الجوزاء والفيصل

البارت ٤٠

#الجوزاء_و_الفيصل
#روز_الفياض
#ح٤٠
.
.
.
.
يهنيال الگلوب التگدر اتعوف
وخيعون الچفوف التعرف اتصد

.
.
.

قررت اسافر بعدما تخلص الكعده العشائرية حتى لو مينا مااطتني جواب .
اخاف هناك عمام راويه يغدرون بيه ويجبرون راويه تتنازل عن حقها ..
وشغلي مناك متعطل صار اكثر من شهر ..

باجر الكعده والكل موجود عمامنه وخوالنه وكريم يقود الفريق وكل شوية يخطب بينه .

اندك الباب ...
طلع رعد ودخل هو وجارهم البيت البصفهم ابو مثنى .
السلام عليكم وعليكم السلام .
ابو مثنى :
هاي طلقه لكيناها زارفه ( ثاقبة الباب ) الخارجية مالتنه لكيناها ثاني يوم من انضرب فيصل ..

فيصل :
شجابها عدكم ؟

ابو مثنى :
انه بالبداية خفت احجي خفت من الطلايب والله بس مااطاني كلبي اظل ساكت وانتم باجر كعدتكم وذوله جايين كتاله مو تخويف ولا تصويب ..
كلت لازم اجي واكللكم ..

كريم :
يعني طلقتين طكوهن بفيصل والثالثه ماصابته ؟؟
ابو مثنى هاي الطلقه اطينياها وتروح وياي للمركز وتشهد حتى هم يقارنون الطلقه بالطلقات الطلعت من فيصل .

سعد :
ابو مثنى الله يخليك جا وين جنت صارلك اكثر من عشرين يوم جا انت مو جنت ويانه من جنه ندور عالطلقة الثانية الطلعت من بطن عمي وساعتين ندور لحدما لكيناها ليش ماكلت تره اكو وحده ثالثه لكيناها عدنه ؟؟

ابو مثنى :
خفت ياعمي ..
مابيه حيل الطلاب والمشاكل وهاي العالم ماتخاف الله بس لوما فيصل عزيز عدي جا ظليت ساكت ..

فيصل :
انعم الله عليك ابو مثنى ماقصرت ..

ابو مثنى :
لا انت عزيز عدي وصاحب فضل والله لهسه ندعيلك انه والمره لوما وكفتك ووكفت ابو رعد وعلي ويانه من احتاجيت ام مثنى العملية جا هسه ام مثنى ميته من زماان ..

فيصل :
هذا حق وواجب انتم اهلنه وعشرت عمر مو بس جيران واذا مانوكف وياهم بالشدات جا شني خانتنه ( شنو فائدتنه ) ..

ابو مثنى :
الف رحمة على روح امك وابوك ..

فيصل :
ويرحم والديك ..

ابو مثنى :
هذا الخير السويته بحياتك دفع عنك .. من اجينه للمستشفى وراك وشفناك كلنه مستحيل يعيش ..
ام مثنى كالت يشخر شخرت الموت .. ووجهه نگطة دم مابي ..
والله وبالله اربع تيام انت نايم ماتدري بالدنيا بس احنه الله شاهد الليل ما نايمينه وابو رعد وام رعد يدرون كل ساعة نجيهم لو نخابرهم شنو الاخبار؟ كعد لو بعد ؟
المره تصلي صلاة الليل وتدعي وانه اصلي وادعي ..
وكل واحد انت مفضل عليه يدعيلك انه متأكد ..

فيصل :
رحم الله والديك .. رحم الله والديك ..
هذا من فضل رب العالمين ..
بركة دعائكم ووكفتكم ماانساها ..