الجوزاء والفيصل

البارت ١٦

#البارت__16                                                 

#الجوزاء_والفيصل

#روز_الفياض

.
.
.
🌿**‏لحظة العَوّض
فقط ستفهم حِكمة
الأبواب المُغلَقة... **🌿
.
.
.
ماادري وين اروح ..
والمن اروح ؟؟
لاعدي اخوان ولاخوات هنا ، المن اروح ؟؟

وكفت عالشارع بحدي صافن عالسيارات محتار اروح لواحد من ولد عمي لو اروح لمنو ؟؟

اتذكرت صاحبي ..
عدي صاحب من ايام الطفولة كلش عزيز علي بس صار مرتين من اجي ماامر عليه ولا اتصل بي ..
خاف زحمه اروحله فجأة ..؟

اتعوذت من الشيطان وتنهدت حيل وحاجيت روحي بصوت عالي :
اكعد ..
اكعدد ..
يروح لصاحبه ..
وين رايح للعالم وشتكللهم بهالليل جاي ابات عدكم ..

اشرت بأيدي لتكسي وبدون كلام فتحت باب السيارة وصعدت .

السايق :
الله ابو بالخير ..

جريت نفس ورديت عليه :
الله ابو الخير والكرامة ..

مشى مسافة وسألني :
وين توصل ؟

ضحكت :
هههه ماادري وين اوصل تصدك ههههه .

السايق :
شنو جاي خطار ؟

فيصل :
اي والله جاي خطار ..

السايق :
وشلون يعوفونك تطلع بالليل ؟

فيصل :
زحمة ابات عد الناس ..
مااخذ راحتي .

السايق :
تفضل وياي ..

فيصل :
وين ؟

السايق :
للبيت ، ماعدنه احد بس انه والحجيه امي ..

فيصل :
جزاك الله خير وكثر الله خيركم دايم ان شاءالله .

السايق :
والله .

فيصل :
ماتقصر .. العراقيين معروفين بالطيب والكرم وحسن الضيافه ..
بس اريد توصلني لفندق هيج نظيف كون ومرتب .

السايق :
صار ..

اخذني لمنطقة بيها كذا فندق بس جانت فنادق تعبانه استسلمت وحجزت غرفه هن يومين ورايح اتحملهن شلون ماجان وارجع للسويد ..

دخلت للغرفة ذبيت جنطتي وبدلت ونمت بدون عشا .
لافكرت ولا اتذكرت ولا حاولت افسر الصار .

يمكن من كدما شفت مشاكل بحياتي تعبت من التفكير ووصلت مرحله مااهتم .

نمت بعمق ماحسيت بأي شي ولا انتبهت لاي صوت منا لثاني يوم من اذن اذان الظهر انتبهت !!!

كعدت دايخ من كدما نمت عبالي دنيا المغرب ..
اتفاجأت من شفت الساعة ب( ١٢ ) الظهر .

صليت ونزلت اشوفلي مطعم شي كلش احس روحي جوعان ..

نزلت جوه للبهو مال الفندق ( الريسبشن ) سألتهم اذا اكو مطعم قريب كالوا ماكو ..
بس اكو براس الشارع واحد يسوي لفات فلافل وكص ( شاورما ) طيبة ..