصل إتخانقت مع واحد من الزبائن عشان كدة المدير طردنى.
محمود/ وتتخانقى مع الزبون ليه؟؟
ميرال/ أصله .. اصله عاكسنى.
محمود/ لأ دة كنتى تقلعى إللى برجلك وتضربيه بيه مش تتخانقى معاة بس على العموم متزعليش ياكتكوتى إن شاء الله هتلاقى شغل أحسن منه.
ميرال/ إن شاء الله يابابا عن إذنك هدخل أخد شاور وأنام شوية.
بالفعل دخلت ميرال أخدت شاور وكالعادة لم ينقطع حبل تفكيرها لحد ماتعبت ونامت.
§§§§§§§§
فى الليل...
بعد مارجعت ريم من عند الدكتور مع والدتها وأطمنت إنها نامت دخلت على غرفتها ومسكت فونها تقرأ رواية كعادتها قبل ماتنام، فضلت تقلب شويه وشدتها رواية معينة وكل ماتتعمق بقرأتها يتسع بؤبؤ عيونها بصدمة.
ريم لنفسها بصوت عالى/ مش .. مش ممكن مستحيل دة إزاى إزاى؟!!
بسرعة جابت رقم ميرال ورنت عليها وكانت لسه نايمة رنت عليها تانى لحد ماصحيت...
ميرال بنوم/ إيه يابنتى فى إية؟؟
ريم/ بقولك إية فوقى كدة عوزاكى تغسلى وشك وتعملى فنجان قهوة وتفتحى اللينك إللى هبعته ليكى دلوقتى حالا.
ميرال/ لينك إيه إللى هفتحة دلوقتى بس ياريم دة أنا ماصدقت أنام وبجد مش قادرة.
ريم/ طب معلش إستحملينى بس وإسمعى إللى بقولك علية مش هتخسرى حاجة.
ميرال/ هووووف حاضر هفتحة أهو.
بالفعل قفلت معاها وفتحت الواتس لقت اللينك ففتحتة وقرأت الرواية ومن شدة صدمتها مأخدتش بالها إن باب الغرفة بتاعتها بيخبط ووووووووو...
