الجوزاء والفيصل

البارت ٢٧

#الجوزاء_و_الفيصل
#روز_الفياض
#ح٢٧
.
.
.
إنَّما يُبتلى الإنسانُ لِيُهذَبَ لا لِيُعذَّب.
.
.
.
ام رعد :
شما مسويه كول مو شمسويه ...

فيصل :
احجي بالله خل نشوف شمسويه لان كلبي كارصني منها هالبنيه ..

ام رعد :
بس خاف تزعل مني ؟

فيصل :
ها يعني السالفة الها علاقه بيه ؟
بس شلون ازعل منج ..
اكو واحد يزعل من امه ..

ام رعد :
بعد روحي والله ..
اعرفك انه كلبك طيب وحنين ..
بس شنسوي للبخت ..

فيصل :
الحمدلله .

ام رعد :
تتذكر من رحت انه لبيت عزام وكلتلي امها ابوها ماقابل ؟

فيصل :
اي

ام رعد :
من رجعنه ماافتهمنه شي من وره كريم ..
اخذنه حاصل فاصل خو ..

تحسرت :
اتذكر .. شلون مااتذكر

ام رعد :
وره مارحت انت اجتني المره امها ..

كعدت عدل :
شتريد ؟

ام رعد :
اجت ماقبلت تطب البيت من الباب ومن وره خشمها كلتلي هاي الفلوس مال فيصل ..

فيصل :
فلوسيش ؟
يافلوس ؟

ام رعد :
انه هم سألتها فلوسيش خيه ؟
عبالي مداينهم لو شي كالت هو مو ودالنه مره مدري مرتين من شويت مينا عمليه ؟
كتلها اي ؟ كالت هن ذني ..

فيصل :
شنو معناه هذا الحجي ؟
ماجاي افتهم ؟
انه وديت الفلوس كلت الرجال مايلحك عده عايله بركبته وتكاليف علاجها هواي ..
ليش رجعوا الفلوس ؟

ام رعد :
انه بيني وبينك هم مثلك دخت ولاكدرت اكل للمره دخلي جوه نحجي وافتهم منها منا كريم خابصنه ويدردم ولا كدرت اخذ منها التفاصيل بالباب ..
راحت مني ..

فيصل :
ماافتهمت شي ..
وهالحجي شنو علاقته بسحيله ام الخلاجين ؟

ام رعد :
جايك الحجي جايك ..
جا مو انه شابعه ضيم وقهر ..
جا منين انجلطت انه غير من وره مصايبها وقهرها ..

فيصل :
الله يساعدج ويسامحه رعد ..
منين لكاها وحبها وجابها علينه ..

ام رعد :
حظه يدولب بي ..

فيصل :
اي بالله حظه يدولب بي ههههههه هالدولاب المصخم ورانه ورانه ..

ام رعد :
تسمع جايك الحجي ..
اسمع شمسويه ..

فيصل :
اي ..
كملي ..

ام رعد :
ثاني يوم كريم طلع والبس عبيتي واروحلهم للبيت دكيت الباب طلعت هاي البت الزغيره بيتهم ..

فيصل :
امم .

ام رعد :
وين امج ؟ كالت جوه دخلت انه كبل لكيت المره بالمطبخ جاي تطبخ من شافتني المره وجهها ثكل !!