_ لعنة الحياة _ ﴿ اللهجة الجزائرية ﴾

_06_

نيهاد :

شوية هكا سمعنا لاصونات تاع لباب ... قبل ما نوض ناضت اميمة ..
اميمة : دوك انا نحل ..

راحت اميمة حتى نطقت ليلى ..
ليلى: حابة نشوف ردة فعلها كي تشوفك ..

قالتها بمرح شفت فاكرام لقيتها تتبسم بخبث و تغزر فيا ! ...

درت شفت للجيهة الاخرى شفت اميمة جاية و كاترين وراها .. وقفت نرحب بيها .. جات عيني فعينها تبسمت معاها .. مي .. وشبيها ؟ وجهها صفار ! تسمرت في بلاصتها مدهوشة ؟ قاعدة تغزر فيا ب .. بحقد !! على كل .. تقدمت عندها و نطقت مقدرتش نهضر معاها بظرافة .. نطقت بهدوء ..

_ مرحبا بيك تفضلي ..
هزت راسها ايه باقيا تغزر في عينيا بحقد ..
كاترين : يزيد من فضلك ..

ولات شافت فيا ملفوق للتحت و تبسمت بسخرية تشوف فلبنات و نطقت باستهزاء

كاترين : متقولوليش هاذي لي داها عبدو !! كنتو مخبيينها علينا حسبت كاش طفلة نادرة ..

كيفااه ! باقيلي شعرة و نوض نشنشفها من شعرها مايهمني لا كبيرة عليا لا راني عروسة جديدة ! واش معنتها هاد لجاست لي دارته ؟ تنهدت و تبسمت في وجهها نحاول نتمالك فاعصابي ..

_ علاه يمكن عبدو محبش يطلق لهضرة ياخي لعين لحق ..

قلتها باستفزاز حسيتها ضايفت راحت تتمشى و تتلوى و قعدت فصالون حتى نطقت ميساء
ميساء : واش راكي نتي مكيش تباني ياخي مكان والو ؟

كاترين : مدام صحبتي توحشتني كامل هاك دوك نجي نقعد معاك سيمانة

ميساء : امم امنتك شحال قلتيلي من مرة هاذ لهضرة ؟

اكرام : مام انا دايمن تعاودلي هاذ لهضرة ..

رحت قعدت فصالون و قعدت ساكتة مبعد شافت فيا كاترين بتخوبيث و نظراتها لمسمومة !

كاترين : اييه نيهاد ، والفتي شوية ؟ كيف جاتك لعيشة هنا ..

غزرت فيها و حطيت رجل فوق رجل و تبسمت ..
_ من جيهة واش لعيشة ؟
طلعت حاجبها ليسر و كملت ..
كاترين : من جيهة دار من جيهة عبدو ..

_ بصراحة والفت يعني من جيهة دار كلشي شباب كيما راكي تشوفي عبدو عرف يخير ..

نطقت ميساء تضحك ..
ميساء : ايه يعرف يخير فدار كنا نتكلو غير عليه فهاد صوالح ..

تبسمت معاها بلطف حتى نطقت اكرام تغزر فظفريها ...
اكرام : معندهش ذوق فبعض صوالح ..

كتمت كاترين ضحكتها تشوف فيها ... استغفر الله .. واش ندير دروك .. نوض نشنشفها ! ولا نزيد نتمالك روحي و منخسرش ! ... اوك نستعمل الخيار زاوج ..
نطقت لاكرام

_ ايه واش راه عصام ملي تزوجت مزادش بان ..

ضحكت اكرام باستهزاء
اكرام : عصام ! راه مع لخدمة و لبنات راكي شايفة راه داخلها غي من طفلة لاخرى ..