يوم جديد للعشق

٢٠

كان قاعد يراجع الأسئلة قبل لا يبتدون تصوير اليوم كانت الحلقة المفروض سهلة و الضيفة كانت متخصصة في شؤون تطوير الذات، موضوع بالنسبة له تافه وما يهمه لأنها كان دايماً يشوف ان حياته ماشية صح و قرارته و تصرفاته صحيحة وما يحتاج حد يعدلها له او يطورها، فكان في عقله قاعد يهدي نفسه عشان ما يدمر الحلقة "فهد لا تشتط هدي أعصابك"
بس الضيفة الي قعدت قدامه و إبتسامة جانبية ارتسمت على وجهها كانت بإختصار مستفزة هو يدري وفاهم ايش كانت قاعدة تسوي و ايش ناوية تسوي، كانت قاعدة تحاول تحلله هو شخصياً وتشخصن الأمور من البداية معاه، فهم انها تبي تركب التريند على حساب برنامجه وتطلع منه ردة فعل وتستفزه ولكن هو كان ما يبي يعطيها الي تبيه!
"بنبدأ تصوير وتسجيل"
جاهم النداء فعدل نفسه وبدا يرحب و يعرف بالضيفة "الأخت الجوهرة جاسم خبيرة في تطوير الذات و صاحبة منصة ذاتي"
كان في البداية كل شي ما شي صح لأن المحاور الي كانت عن الضيفة و خبرتها و منصتها و لكن لمن تعمقوا في التفاصيل حاولت تشخصن الأمور مثل انها سألته وهالشي خارج المحاور المتفق عليها
"أخ فهد انت تعتبر نفسك شخص إنفعالي بالطبيعة ولا لسبب معين؟"
"خلينا نركز على الموضوع أكثر لأن أحنا حابين ان يستفيدون مشاهدينا من خبراتج" قالها برباطة جأش وإبتسامة هادية رسمها بصعوبة
و لكن هالرد سكتها بشكل مؤقت لأنها بعد كن محور بدت تتمادى  تتعدى حدودها الي لاحظها الكل
"بالحديث عن الآخرين حابة أبارك لك أخوي بمناسبة خطبتك"
استفزته الجملة ولكنه تمالك نفسه ورد بهدوء "الله يبارك فيج، نرجع للمحور"
"بس فعلاً من بعد حلقتك مع الدكتور عبدالله أنا قلت مستحيل شخص مثلك يرتبط بحياته، وايد صعب من فهمي لشخصيتك و ردة فعلك في ذيك الحلقة"
"بالحديث عن تحليل شخصيات الناس هل يكون من خلال مقابلة شفتيها بالتلفزيون او سمعتيها ببودكاست؟ ممكن تكلمينا أكثر عن هالجانب عند خبراء تطوير الذات؟"
هو لمن قط هالجملة لقاها تركد و تهدا شوي لأنها حست ان الموضوع قلب ضدها!
ما صدق انه خلص الحلقة معاها و ودعها و بعدها سو إجتماع عاجل !
"من المسؤول عن البحث في خلفية الضيفة؟" سأل بإنزعاج
"أنا" رد واحد من الموظفين بإرتباك و كمل:" بس ما كنت متوقع كلش انها راح تتصرف هالتصرف ما كان ضمن الإتفاق"
"انزين الحين لازم تخففون نبرة المقابلة لأن ما بيكون في صالح برنامجنا " قال بإنزعاج
فجاة لقى مديره يدخل و هو يقول:" ليش نخففها بالعكس بتكون في صالحنا"
"بس أحنا مش هدفنا نركب التريند بهالطريقة وعفواً على هالكلمة الرخيصة، و انت قلتها احنا نبني ما نهدم" قال بإنفعال
"ما كان هاي رايك بحلقة الدكتور عبدالله و كان عادي تدخل وجهة نظرك و تطلع عن الموضوعية، و الجمهور حب هالجانب فيك و هذا حسب آخر تقرير رصدناه " قال مديره ببرود قدام الكل
هالشي استفزه! وهذا كان فهد؛ فهد الي يمشي بمزاجه و الي ما يرضى على نفسه، خذ دقيقتين عشان يرتب بعقله الي بيسويه لأنه كان موال يرن بعقله و لكن خلاه لأسباب كثيرة منها ان ما يحب يترك شي هو حط جهده فيه
"خلاص تبون تطلعونها طلعوها مثل ما تحبون و أنا ما بكون مسؤول عن شي" قال بهدوء
لقى مديره يبتسم بإنتصار و اهني كمل وهو يطالع مباشرةً في وجه مديره الي ما عرف يحترمه قدام الموظفين:" أنا مستقيل، خلال ساعة توصلك ورقتي"