𝒂𝒃𝒐𝒗𝒆 𝒂𝒍𝒍, 𝒅𝒐𝒏'𝒕 𝒍𝒐𝒔𝒆 𝒉𝒐𝒑𝒆 𝒊𝒏 𝒈𝒐𝒅.
- قبل كل شيء لا تفقد الأمل في الله.
🌹
🌹
🌹
#الجوزاء_و_الفيصل
#ح١
#روز_الفياض
.
.
.
قد يبقيك التفكير بشخصٍ ما يقضاً لليال عديدة رغم انك معجب بهِ مجرد اعجاب ..
فكيف لو كان حباً؟؟
يجعلك الحب تائهاً مشتتاً ضائعاً لاتعرف من انت وماذا تريد وماذا يجب ان تفعل ..
يجعلك مجنوناً في بعض الاحيان .
حنوناً
كريماً
عصبياً
وربما بارداً في بعض الاحيان
كل ذلك يختلف نسبياً من شخصٍ لاخر لكن الثابت في الحب انه يجعلك شخصاً آخر غير الذي تعرفه .
يجعلك مراهقاً حتى وان كنت في سن الخمسين او ستين عاماً ..
يجعلك عاشقاً مُتيماً ..
.
.
.
الصبح كعدت على صوت التليفون اتصل علي علي اخوي يكعدني حتى اوصلهم هو وعائلته للمطار يردون يرحون للعراق ..
علي :
شنو بعدك نايم ؟
فيصل :
اممم .. كعدت ..
علي :
كوم يمعود انت ساعة يالله تكعد وساعة بالحمام وساعة تلبس شوكت نروح يعني ؟
فيصل :
اي اي افتهمنه .
كعدت يلا ..
كعدت كوه نعسان اليوم عطلتي المفروض اشبع نوم بس لازم اكعد اوصل علي وعائلته للمطار ..
باوعت للساعة ماصارلي ساعة من رجعت نمت بعد الصلاة هسه شيرجعني للنوم اذا كعدت ... اففف .
غسلت وبدلت وانطلقت لبيت علي اللي ميبعد عن بيتي هواي دقايق بس لان احنه بنفس المنطقة .
السويد بهيج وقت بارده حيل فالجو مغيم وتحسه اظلم ويمكن راح تمطر ..
وصلت دكيت عليهم الباب محد فتحه ..
رجعت دكيته طلع علي :
كل هذا تغسل وتبدل ؟
فيصل :
الله اكبر شتريد عمي انت ؟
شصير سوبر مان هاي ماطولت حتى خمس دقايق شسوي بعد ؟
فتت للبيت نزلت نبأ زوجته :
صباح الخير .
فيصل :
صباح النور .
ام حسن رجلج مستعجل اليوم اذاني .
نبأ :
اذاك بس انت يعني ؟
اذانه كل احنه ؟
مستعجل على حر العراق والكهرباء والماي الخابط .
علي :
مااحب التأخير احب كل شي بوقته المضبوط تعرفوني .
نبأ :
ادري وينه التأخير ؟
بعد ٣ ساعات على موعد الطيارة !!
فيصل :
ديري بالج هناك من توصلون ، تره رجلج مو خالي هههه يجوز رايح يريد يتزوج ..
باوعلي علي وابتسم :
الله يسمع منك .
هيج واحد محتاج تجديد ويرجع شاب مرتب ويتونس ويجرب نوع ثاني من الفاكهة .
نبأ :
كون صدك ويسويها .
علي :
شتسوين يعني ؟
نبأ :
اخليك تكره كل انواع الفواكة لاخر عمرك .
فيصل :
هههههه كفووو .
عفيه بأم حسن .
علي :
تعال صعد الجنط وياي بالسيارة تعال ..
عوفها لاتروح تصدك انوب تكرع راسي .
صعدنه الجنط بعدين شربنه استكان جاي وطلعنه للمطار .
وصلتهم واتوادعنه رغم سفرتهم كصيره مدتها اسبوعين مو اكثر ..
رجعت للبيت حسيت بالوحشة رغم انه ساكن وحدي مو وياهم ورغم خواتي هم متزوجات بالسويد مو بس انه وعلي موجودين .
.
.
.
ماكدرت ارجع انام ومادام اليوم اجازه كمت خليت هدومي بالغسالة ونظفت المطبخ وبعدين رحت للسوبر ماركت تسوكت ورجعت اسوي غدا بسيط وسريع .
للظهر صليت وكعدت عالسجادة صافن الى ان دك التليفون وكمزت ..
