#الجوزاء_و_الفيصل
#روز_الفياض
#ح٥١
.
.
.
فَأنتِ القريبه بِكلْ ما أوتيتِ من بُعد
.
.
.
ماقبلت راويه اجي وراها لكندا ..
كلش ضجت بس علي جان من جانبها وظل يحجي عليه لان اصيح عليها
علي :
اطيها مجال اعتبرها زعلانه يااخي ..
فيصل :
هو منو اللازم يزعل انه لو هي ،؟
علي :
ماكو اي سبب لا انت تزعل ولا هي بس تره مهما كان هاي مرت ابوها مو معقولة تعوفها على فراش الموت وتجي !!!!
فيصل :
مو ماتت !!! بعد المن باقيه ؟
علي :
طول بالك ..
مو كنالك عقلهن زغير يردن الكلمة الحلوه يردن الرجال يجلب بيهن .. تره هي هسه يالله فرغلها الجو وتريد تحس بقيمتها ..
فيصل :
شني فرغلها الجو ؟
شتحس بقيمتها اكثر يعني ؟
شسوي اكثر بعد حتى تحس بقيمتها ؟
علي :
اي قبل جانت مينا موجوده ومرت ابوها موجوده وعمامها يوميه طلابه اطيها مجال ترتاح ..
لاتسويها ظلمه عاد تريدها اتحمل وحاول تقنعها ماتريدها كللها يابت الناس الله وياج لان انه ماعدي صبر ..
فيصل :
يعني انت لو بمكاني تتحمل ؟
علي :
اذا نبأ تسويها وتعوف علي الجهال غصبا عالخلفوني اتحمل خوما اتورط بالجهال هههههههه .
فيصل :
لا صدك والله اذا انت ونبأ شتسوي ؟
علي :
ولك جا شلون مااتحمل هسه احنه صحيح نتعارك ونحجي وتصير بينه مشاكل بس غير مرتي وام جهالي وعشرت عمر جا شني قابل اريدلي حجه !!!!
سافر علي بالليل وبقيت بحدي بليلتها خلصتها تدخين ..
للساعه بالاربعه الفجر انتبهت على روحي صدري قبط مااكدر اجر النفس ..
كمت اريد اتوضى مااكدر ..
حسيت روحي راح اموت ..
ردت اروح للمستشفى بس خفت اسوق السيارة وانه بهالحاله ..
نزلت كوه كعدت بالحديقه ..
ظليت اردد وبيني وبين روحي ( الم نشرح لك صدرك ) ..
بعدين ماادري شصار ..
فقدت الوعي لو شصار ماادري ..
فزيت الشمس عاليه ..
وانه عركان ...
ماداومت بيومها بس وديت مسج لراويه وكتبتلها كلمه وحده ( تعبان ).
خاف كل شي يصير وانه بحدي وابو مرتضى سافر وعلي سافر ومحد يمي بس الخدامه .
خلصت اليوم اكح بعدين اخذت تكسي ورحت للمستشفى خلولي اوكسجين لمدة ساعه ورجعت خليت التليفون صامت ونمت ..
كعدت العصر سويتلي استكانة جاي وفتحت التليفون لكيت عشرين مكالمة من راويه وخمسه من نبأ وتلاثه من كريم ..
وسعد هم مخابرني تلث مرات !!!!
احتاريت ادك على ياهو بيهم !!!!
بعدني افكر واتصلت راويه تصرخ وتبجي :
الو ..
الو ..
فيصل ..؟
الو
