أول ماوصل زياد إرتمى على السرير بتعب حس بوجود حركة غريبة جوة البيت قام أتعدل على السرير وفجأة ظهر قصادة ثعبان ضخم على رأسه تاج ملكى.
زياد/ ياعبد الله أقرأك السلام من الله بحق من بعث داوود وسليمان بالحق أخرج من هنا بسلام فلا تؤذينا ولا نؤذيك.
أول ما قال زياد الكلام دة أتحول الثعبان لشخص ملامحة بشرية ولابس تاج/ عجبتنى شجاعتك وإنك مخوفتش.
زياد/ وإيه إللى هيخلينى أخاف؟؟ مين أنت أصلا عشان أخاف منك؟؟ أنت مخلوق زيى زيك متقدرش تإذينى وحتى لو قدرت فأنت مجرد سبب لتنفيذ إرادة ربنا مش أكتر.
الجن/ حلوة الثقة فى الكلام رغم الهزة إللى جواك ورعشة قلبك إللى عيونك مش قادرة تداريها.
زياد/ أنت مين وعاوز منى إية؟؟
الجن/ أنا ولى العهد إبن ملك الجان شيفا.
زياد/ وياترى بقى إبن ملك الجان هيعوز من بشرى زيى أنا إية؟؟
شيفا/ ميرال تخصنى لأنها المعهودة وأن الأوان العهد يكمل ويتم.
زياد/ مستحيل، ميرال خلقت ليا وعلى إسمى وأنا إللى هحميها.
شيفا بضحكة مخيفة/ أنت .. أنت هتحميها منى أنا!! ياترى إزاى؟؟
زياد/ إزاى دى ميخصكش بس لو وصلت إنى أفديها بروحى عشان أخلصها منك هعمل كدة وأنا راضى بس متحققش هدفك.
شيفا وإنقلبت عيونه للسواد القاتم/ بلاش تتحدانى أنت مش قدى.
زياد بضحكة مستفزة/ لو مكنتش قدك وقادر عليك مكنتش ظهرتلى دلوقتى خصوصا إنك عارف إن خلاص ميرال بإيدى.
شيفا/ أنا ممكن أمحى وجودك بس قبل ما أخد روحك لازم أتلذذ بعذابك.
خرجت من عيون شيفا سهم على شكل ليزر وقرب من زياد إللى كان واقف زى مايكون متكتف ومش قادر يعمل حاجة وأول ما السهم قرب من صدر زياد ارتد على شيفا إللى أترسم الرعب على وشة وأختفى فورا.
فضل زياد يدور علية فى كل مكان وملقهوش وقتها خرج سلسلة لابسها من رقبته فيها خرزة وأفتكر الشخص إللى أهداه السلسلة دى وكان جدة والد أبوة...
F.B
زياد/ إزيك ياجدو وحشتنى أوى.
الجد زاهر/ وأنت كمان ياحبيبى ها البطل بتاعى عامل إية؟؟
زياد/ الحمد لله بس أنا زعلان منك أوى.
زاهر/ وأنا مقدرش على زعلك، بس ممكن أعرف صاحبى زعلان ليه؟؟
زياد/ النهاردة عيد ميلادى وأنت كنت أول واحد تقولى كل سنة وأنت طيب وتجيبلى هدية شكلك نسيت.
زاهر/ ودة معقول، يعنى حد ينسى عيد ميلاد أعز أصدقائه هديتك موجودة.
زياد بفرحة/ بجد!! طب فين؟؟
خرج زاهر سلسلة من علبة كانت على مكتبه عبارة عن جلد بس شكلها رقيق.
زياد بفرحة/ الله شكلها حلو أوى بس أنت ياجدو قولتلى إن حرام الرجالة تلبس سلاسل؟!!
زاهر/ دى حقيقة بس السلسلة دى مش هتفضل فى رقبتك مدى الحياة هيجى عليك يوم ومش هتحتاج ليها فيه.
زياد/ مش فاهم ياجدو؟؟
زاهر/ أنت مش قولتلى إنك بتحلم بكوابيس مرعبة وبتشوف تعبان ضخم بيقرب منك وعاوز يموتك؟؟
زياد/ أيوة كل يوم.
زاهر/ أهى السلسلة دى بقى مش هتخليك تشوف الأحلام دى تانى وكمان هتساعدك فى حاجة مهمة فى يوم من الأيام وبعدها تقدر تستغنى عنها، يمكن أنت مش هتفهم كلامى دلوقتى لكن مسيرك تعرفة بعدين لكن أوعدنى إنك مش تشيلها من رقبتك أبدا إتفقنا.
زياد/ إتفقنا.
Back
لاحظ زياد إن فيه رسوم غريبة ظهرت على جلد السلسلة والرسومات دى مكانتش موجودة قبل كدة قرر لما يروح عند محمود يحكيلة إللى حصل معاة وبالفعل أخد إللى محتاجن ورجع على القاهرة ولما وصل عند محمود حكى ليه الحكاية كلها.
محمود/ ممكن أشوف السلسلة؟؟
زياد/ طبعا أتفضل.
مسك محمود السلسلة وحس إنة شاف الرسومات قبل كدة، دخل على أوضته وجاب الكتاب وفتحة ولقى الرسومات إللى على السلسلة فى الكتاب فرح جدا وبص لزياد وقال/ دلوقتى بس فهمت أنت ليه الوحيد إللى هتقدر على شيفا.
زياد بإستغراب/ ليه؟!!
محمود/ الرسومات دى مش عادية دى خاصة بملك من ملوك الجان المسلم إللى هم الجن العلوى وإللى عندهم من القدرات إللى تفوق أضعاف إللى بيملكها الجان السلفى.
زياد/ أيوة بس أنا مش فاهم برضوا المفروض أستخدم السلسلة إزاى؟؟
محمود/ خد الكتاب دة إقرأه كويس وهتلاقى إجابة لسؤالك فيه بس دلوقتى خلينا نروح نشترى الشبكة.
بالفعل ذهبت ميرال برفقة أبوها وأخوها وريم ومامتها وأشتروا الشبكة ولبسها زياد ليها داخل المحل وقتها فقد شيفا واحدة من قواه بوجع وتأوه بص بغضب عليهم وعيونة على ريم لأنها كانت السبب الأول فى كشف ماهيتاب فإبسم بخبث وأختفى.
محمود/ مبارك ياولاد.
زياد وميرال/ الله يبارك فيك ياعمى.
ريم/ وأخيرا ياصاحبتى عشت وشوفتك عروسة وكمان هلبسك الفستان بإيدى.
ضحكت ميرال بفرحة لكن بسرعة تلاشت ضحكتها لما شافت قرين ريم.
ريم بإستغراب/ مالك يابنتى وشك أتغير كدة ليه؟!!
بصت ليها ميرال بعيون مدمعة وصرخت وهى بتاخدها فى حضنها/ لا لا مستحيل مش .. مش هسمح يحصلها حاجة لأ.
كان الكل بيبص ليها بإستغراب وهم مش فاهمين حاجة لكن ريم فهمت وهمست فى ودنها/ أنتى شايفة قرينى؟؟
ميرال بدأت تبكى بهيستريا وإتسائل الكل عن السبب لكن زياد غمض عيونة وشاف إن ميرال شافت قرين ريم وعلى الجنب التانى شاف شيفا بيبتسم ليه بخبث.
فتح زياد عيونه بسرعة لما شاف شيفا بيقرب منها وقف قصادها ومسك السلسلة وحطها قصادة فعجز شيفا إنه يقرب من ريم حاول يجيها من كل الجهات لكن فشل وإستسلم وقتها إختفى قرين ريم.
