قويت فلبكية نشوف فيه حتى جثا على ركبته يهدي فيا و يمسح على شعري ..
ادم : خلااص هدي روحكي ..
قعدو دموع ينزلو صح غايضتني عمري .. علاه الراجل لي نحبو يدير معايا هاك ؟ فواش غلطت معاه ؟؟ ليوم تاكدت صح بلي جامي كنت في قلبو و جامي راح يحبني ..
ادم : وشبيك نيهاد يخي ماصرا والو ؟؟
هزيت راسي لا نمسح فدموعي .. طلعت راسي نشوف فيه لقيتو يغزر فيا باستفسار ..
ادم : دروك شفت عبدو نازل .. كاش ماصرا بيناتكم ؟
هزيت راسي لا .. نضت بشوية و عاوني قعدت فناموسية نبكي ساكتة .. . حتى شفتو مدلي كاس ما .. حكمتو من يديه و رشفت شفافي يرجفو .. قعدت ساكتة حتى شفتو تنهد ..
ادم : خلاص روحي غسلي وجهك مراحش نضغط عليك كي تحسي روحكي مليحة حكيلي خلاص ؟ هيا خلينا نهودو نفطرو لازم كل واحد يكون فلوقت ..
هزيت راسي ايه عينيا نحسهم منتفخين من لبكا ... نضت بشوية دخلت لصال دو بان .. مسحت على وجهي بلماء ... حاسة قلبي راح يحبس ... خلاص لازمني نتهدن .. لقيت على روحي نظرة تالية فلمراية و خرجت قابلني ادم لي كان قاعد فلكرسي.. غير شافني خرجت ناض يغزر فيا مبعد تبسم بلطف ..
ادم : هيا نهودو ..
هودت معاه بشوية حتى وصلنا .. كانو كامل مجتامعين يسناو فينا ..
شفت فلؤي لي ناض يجري و عنق ادم يضحك ..
لؤي : بابااا ...
بابا !! ادم باباه !؟؟ مكانش علابالي .. خلاص مش وقت تخمام فصوالح ميخصوكش .. لي فيا يكفيني
رفده ادم بمرح ..
ادم : واشتاا صاحبي ...
لؤي : صباح لخير ..
ادم : هيا قعد في بلاصتك تفطر ..
حط ادم لؤي فلارض لي مشا يجري لبلاصته ياكل .. بعدها نطق ببرود ..
ادم : صباح لخير ..
علاه قالها هاك ببرود ؟؟
خديجة : صباح نور ولدي ...
نطقت شيبة نار تغزر فيا ..
جدة : وشبيك هاقعدي ..
هزيت راسي ايه .. و رحت قعدت ..
جدة : ناس تقول صباح لخير ..
قالتها تغزر فطبسيها تاكل ..
_ صباح لخير ..
نورا : وينو عبدو ؟
هزيت كتافي بملل ...
_ معلاباليش ..
جدة : كيفاه معلابالكش مشي نتي مرتو ؟؟ ..
نضت مبلاصتي بنفاذ صبر ..
_ صحا فطوركم ..
قلتها و جيت طالعة حاكمة فدموعي .. صح كرهت هاذ لعيشة تاع ذل .. منيش حابة نزيد نعيش معاهم كرهت كلشي .. حابة نولي لدارنا و نعيش كيف ما كنت ... سمعت صوت مورايا يتبع فيا ..
نورا : نيهاد !! حبسي ...
وقفت في بلاصتي طلعت راسي نحاول نحبس دموعي .. درت بشوية شفت فيها تغزر فيا متعجبة
نورا : نيهاد وشبيك دابزتي مع عبدو ؟؟
ضحكت على جنب بسخرية ...
_ طاطا معليش حابة نقعد وحدي ؟ ..
قربت عندي تشوف فعينيا و حكمت في يدي ..
نورا :اذا كاش ماعملك قوليلي !!
_ مادارلي والو طاطا حابة نقعد وحدي اذا تسمحيلي !
تنهدت تشوف فيا و هزت راسها ايه ...
درت نكمل طريقي و طلعت مع دروج .... وصلت لبيت دخلت و غلقتها بلمفتاح ... حكمتني هستيرية تاع لبكا .... قعدت فالارض نبكي عيانة ... منستاهلش هاذ شي .. منيش قادرة نشوفو معاها و سيرتو كي راها حامل بولدو .. منقدش ... حاسة نفس ضيق بيا .. مررت يديا على عنقي نحاول نتنفس مليح ... دموع محبوش يحبسو .... سمعت طبطيب فلباب .. نضت خفيف مسحت دموعي و فتحت لباب ... ادم ؟؟ ..
_ ادم ؟
ادم : هيا معايا ! ...
_ وين ؟؟ ..
تبسم بعفوية ..
ادم : خلاص فهمتك .. دابزتي مع عبدو علابيها راكي فهاذ لحالة نيشان ؟ ..
مررت يدي على جذر شعري ملقدام ...
_ مين جبت هاذ لهضرة ؟
ادم : باينة نيهاد .. موهيم هيا معايا
حكمني مذراعي بعفوية و جا مخرجني حبسته ..
_ ادم وين دايني ؟؟
تبسم على جنب ..
ادم : عند عبدو ..
عقدت حواجبي ..
_ واش ندير عنده ؟؟
ياربي زعما يكون علابالو بكاترين ؟؟ ... اوكي راح نمشي معاه و خلي يصرا لي يصرا خليهم كامل يعرفو بحمل كاترين .. و مام ادم خليه يعرف ... نطقت بثقة نشوف فيه ..
_ هيا ديني عنده ..
جينا خارجي وليت حبست دار شاف فيا باستفسار
_ جداتك و طاطا نورا مايقولونا والو ؟
ادم : خليها عليا .. تبعيني و صايي
قعد نتبع فيه راح مجيهة اخرى مكان فيها حتى حد... كانت مڨاريا طوموبيل ..
ادم : هيا ركبي ..
ركبت ملقدام درت حزامة و شفت فيه ..
_ ايه كيفاه راح تعرف بلاصته ؟؟
ادم : ساهلة ..
جبد تيليفونه و دخل للكونت تاع عبدو ..
ادم : عندك زهر هاو حال موقع تاعه ..
تبسمت معاه ابتسامة صغيرة ..
_ مرسي ..
ادم : نورمال مبيناتناش ..
نوض لوطو و قلعنا بيها .... طول طريق و حنا ساكتين ... وراني موقع وين راه كان فسبيطار مفهمتش واش جابه لسبيطار .. يمكن كاترين كاش ماصرالها علابيها خرج بزربة كي عيطتلو ؟... مكنتش حابة يصرا هاك مي هو وصل روحه راح يعرف ولد عمه بحمل كاترين و باينة مراحش يسكت راح يخبر كاش حد و تنتاشر لهضرة .. تنهدت .. شوية حتى ڨارا لوطو قدام سبيطار تاع مدينة .. تنهدت و شفت فيه ..
ادم : واش راح يكون يدير هنا زعما ؟؟
هزيت كتافي معلاباليش ..
_ ندخلو و نشوفو ...
نزلنا بهدوء و دخلنا رحنا للاستقبال نطقت بشوية نتفادى نظرات ادم لي حس بلي راني نكذب ...
_ شي وين غرفة كاترين **** اذا منيش غالطة ..
قعدت تشوف فلوراقي مبعد هزت راسها ايه ... قعد قلبي يضرب و شفافي يرجفو بلا مانحس ... قلبي يوجعني كي نتخيل بلي راهم مع بعض ...
.... : ايه صح ، راها فلغرفة ثانية ..
_ شكرا ...
نطق ادم باستفسار يشوف فيا ...
ادم : واش علاقة كاترين ؟ ..
_ تعرفها ؟؟
ادم : ايه كانت تقرا معانا ملي كنا صغار ...
نزلت دمعة مسحتها خفيف و جيت ماشية و هو مورايا ... وصلت للغرفة .. شفت فلوكي .. ترددت وليت تشجعت و حليت لباب زدمت عليهم هاك ... تسمرت في بلاصتي و عينيا تحجرو بدموع ...
هوا واقف يبان فرحان .. اما هي راقدة على لكرسي طويل وين يفوتو كرشها عريانة لي نتفخت شوية ... و طبيبة قدامها تفحص فكرشها و شاشة قدامها وين يبان لبيبي ... نزلو دموع معينيا ... وقفت طبيبة تتبسم معاهم ..
_ بلباركة عليكم مرة اخرى على لبنية ...
قالتها و خرجت بعدت نفتحلها طريق .. قعدت نشوف فيهم .. حسيت عبدو تبدلت ملامح ه للغضب ..
عبدو : واش ديرو هنا ؟؟
ادم : نتا لي واش دير هنا ؟
بنية !! عندهم بنت ؟؟ ... دموعي ينزلو و حاسة نفسي يضيق ... علاه .. حتى حبيتو و تعلقت بيه ! علاه كيما هاك ... نشوف كلشي مضبب من دموع لي فعيني ... نحاول نتفس .. اصواتهم لعالية تجيني ملبعيد ... نحس لرض دور بيا !! ... محسيتش بروحي كيفاه طحت ..........
VOUS LISEZ
_ لعنة الحياة _ ﴿ اللهجة الجزائرية ﴾
Short Story... مرات الانسان يتصادف بصوالح في حياتو جامي يتوقعها ، اذا كان الحب من طرف واحد مراحش تتخيل انو راح يجي نهار و يتحقق حلمك .. مي ايضا مراحش تتخيل كيفاه راح تنقلب حياتك مور مايتحقق هاذ الحلم البسيط ..
