සකපෝරුව

5 වන සකය

"රතු අප්පුවෝ"

දේදු පපුවට අතත් තියන් කෑ ගැහුවා. මනුලටයි, විකුම්ටයි, මිශෙල්ටයි හිනාව නවත්තගන්න බැහැ.

ගරු ඇමතිතුමා බය වෙලා වගේ එකපාරටම සරමට අත තියාගත්තා. දැන් මනුලට තවත් හිනාව නතර කරගන්න බැහැ. හරි අමාරුවෙන් හිනාව තොල් තද කරන් දේදුත් මුන් තුන්දෙනාට  ඇස්වලින් රවනවා. ඇමති ආර්යාවයි, දෝණි නැන්දයිත් හිනා වෙනවා. ඒත් සුහද ඒකනායක,

"මනුල අප්පුව කාමරේට අරන්‍ යන්න"

ටිකක් තද විදියට සුහඳ කියද්දි මනුල ගිහින් රතු අප්පුව අතට ගත්තා. රතු අප්පු දේදුයි, සුහඳයි දිහා බලාගෙන,

"අප්පච්චිට අම්මලාට කෙරුවලු මං නින්දා"

මූගේ කට අද උපරීමෙට වැඩ.. දෙයියනේ කියලා මනුල වෙනුවෙන් ඇමතිගේ රෙදි ගලවන වැඩේ රතු අප්පු බාරගෙන. මනුලට අප්පුට බනින්න හිතන්නවත් වෙලා නැහැ. හිනාවෙවීම ඉන්නවා.

"රතු අප්පු කට වහගනින් බං. දෙන්නටගෙම බත් කාර්ඩ් පපා වැඩේ දේවි"

වැඩේ හරියන්නැති වග තේරිලා මනුල රතු අප්පුට කිට්ටු කරලා කිව්වා.

"මනුල පුචේ මං කාර්ඩ්වල බත් කන්නෑනේ.. රතු අප්පු කාර්ඩ් එකේ බත් කන්නෑ. මනුල පුචා කවදා ඉදන්ද කාර්ඩ් වල බත් කන්න පටන් ගත්තේ ?"

අද ඉතින් මනුලට අයියනායක දෙයියන්ගෙම පිහිටයි.

"පොඩී ඕකව අරන් යන්න ඉක්මනට. පපාගේ මූණ පේන්නැද්ද ?"

විකුම් මනුල ළඟට ඇවිත් කනට කරලා කිව්වම, මනුල පපා දිහා බැලුවා. ඇස් දෙකින් රවාගෙන කටත් තද කරගෙන ඉන්නවා දැක්ක මනුලගේ කටේ කෙල හින්දුනා.

ඉක්මනටම ලිෆ්ට් එක පැත්තට අඩිය තියපු මනුල එයාගේ රූම් එක තියෙන floor එකේ බට්න් එක ප්‍රෙස් කලා.

"ආයේ නම් උබට මං මිරිස් කවන්නෑ"

උඩට යන ලිෆ්ට් එකේ ඇතුලේ ඉදන් මනුල අප්පුවා දිහා බලන් කියවනවා.

"රතු අප්පු එතකොට යනවා ගිරා අයිතිවාසිකම් වලට ගිහින් නඩුවක් දාන්න"

"අනේ අම්මපා අප්පුවෝ කොහෙන්ද ඔය කතා ඉගෙන ගන්නේ ?"

"රතු අප්පුට පපා කියන ඒවා ඇහෙනවා.. රතු අප්පුට හැමෝම කියන ඒවා ඇහෙනවා.. රතු අප්පු ඒවා මචක තියන් ඉන්නවා"