معك يا غيم غيثي لو يفنى العمر

البَارت الواحد والثلاثين

البارت الواحد والثلاثين

.

.

.
< اللهم بلغنا مانتمناه >

<الدمام>

صحت من النوم وكالعاده مو موجود ماتفرق معها لانهم باقي اصلًا في نقطة الصفر لا تقدموا خطوة ولا رجعوا خطوة قامت تتوضأ وفرشت سجادتها تدعي ربي ييسر لها ويرزق لها ولد الحلال

خلّصت لبست جلابية ساترة ونزلت
جنان بهدوء: السلام عليكم ورحمة الله وبركاته
منيرة: هلا يابنيّتي وعليكم السلام و رحمة الله
فاطمة: وين هادي؟
جنان بعدم معرفة: والله ياخاله ماادري
فاطمة: شلون تسذا ماتعرفين محل رجلتس اتصلي عليه شوفي لو يبي غدا ترى ماحسبنا حسابكم
منيرة: الخير واجد يابنت اختي الخير واجد

جنان تضايقت ورفعت جوالها تدق عليه: السلام عليكم
هادي: ياهلا وعليكم السلام
جنان بهدوء: وينك؟
هادي: جاي تبين شيء؟
جنان: لابس مشتهي شيء عالغداء
هادي ضحك بخفة: يعني عادي ؟
جنان ابتسمت: لو اعرف تبشر
هادي: مشتهي عريكة
جنان بعفوية: وش تتوحم انت
هادي انصرع يضحك: حلوه يالورع بس لا تعيدينها
جنان: طيب يلا معسلامة -لفّت عليهم- ياخاله فيه تمر؟

فاطمة: ما ادري
منيرة: فيه با بنيّتي وش بتسوين؟
جنان: عريكة

دخل الجد احمد وولده ناصر
ناصر بلذاذة: اسمع عريكة
الجد احمد: لنا الله اخر مره كليتها يوم رحنا حلّة آل زيد
جنان: الحين تجيكم ألذ عريكة

قامت للمطبخ ولفّت منيرة لـ فاطمة: فطيم وش ذي الحركات؟
فاطمة: ياخاله ما بلعتهها
ناصر: فاطمة عدلي حركاتس معها يعني بالله لو ما بلعتيها بتغيرين شيء؟
منيرة: تقبلي الوضع واعتقي البنت
الجد احمد: الواضح انها بنت حسب ونسب

هناء جت تركض: اهليين -باست راس جدها وجدتها وضمّت ابوها- وحشتني بابا
ناصر ابتسم يضمها: ما يوحشتس غالي
هناء: وين زوجة اخوي؟
منيرة بحدة: وش تبين بها؟
هناء: ما صدقت على الله ويكون فيه بنت صغيرة معي خلوني اسولف معها
الجد احمد: سولفي يابنيتي بس لا تغثينها
هناء:من عيوني

قامت للمطبخ وبابتسامة: اساعدك بشيء؟
جنان لفّت: لا حبيبي شكرًا
هناء تقدمت تجلس على دولاب المطبخ: وش تسوين؟
جنان: عريكة تحبينها؟
هناء: ماقد ذقتها بس بذوقها على عشانك
جنان: الله يرفع قدرك -بفضول- في اي صف انتي؟
هناء: اولى ثانوي وانتي؟
جنان ضحكت بخفّة: خلصت الحمدالله
هناء بصدمة: حتى جامعه؟
جنان: لا مادرست جامعه
هناء: افا ليه؟
جنان: ماكان فيه احد يوديني
هناء ببراءة: الحين قولي لـ هادي و يوديك
جنان: ان شاء الله
هناء: عندك اخوان؟ امك وابوك وين
جنان: عندي اخت اسمها جمان -بغصة- واخوي اسمه جمال كلهم بنجران بس اختي متزوجة وابوي متوفي
هناء بحزن: اسفه والله
جنان ابتسمت بحنية: عادي عيوني ماكنتي تدرين-صفقت- وكذا خلصنا