نيهاد بدات تحس لهدرة تجيها ملبعيد و مولاتش مفهومة ، عينيها وساعو و قعدو دموع ينزلو وحدهم مبقاتش تسمع ، شدت فلحيط مامستوعباش واش تسمع .. حطت ليد زاوجة على فمها تمنع صوتها يخرج .. ولات تتمشى بخطوات ثقال تبكي ساكتة غايضتها عمرها ، كيفاه دارولها هاك !! معندهمش ضمير ؟؟ .. قعدت شادة فلحيط تحاول توصل خفيف لطابلة قبل مايشوفوها ...
هيا ماشية حتا سمعتهم خرجو نتفضت و دارت .. لقاتهم يشوفو فيها بحيرة ..
نورا : نيهاد ؟
كاترين قعدت تغزر فيها بتسوميم اما نيهاد قاعدة تشوف فيهم مشوكية مفاهمة والو .. معارفاش واش دير ؟ .. بلعت ريقها تشوف فيهم ..
نورا توترت خايفة يلا تكون سمعتهم مي كي خمت مع روحها اذا سمعتهم مراحش تكون هادية هكذا !
نورا : راكي مليحة !!
قالتها تشوف فنيهاد بتردد .. نيهاد هزت راسها ايه مشوكية ...
نيهاد : كنت جاية ل .. لصال دو بان ..
قالتها و تعداتهم دخلت و بلعت لباب وراهم ..
شافت نورا فكاترين بحدة .. اما كاترين راحت لطابلة تتعوج و نورا وراها .. قعدو فبلايصهم عبدو يشوف فطبسيه كاره لقعدة لي فيها كاترين ، نطقت ميساء
ميساء : راكي مليحة كاترين ؟
هزت كاترين راسها ايه تتظاهر باللطف ..
كاترين : ايه يبالي خلطت فلماكلة بزاف ..
منذر : معليش بنتي طبيعة الانسان ..
هزت راسها ايه تتبسم و نورا قاعدة تغزر بحدة مبعد نتابهت لعبدو لي حساته حاس بلملل يقلب فطبسيه .. تنهدت و كملت تاكل بهدوء ..
قاعدة تبكي تشوف فروحهها فلمراية .. حاكمتها قنطة ..
نيهاد : كيفااه هاذي كاترين حامل من عبدو !! كيفاه صرا هاذ شي ؟ ...
قالتها بهمس تبكي تشوف في روحهها ..
عدات يديها على شعرها تهدن روحهها .. مسحت دموعها .. قعدت تخمم قررت تتظاهر معلابالها بوالو و تحكي مع عبدو..
عدلت غوجالاف و غيسيل .. تنهدت و حلت لباب ولات بخطوات ثقال لطابلة .. قعدت في بلاصتها تشوف في نورا مبعد في عبدو .. لعبو عليها فزوج ! داروها طريق باش يسترو فعلة عبدو !! كانو قادرين يصارحوها من الاول .. تنهدت ..
نورا : حقاا عبدو ..
شاف فيها عبدو يسناها تحكي ..
نورا : جداتك راها جايا هاذ سيمانة ..
مسح منذر فمه بسربيتة و ميساء حطت لمغرف من يديها تركز فهضرتهم ..
عبدو : صح !!
منذر : ايه حكيت معاها ليوم مي كاينة حاجة ..
عبدو : واش ؟
منذر : راك عارفها محضرتش لعرسك ..
عبدو : ايه ماني مسكينة تكون حالفة فيا ؟
قالها يضحك بسخرية ..
منذر : ايه باينة .. علابيها قالت راح نمشيو كامل عندها نقضيو معاها يامات راك عارفها متقدرش تقعد وحدها راح يمشي عمك و ولاده و قالتنا لينا تانيك بصح ركزت عليك كثر نتا و مرتك قالت حابة تقضيو معاها يمات ..
عبدو : ايه نمشيو باينة .. بصح منقدروش نقعدو شحال من يوم !
نورا : عبدوو .. راك عارف مانك كي تقول حاجة ...
عبدو : ايه منعرفهاش ؟
قالها يضحك حتى نطقت ميساء بحماس ..
ميساء : علامة نفوتو يامات شابين نكونو كامل متلايمين ..
شاف عبدو فنيهاد لي لقاها سارحة تشوف فطبسيها تلعب بلمغرف تبان مشوكية !
عبدو : نيهاد واش رايك ؟
قعدت سارحة منتبهتلهش شافت نورا فكاترين لي كانت تحكي مع ميساء ..
عبدو : نيهاد ..
نتابهتله و شافت فيه حطت لمغرف ..
نيهاد : اه !
عبدو : وشبيك هه ؟
نيهاد : واش ؟
عبدو : راح نمشيو عند ماني نقضيو يامات معاها يكونو كامل لافامي تم ، واش رايك ؟
نيهاد مفهمتش كامل واش قال ..
نيهاد : ايه ايه صحا ..
قالتها باش ميزيدش فلهضرة معاها ..
هز راسه ايه ..
نيهاد : عبدو نمشيو ؟
نورا حست بيها بلي تبدلت بين دقيقة عقدت حواجبها ..
نورا : صايي بعدا ؟
نيهاد هزت راسها ايه ببرود تشوف فعبدو ..
كاترين : مزال ماكملت سهرة !
غزرت فيها نيهاد بحدة .. كامل نتابهولها ..
منذر: علاه يخي مصرا والو ؟
نيهاد : لا عمو منذر ، جيست كرشي راها توجعني بزاف و زيد هذا هو لوقت .. مرسي عل كلشي ..
قعد عبدو يشوف فيها .. حسها تبدلت .. ساعفها و نطق ..
عبدو : ايه كيما تحبي هيا ..
VOUS LISEZ
_ لعنة الحياة _ ﴿ اللهجة الجزائرية ﴾
Short Story... مرات الانسان يتصادف بصوالح في حياتو جامي يتوقعها ، اذا كان الحب من طرف واحد مراحش تتخيل انو راح يجي نهار و يتحقق حلمك .. مي ايضا مراحش تتخيل كيفاه راح تنقلب حياتك مور مايتحقق هاذ الحلم البسيط ..
