مور لمغرب .. عبدو كان فشركة فشغله مع باباه و عمه كان فشركته خاصة ...
اما هي ... واقفة فسطح صغير لي اونفاص للصالة لكبيرة فوقانية ... قاعدة تطل على لغابة و شجر و جاردان تاعهم لكبير .... ضربة نسمة خفيفة باردة خلات خصلات شعرها تتحرك .. قاعدة تتفكر فذكرياتها مع باباها ... كيفاه تبدل كلشي بين ليلة و نهار ... راح تفكيرها مرة اخرى لعبدو .. خذات نفس عميق ..... كمشت يديها فبعضهم .. لهوا بارد بزااف .. مراهش لابسة مليح اصلا ... قعدت تشوف ساهية حتى سمعت خطوات وراها دارت شافت ... رخات ملامحها كي شافتها ..
جدة : واش ديري هنا وحدك فهاذ لبرد ؟
دارت كملت تشوف ..
نيهاد : شي ... نريح راسي برك ..
قدمت لجدة و سندت روحهها مام هي تشوف ..
جدة : من واش تريحيه ؟
نيهاد : تقدري تقولي من مشاكل دنيا ..
ضحكت جدة على جنب باستهزاء ..
جدة : واش من مشاكل ياطفلة ؟ شحال في عمرك نتي ؟
نطقت بصوت هادي بلا ماتشوف فيها ..
نيهاد : رايحة نقفل 18 ..
طلعت جدة حواجبها مخلوعة و شافت فيها ..
جدة : صغيرة بزااف !!
ضحكت نيهاد باستهزاء ...
جدة : كيفاه تعرفتي على لهامل تاع عبدو ؟؟
نيهاد : نعرفو ملي كنت صغيرة ..
طلعت جدة حواجبها تشوف فيها ردت عليها نيهاد خفيف ..
نيهاد : ي .. يعني نعرفو ملبعيد برك ! كيما تعرفي بابا الله يرحمو كان يخدم مع عمو منذر فنفس شركة .. كنا نجتامعو فلمناسبات برك .. بصح بابا كان صاحب عمو منذر ..
هزت جدة راسها ايه فاهمة ..
جدة : ايه ايه قالي منذر ... و عبدو كيفاه حتى داك ؟
تحجرو عينيها بدموع ... كلما تتفكر بلي داروها طريق تحب تنفجر ... حكمت فدموعها و ردت بلا ماتغزر فيها .. تشوف برك فلمنظر ..
نيهاد : عجبت طاطا نورا خطبوني و انا قبلت .. هاذي هيا برك
جدة : يعني زواج تقليدي ؟؟ كيما كنا حنا بكري !! كنت حاسبة عبدو لي ختاركي ..
تحجرو نيهاد عينيها بدموع و مقدتش تحكم روحهها عيات بزااف .. و معندهاش ليمن تحكي ... قد مادير روحهها صابرة و تتصرف ببرود مزالش عليها هاذ لجرح .. واش راح دير كي تزيد بنته !! راح تمشي تباركلهم ! ... هم اخر لهاذيك طفلة لي راح تزيد ... كان من الاول يتزوج كاترين و يربيو بنتهم علاه دخلها فلوسط و خلاها تتعلق بيه !! ... قعدت تبكي كل المشاكل جاوها في خطرة توحشت باباها و يماها حتى اسيا .. حابة تولي لياماتها لي فاتو .. ندمت صح لي تزوجت فهاذ لعمر ... مكانتش حاسبة راح يصرالها هاك ... قعدو دموع ينزلو .. قعدت تغزر فيها جدة تبكي بشهقة مفهمتش واش صرالها ضربة وحدة ! قربت عندها بلعقل ..
جدة : نيهااد !!
قاعدة تبكي بشهقة تشوف فالارض .. قربت عندها جدة و حكمتها مكاتفها بهدوء
جدة : وشبيك نيهاد ! كاش ماصرالكي ..
محستش كيفاه حتى تلاحت عليها عنقتها ... عنقتها مزال تبكي و تشهق .. حابة برك كتف تستند عليه و تبكي ... عنقتها جدة .. شفتها حالتها بصح مافهمتش واش صرالها ... راح عقلها ديراكت لعبدو ..
جدة : كاش ماعملك عبدو قوليلي دروك نمشي نشدله ودنيه و نربيه ..
هزت راسها لا خفيف مزال تبكي مبعد بعدت عليها .. هدات شوية و مسحت دموعها تشوف فالارض ..
نطقت جدة بصوت حاد ..
جدة : هياا حكيلي واش بيك ؟؟
هزت راسها لا تشوف فيها ..
نيهاد : والو .. صح والو .. جيست تفكرت بابا .. توحشتو بزاف ..
تنهدت جدة مالڨري كلش شفتها حالتها طفلة صغيرة حاستها ماعرفة والو فهاذ دنيا .. مسحتلها على شعرها بهدوء ..
جدة : معليش ابكي ... تريحي شوية ... نعرف مش ساهلة تفقدي والديك ..
قعدت ساكتة تشوف فالارض مزال حاكمتها هاذيك شهقة مي بلا بكا .. عينيها منتفخين و وجهها حمار ..
جدة : ربي يعطيك صبر هاذا واش نقولكي ..
نيهاد : امين ماني .. صحيتي
جدة : هيا تتعشاي متقعديش بجوع تاني تقولي مانه قرزازة خلاتني بجوع ..
قالتها بصوت حاد و راحت قبلها .. ضحكت نيهاد تمسح في وجهها باش متبانش كانت تبكي و تبعتها ... وصلو لغرفة الطعام ... لقاتهم كامل قاعدين ...
شافت زينو متعافر مع لؤي ...
زينو : بلعه قتلك ..
لؤي : يخي علاه تغير مني .. ديجا فاوك تمشي
ميساء : حاب تتهنى منو ..
اسماء : خلاص خليولي خويا مسكين ...
راحت جدة قعدت في بلاصتها نطقت بصوت حاد عفوي ..
جدة : خلاص كبرو شوية يخي بزوز يخي ..
خديحة : وشبيك قعدي نتي ..
قالتها تشوف فنيهاد لي فاقت مع روحهها و قعدت ...
منذر : نيهاد راكي مليحة ؟
شافو كامل معاها .. توترت و ردت تشوف فيه تابسم بلطف ..
نيهاد : ا .. ايه لاباس ..
نطقت نورا باستغراب
نورا : تباني كنتي تبكي ؟؟
شريف : ضحكي ميجيش عليك لبكا ..
قالها بلطف تبسمت معاه ..
زينو : ايه اصلا عندك ضحكة شابة ...
قالها بمرح ضحكو عليه ميساء و اسما ..
منذر : يخي مصرا والو ؟؟
نطقت جدة بصوت حاد
جدة : ايييه خلاص كولو و خليو طفلة تاكل ...
قلبت خديحة عينيها تاكل ببرود ..
نيهاد : مابيا والو صح .. مرسي على اهتمامكم ..
نورا : واش من مرسي راكي بنتنا نيهاد تحتاجي اي حاجة قوليلنا خلاص تفاهمنا ؟
غزرت نيهاد فيها بحدة .. مبعد هزت راسها ايه تشوف فطبسيها ..
VOUS LISEZ
_ لعنة الحياة _ ﴿ اللهجة الجزائرية ﴾
Short Story... مرات الانسان يتصادف بصوالح في حياتو جامي يتوقعها ، اذا كان الحب من طرف واحد مراحش تتخيل انو راح يجي نهار و يتحقق حلمك .. مي ايضا مراحش تتخيل كيفاه راح تنقلب حياتك مور مايتحقق هاذ الحلم البسيط ..
