حكاية (( ضحية انتقام ))

(( بارت 6 ))

حكاية (( ضحية انتقام ))

بقلم✍🏻 حــوراء المــوسوي 🤍

// بارت 6 //

........ من كال امير اخير كلمه بجيت هو اختفت ضحكته وتفاجئ بيه عباله بجيت لان كالي الفاهيه گالي

امير :-  شبيج مرت عمي ترا اشاقه وياج والله  شفتج ضايجه فـكلت خلي الطف الها الجو ما عبالي هم فاهيه وهم ام ادميعه

باوعتله:-  لا موهيج بس هاي كلمة الفاهيه جنت اسمعها من شخص عزيز عليه ومن كلتها انت اذكرته وبجيت

بس لاحظت علي يباوع للباب ورايه صاير  باوعت النفس المكان شفت وارث واكف مكتف اديه ومرتجي على الحايط ويستمع الي

گالي وهو خازرني احس يريد ياكلني بعيونه
:- ومنو هذا العزيز الي بجيتي من ذكرتي كلمته الج

بلعت ريك وبقيت ساكته اخاف اكوله حسام خاف يعصب عليه بزايد باوع الامير گال اله

:- روح جيبلي اوراقي نسيتهم على الميز بالصاله هم روحك تأحرت

راح امير يجيب الاوراق واني ما اتحملت ابقى اكثر گمت اريد اختفي من كدامه اخاف ابقى يمه نضرته تخوف وسرة بجسمي رجفه خوف من عنده درت وجهي اريد اطلع بعدني بالباب لاكتني ام استبرق گالتلي

:- اعجني حتى تخبزين ماعدنه خبز وتعالي نظفي البيت واكنسي ترى وصخ

هزيت راسي الها بدون ما اجاوب

رجعت گالتي:-  تعالي ورايه ادليج على الطحين
رحت امشي ورها للمخزن

گالت:- هاي هنا الطحين وادوات العجين
وعافتني وطلعت باوعت الايدي بيها كانولا واصلاً كلشي بجسمي يوجعني من ضرب ام ضرغام بس شسوي مجبوره
  رحت شلت الكانولا وغسلت اديه بصابون ورجعت عجنت وطلعت نظفت البيت وكنسته بعدني بالصاله ودخل رجال بكد ابويه او شويه اصغر باوعت علي الضاهر يعرفني اني منو هنا عقج وجه وخزرني صاح عليه بعصبيه
:- انتي هييي ولي من خلقتي ما اريد اشوف خلقتج كدامي
وصاح بصوت عالي:- وفاء وفاء لج وين وليتي تعالي
اجت وفاء تمشي سريع هلا عيوني ابو امير الله يساعدك واخذت العلاكه من ايده  عرفتها هي هاي ام استبرق اسمها وفاء وهذا زوجها

اسمعه كالها
:- هاي ما اريد اشوف خلقتها كدامي ابد لان من اشوفها اشوف كتال ضرغام

باوعتلي و صاحت بيه:- ولي منا بسرعه

شلت المكنسه ورحت للمخزن صدك كاعده احس بالذله بسببك يا حسام ليش هيج سويت اني شنو ذنبي

ضليت بالمخزن شفت افراشي وغطاي  مال البارحه بعده رحت كعدت وتغطيت ضليت ساعه انتبهت راح يصير اليل
اذكرت اني عاجنه ولازم اخبز طلعت اشوف منو تدليني على التنور حتى اخبز شفت استبرق سئلتها على مكان التنور وين يخبزون رحت وياها دلتني المكان جان مخلينه بالترك اخذت العجين ورحت كوه اخبز اديه يوجعني ونفسي تلعب لان معدتي فارغه طلعت اول خبزه اكلت منها گمت اخبز وأكل من الخبزايه الاولى وخايفه خاف احد يجي ويشوفني أكل استحي اجت ابالي سوالف امي من جانت تخبز ونكعد يمها ناكل من خبزها جانت تشاقى ويانه تكول التاكل اول خبزه يموت رجلها ابتسمت على الذكرى وكلت حتى اذا يموت زوجي طبه طووب المهم أكل اني واشبع بطني