الجوزاء والفيصل

البارت ٢٠

#البارت__20                                                 

#الجوزاء_و_الفيصل
#روز_الفياض
#ح٢٠
.
.
.
كُن راضيًا، لن يُصيبك إلا نَصيبك.
.
.
.
خلال يومين بس حددنه الخطوبه حتى نلبس الحلقات ..
ابو مرتضى جان موجود هو وعائلته وبقية اهلها وانه بحدي ..

عبالك تايه اعرف كل الموجودين بس مااحسهم اهلي .

جنت خايف بصوره مو طبيعيه جنت خايف خاف اكو وراهم شي ليش هالاستعجال ؟!!

جان عدي احساس راويه تشبه بت خالتها الانخطبت قبل مده ..
احاول اقنع روحي الشكل مو مهم .
المهم الروح ..

وصلت كلهم موجودين رغم ابوها كال ماكو حفله بس مبدلين وكاشخين ..

سلمت ودخلت لكيتهم مسوين ديكورات وورد وكيكه مدري جم طابق !!!

خالي ؟؟
هاي السالفة صارت صدك يافيصل هالمره اين المفر ؟؟

دخلت امها والشيخ موجود ودخلت هي وره امها لابسه فستان وردي بسبط ولابسه نقابها !!!

كعدت يمي والشيخ عقدلنه على حسب الاصول وامها وخالتها يهلهلن ..

انه صافن افكر شو ماخلوني اشوفها بالاول ؟
مو لازم اشوفها كبل لانعقد ؟

عقدلنه الشيخ وراح وجابت الحلقات وطقم الماس لاشايفهن بحياتي ولامشتريهن !!!

لبستها واحتاريت شلون البسها العقد مدري الكلاده نقابها وين اوديه ؟؟

حست بيه هي مضيع صول جعابي ( كل شي مااعرف ) ..
ضحكت على كيف :
مو تلبسنياها عادي تره شافوه ..

فيصل :
الحمدلله ..
جا كون شافوه انت شوكت اشوفج ؟
شني هالنقاب مزروع زرع بوجهج ؟

راويه :
من يطلعون ولد عمي .

فيصل :
سهله ..

ابو راويه :
بما انه فيصل صار زوج راويه بشرع الله فراح اسويله وكاله هو بمكاني بالشغل شتحتاجون هو بمكاني ..
اثق بقراراته وحرصه عالعمل مثلما اثق بنفسي ..

اتفاجأت ..

فيصل :
حجي ، شالقصه !!
كلها شهر شهرين وترجع تمشي وتتحرك طبيعي ..
وهسه هم تكدر بس احنه نخاف عليك تتعب مو اكثر ..

ابو راويه :
لا قراري هذا اجه بعد تفكير طويل ومتأكد منه ..
هيج احسن حتى لايوميه تضطر تجيبلي الشغل للبيت ..

سكتت من شفت الوجوه انتفخت ( ضاجت ) ..
اخوانه وخواته جنهم ماراضين ومن حقهم لان مايعرفوني والظاهر الحجي مامشاورهم بالموضوع فتفاجأوا .

فجأة كلها انسحبت ..
عمامها اترخصوا وباركولنه بصوره بارده وطلعوا ..
وعمتها حتى ماباركتلنه ..
بس ابو مرتضى واهله باركولنه وكعدوا يمنه شويه ضحك وسوالف ....