Enduring a Thousand Tribulations [Shui Long Yin] MM Translation

5.4

အတွဲ (၁) - မြေခွေးမိစ္ဆာသခင်လေး

5 - ခန္ဓာတစ်ခု၊ အသက် ၂ ချောင်း part 4

အနောက်မြောက် မော်ယာတောင်ထွတ်။

တောင်တန်းများသည် ရေခဲများနှင့် ဆီးနှင်းများဖုံးလွှမ်းနေပြီး ကြည်လင်သောအပြာရောင်ကောင်းကင်တွင် တိမ်တစ်စမျှ မမြင်ရချေ။

သိုင်းလောကတွင် ပိလော့နန်းတော်က တောင်ဘက်ကို ပြောင်းရွှေ့သွားသည်ဟူသော ကောလဟာလသတင်း ထွက်လာခဲ့ဖူးသည်။ သို့သော် ဘာကြောင့်မှန်းမသိရပေ။ အနောက်မြောက်နေရာတွင် အဆုံးသတ်သွားခဲ့သည် ဟူ၍။ မော်ယာတောင်ထွတ်၌ တည်ရှိသည် ဆိုသောသတင်းမှာ ရွှေ့ပြောင်းပြီး တစ်နှစ်အကြာတွင်မှ သိလာခဲ့ကြတာ ဖြစ်သည်။ သို့သော် စုံစမ်းစစ်ဆေးပြီး ရှာဖွေကြသူ အမြောက်အမြား ရှိခဲ့ကြသော်လည်း မော်ယာတောင်ထွတ်ပေါ်က ပိလော့နန်းတော်၏ တည်နေရာအတိအကျကို မည်သူကမျှ ရှာမတွေ့ခဲ့ကြပေ။

နှင်းများသာ ထူထပ်စွာ ရှိနေသောနေရာတွင် အဝေးမှလာသော မြင်းခွါသံများကို ကြားလိုက်ရသည်။ လူတစ်စုသည် မော်ယာတောင်ထွတ်၏ တောင်ခြေသို့ ဖြည်းညှင်းစွာ ရောက်ရှိလာ၏။ သူတို့ဆက်သွားလေလေ ရေခဲနှင့် နှင်းများ ပိုမိုထူထပ်လာပြီး အအေးဓာတ်မှာလည်း ပိုမိုပြင်းထန်လာလေသည်။ ဤမျှ အေးခဲလှရာ ထိပ်တန်းသိုင်းသမားများသာ ကျော်ဖြတ်နိုင်သော မြေအနေအထားမျိုး ဖြစ်နေလေသည်။ မြင်းများမှာ မော်ယာတောင်ထွတ်၏ တောင်ခြေတွင် ရပ်လိုက်ပြီး မြင်းပေါ်ကနေ လူတချို့ ဆင်းလိုက်ကြပြီး တောင်ထိပ်ကို ခေါင်းမော့ကြည့်လိုက်ကြသည်။

"ဒီနေရာက ဘာလဲ! လူတွေက ဒီလိုနေရာမျိုးမှာ တကယ်နေနိုင်ပါ့မလား။ ကောင်မလေး၊ မင်း တကယ်ပဲ လိမ်နေတာမဟုတ်ဘူးလား။" ချီယွင်က နှခေါင်းနှင့် ပါးစပ်ကနေ အဖြူရောင်ရေငွေ့များ ရှူထုတ်လိုက်သည်။ သိုင်းပညာတွင်တော်သော်လည်း သူသည် အရိုးခိုက်အောင် ချမ်းသည့် အအေးဓာတ်ကို ခံနေရဆဲ ဖြစ်သည်။ "မသေမျိုးနတ် ဆိုရင်တောင်မှ ဒီလိုနေရာမျိုးမှာ နေရရင် အေးခဲသေသွားနိုင်သလို ငတ်ပြီးသေသွားနိုင်တယ်။"