Expensive Millionaire [Ongoing]

Part-10 (Unicode)

"အခု လျှောက်လှမ်းလာတဲ့ ညီငယ်လေးကတော့ အင်္ဂလိပ်စာဘာသာအထူးပြုမှ မောင်ရဲရင့်သွေးတည် ပဲဖြစ်ပါတယ်ခင်ဗျာ...။"

ဖြောင်း! ဖြောင်း! ဖြောင်း!

MC ၏အသံဆုံးသည်နှင့် ကျောင်းသားများ၏ လက်ခုပ်သံများကလည်း တစ်ပြိုင်နက်တည်းထွက်ပေါ်လာကြသည်။ရဲသွေးကလည်း လျှောက်လမ်းတစ်လျှောက်တွင် စတိုင်လ်ကျကျလျှောက်လာပြီးသည့်နောက် stage ပေါ်သို့တက်သည်။ထိုအခါ ကျောင်းသူများ၏အသံများကလည်း ထွက်ပေါ်လာကြ၏။

"ရဲသွေး!.. ရဲသွေး!...။"

"ရဲသွေး!.. ရဲသွေး!...။"

ရဲသွေးက သွားပေါ်သည်အထိ ပြုံးပြလိုက်လျှင် ကျောင်းသူများ၏အသံများသည် ပို၍ကျယ်လာ၏။

MC ကလည်း နောက်ထပ် မောင်သစ်လွင်များကိုကြိုဆိုဖိတ်ခေါ်သည်။အချိန်တစ်ခုကြာပြီးသည့်နောက် အထူးပြုဘာသာရပ်အလိုက် ရွေးချယ်ထားကြသည့် King Selection အားလုံး
စုံလင်သွားလေပြီ။

ယခုသည် MUFL(Mandalay University of Foreign Language)၏ မောင်မယ်သစ်လွင်ကြိုဆိုပွဲ
အခမ်းအနားဖြစ်သည်။အခန်းအနားအတွင်းတွင် ကျောင်း၏
ပါမောက္ခချုပ်ကြီးနှင့်အတူ ဒုပါမောက္ခချုပ်များ၊ဌာနအသီးသီးမှ
ဌာနမှူးများ၊သင်ကြားရေး ဆရာ၊ဆရာမများလည်းရှိနေကြသည်။
MC အဖြစ် တာဝန်ယူထားသူများကတော့ စတုတ္ထနှစ်မှ စီနီယာကျောင်းသားနှင့်ကျောင်းသူတို့ဖြစ်သည်။

အစီအစဉ် အဆင့်ဆင့်ကိုဖြတ်ကျော်လာပြီးသည့်နောက် ယခုစာသင်နှစ်၏ မောင်မယ်သစ်လွင်များကိုရွေးချယ်တော့မည့်အစီအစဉ်ဖြစ်သည်။ထို့ကြောင့် ပရိသတ်များ၏အသံများကလည်း တစ်ဟုန်ထိုးပေါ်ထွက်နေကြတာဖြစ်သည်။

"ဆက်လက်ပြီး အခုအစီအစဉ်ကတော့ King Selection များရဲ့ တစ်ဦးချင်းသရုပ်ပြခြင်း အစီအစဉ်ပဲဖြစ်ပါတယ်ခင်ဗျာ။King selection ညီငယ်လေးများရဲ့ သရုပ်ပြမှုများကို ရှုစားအားပေးကြပါအုံးခင်ဗျာ.....။"

MC ၏ အသံဆုံးသွားသည်နှင့် မြူးကြွသည့်သံစဉ်ကထွက်ပေါ်လာသည်။ထိုအခါ သတ်မှတ်ထားသည့်အတိုင်း king selection များက တစ်ဦးချင်းစီ သရုပ်ပြကြ၏။