__ مور مافات نهار طويل تاع لقراية و امتحانات .. ليوم اخر امتحان تهنات و حست عبئ ثقيل خفاف عليها اخيرا داو عطلة صيف و راح تريح .. كانت قاعدة في بيتها قدام لاكوافوز تاعها تعدل فلمكياج تاعها .. هي اصلا شابة و لمكياج زاد حلاها كثر .. كلشي فيها شباب شعرها ذهبي طويل و بشرتها بيضة كيف تاع لبيبي .. و عندها لاطاي ضريفة مامعمرة بزاف ما رقيقة بزاف .. شوية قصيرة ، كملت لمسة الاخيرة و رشت بارفان على روحها لابسة غوب فنواغ فخمة و سامبل تهبل .. و طالون يلمع .. تبسمت تشوف في روحها ..
_ متوقعتش يطلع مني هذا ..
رفدت ساكها صغير لي ايضا كان يلمع .. هودت بشوية باش تلقى باباها و مرته قاعدين ، شافها باباها تبسم معاها و وقف : هاي كملت لابرانسيس..
ضحكت بشوية و دارت على روحها توريلهم فلوك : كيف جيت ؟
نطقت مرت باباها بلطف : تهبلي كي لعادة حبيبتي .. عمر على حساب شوفة ليوم يخطفولك بنتك ..
لز بنته لعنده و عنقها : حد مايدي بنتي ، مانمدهاش لاي واحد كان
نطقت بسخرية : حاب تخليني بايرة ؟
شافت فيها مرت باباها و نطقت تضحك : لا كامل وحدة كيفك و تقعد بايرة !
قالت بثقة تتبسم : باينة هادي اسيا ..
شاف باباها فساعة لي في يده و قال خفيف : هيا ازربو باش نجيو فلوقت ..
خرجو ملفيلا لي ساكنين فيها و ركبو فطوموبيل و ديماراو ، كانت تشوف فتاقة ساهية و متحمسة افكارها دايتها وين ملازمش تخمم ...
شوية و وصلو خرجو مطومبيل داخلين بكل فخامة و هي فوسط باباها و مرت باباها كي لوردة كامل يشوفو فيها جمالها لفت انتباهم ..
وصلو للباب مدو لي كارط تاع دعوة للحراس و دخلو .. لقاو طابلة فارغة وقفو قدامها كان كلشي شباب و فخم .. الاضواو لملونة و طابلة لكبيرة مزينة بكامل انواع لماكلة و لحلويات و مشروبات ..الناس كامل لاباس بيهم .. نطقت شاردة : كلشي شباب ..
نطقت اسيا : طبعا كلشي يجي شباب هاذو من اغنى ناس هنا فلمدينة
ردت عليها تضحك : باينة هه
رد عليها باباها : مشي منذر لي يدير عيد ميلاد لبنته بحاجة بسيطة هه
عقدت حواجبها : كيما نتا !
نطقت اسيا : سناي يلحق عيد ميلادك و تفرجي واش راح يديرلك باباك ..
جات تنطق ولات سكتت كي لمحاته ملبعيد .. لابس كوستيم فنواغ يهبل .. قاعد مع صاحبه يحكيو و يضحكو .. قلبها قعد يضرب و ملامحها تبدلو للحماس .. قطعلها تفكيرها كي جا واحد و مراة لطابلة ..
_ اووه عمر صاحبي ..
عمر : كيراكم لاباس
_ والله الحمدلله و نتوما
عمر : حمدلله ياربي ..
نطقت لمراة بهدوء تتبسم : مرحبا بيكم شرفتونا ..
ردت عليها اسيا تضحك : الله يسلمك نورا ، كلشي جا شباب مشاء الله ..
نورا : يسلمك اختي ..
دارت تشوف في نيهاد لي كانت غير تشوف و تتبسم : وشراكي نيهاد مكيش تباني هاذ ليامات ..
نيهاد : لاباس طاطا ، كي عارفة قراية ..
منذر : زيري روحكي بنتي باش تخرجي كي باباك ..
عمر : ايه بنت باباها هه
كملو يحكيو و يڨسرو و نيهاد تشوف فيهم منساجمين فلحكا هما صحاب من بكري ملي كانت يماها حية تربطهم شركتهم لي شركاء فيها بصح هيا صغيرة ممخلطاش روحها معاهم و قليل وين تلقاهم ابار فلمناسابات ، حست بلملل حبت دور شوية فلجاردان ، رفدت صاكها و نطقت : شي بابا .. راني منا ندور شوية و نرجع ..
عمر : ايه روحي ..
منذر : خذي راحتك ، تحبي تروحي عند لبنات راهم ملهيه ..
هزت راسها ايه تتبسم و راحت مع انو متحبش تخالط روحهها بزاف و كامل لي هنا كبار عليها و مامداسرتهمش ، وصلت لوين صور يطل على منظر شباب لمدينة مع ليل ضواو ماد منظر يهبل قعدت شاردة فيه و نسمة لهوا تضربها لوجهها باردة ، ولات دارت مدت ظهرها لصور مستاندة عليه شافت واحد جاي رافد مشروبات و جي ، رفدت كاس جي رشفت منه و تشوف ، لبنات دايرين مجموعات و قاعدين يضحكو و فوسطهم بنت منذر صاحبة لعيد ميلاد ، لمحتها ملبعيد جات عينها فعينيها تبسمت معاها ، مبعد شافتها نايضة جاية عندها ، عدلت وقفتها و تبسمت بلطف ..
نيهاد : سلام ميساء ..
ميساء : وشراكي صافا ..
نيهاد : حمدلله ، عيد ميلاد سعيد عقبة 100 سنة نشالله ..
ميساء : مرسي حبيبتي .. وشبيك قاعدة وحدك هنا هيا معانا ..
شافت نيهاد فصحاباتها و لات شافت فيها ترددت هي فصح حشامة و متحبش تخالط خاصة كي مشي فلاج تاعها صغيرة فيهم في عمرها 23 سنة و هي عاد 17 ... حلت صاكها جبدت ساشي صغير شباب و مدتهلها ..
نيهاد : كادو صغير مني نشالله يعجبك
تبسمت ميساء و حكماته عليها : ياعمري صحيتي .. اكيد راح يعجبني ..
حلت صاشي لقات باطة صغيرة تلمع حلتها و نطقت : اول كادو راح نفتحه ههه
تبسمت معاها نيهاد بلطف و بقات تسنا ردت فعلها
حلت لباطة لقات بارير تاع ذهب سنسلة بموتيف شباب تاع فراشة مع خاتم و براسلي ..
تلاحت عليها عنقتها : شابييين يهبلووو ..
ضحكت نيهاد : فرحت لي عجبوك ..
حكمت ميساء يدها و جرتها بحماس : هيا معايا عند لبنات نعرفك بيهم ..
VOUS LISEZ
_ لعنة الحياة _ ﴿ اللهجة الجزائرية ﴾
Short Story... مرات الانسان يتصادف بصوالح في حياتو جامي يتوقعها ، اذا كان الحب من طرف واحد مراحش تتخيل انو راح يجي نهار و يتحقق حلمك .. مي ايضا مراحش تتخيل كيفاه راح تنقلب حياتك مور مايتحقق هاذ الحلم البسيط ..
