Enduring a Thousand Tribulations [Shui Long Yin] MM Translation

3 - မိစ္ဆာနှင့် လူဆိုး

အတွဲ ၁ - မြေခွေးမိစ္ဆာ သခင်လေး
3 - မိစ္ဆာနှင့် လူဆိုး

ရက်အနည်းငယ်ကြာသော်

ဟွမိန် စားသောက်ဆိုင်တွင် ကျင်းပခဲ့သည့် စားပွဲ၌ အရက်အဆိပ်ခပ်ခံရသည့် သတင်းမှာ တဖြည်းဖြည်း ပျံ့နှံ့သွားပြီး သိုင်းသမားများစွာက လူတစ်ယောက်၏ အသက်ကို နှုတ်ယူဖို့ ငွေစ တစ်သောင်းပေးခဲ့သည့် မျက်နှာဖုံးစွပ် လူသတ်သမားအကြောင်းကို စိတ်အားထက်သန်စွာ ဆွေးနွေးကြကုန်သည်။ မထင်ထားရလောက်အောင်ကို ငယ်ရွယ်လှသည့် ဝမ့်ချောင်းကျိုင်း ပိုင်ရှင်ဖြစ်သူအကြောင်းမှာလည်း လူအများအပြား၏ ပါးစပ်ဖျားတွင် ရေပန်းစားသည့်် အကြောင်းအရာ ဖြစ်လာခဲ့သည်။ ယွီချိဖုန်းမှာ ထိုနေ့အကြောင်းနှင့် ပတ်သက်၍ ဘာတစ်ခုမျှ ထုတ်ဖော်ပြောကြားခဲ့ခြင်း မရှိပေ။ ယန့်မင်ရှိ လူများမှာ ထန်လိစစ်နှင့် တခြားသူများ ထွက်ခွါသွားသည့်အပေါ် မည်သည့်သံသယမျှ မရှိခဲ့ချေ။ သူတို့သည် ထန်လိစစ်အား ယဉ်ကျေးသိမ်မွေ့သော လူကြီးသူကောင်းတစ်ယောက်ဟု ခေါ်ဝေါ်နေကြပြီး သိုင်းလောက၏ ကောင်းကျိုးအတွက် ပါဝင်ကူညီပေးလိုသည့် သူ၏ရည်ရွယ်ချက်အပေါ် ချီးကျူးနေကြလေသည်။

အစိမ်းရောင် မြက်ချုံပုတ်များအကြားတွင် ခရမ်းရောင်ပန်းပွင့်များစွာ ပေါက်နေသော လမ်းရှိပြီး ထိုလမ်းအဆုံး၌ အဖြူရောင် ကျောက်သားအဆောက်အအုံကြီးတစ်ခု တည်ရှိနေ၏။ ထိုအဆောက်အအုံ၏ နံရံ၌ လူ့ဦးခေါင်းများစွာ ထွင်းထုထားပြီး တချို့ဦးခေါင်းများမှာ အသက်ဝင်လှသည့် ကြောက်စရာကောင်းသော မျက်နှာအမူအရာများ ရှိကြသည်။ ထန်လိစစ် နှင့် ချီယွင်တို့သည် သျန့်မြို့ ငွေတိုက်မှ ရွှေချောင်းငါးသောင်း ယူလာပြီး အဆောက်အဦးအတွင်း ပေးပို့ခဲ့ပြီး ဖြစ်ကာ အပြင်ဘက်တွင် ရပ်စောင့်နေကြသည်။ ထန်လိစစ်က ရှဉ်လန်ဟွင်ကို တစ်နှစ်စာငှါးရမ်းဖို့ သတင်းစကား ပေးပို့ခဲ့ပြီး ဖြစ်ပြီး ၁၃ လွှာ ငမွဲလူသတ်သမားမျှော်စင် ပိုင်ရှင်မှာ သဘောတူခဲ့ပြီး ဖြစ်သည်။ ယခု သူတို့ ၂ ယောက်မှာ ထိုလူထွက်ပေါ်လာမည်ကို စောင့်ဆိုင်းနေကြတာ ဖြစ်သည်။