لاتزرعين الورد وإنتِ عبيره

الجزء الثالث عشر

اللهم صلي وسلم على نبينا محمد
صلوا عليه
..
ناظرهم مطر بإبتسامة،دائماً الصباح مايخلى من مناقرت سحابة وعهد ،إللي شخصياتهم جداً تتشابة فقط الإختلاف إن عهد تحب الضحك والوناسة ومجنونة في بعض الأوقات ،وسحابة هادئة
-:ليه قومتيها من السفرة ،ماأكلت شي
-:ماعليك شوي يقرصها الجوع ،وتقعد تحوم بالمطبخ تدور شي تاكله
من بين كل هالحوارت إلا إن مزنة تأكل بهدوء غريب،تسرجع ماحدث بالأمس،تحس إنها ماهي مصدقة إنها إنكشفت ولا لها إستطاعه على نكّر فعلتها،ماتدري ويش خطوتها الجاية؟أو كيف تقدر تمسك ألسنتهم عن القول؟
———————————
قاعدين يفطرون ،ناظر سراج لـ فاتن إللي تأكل تارة ،وتقراء تارة،تنهد بإنزعاج وترك فنجاله وهو يسحب الكتاب من يد فاتن إللي كزت لإنها كانت مندمجة في القراءة
-:يالله صباح خير ،سمّي وأفطري، لاحقه على القرايه
قالت بـ حماس وإنزعاج بسبب سحبه للكتاب:
-:بقى..ثلاث..صفحات وأخلـ..ـص ،هات
هز راسه برفض:
-:إفطري وعقبها بعطيس
-:سراج!!
طنشها وهو يكمل فطوره ،حبها للروايات مبالغ فيه وهذا الشيء يستفزه
-:تبيني ..أحكيلـ..ـك قصتها؟
قال بلامبالاة:
-:إحِتّسي ويش ورانا؟
حكت له القصة بحماس:
-:تتكلم..عن لونا..وأهلـ..ـها إللي عايشيـ..ـن بكوخ..وبيوم تدخل ...المستو..دع وتحصل..أحد قطاعيـ..ـن الطرق..مندس(متخبي)..ويهددها إنه راح يذبحهـ..ـها إذا علمت ..مكانها،وعقبها تنخطـ..ف.. وتحصل نفسها عايشة...عند عائلـ...ـة غنية وعقبها تتزوج..واحد...من هالعائـ..ـلة ويجيها خبر...توفي أهلها...بسبب قطاعيـ...ـن الطرق.
إبتسم على إنها طولت بالكلام ولكن إستمتع لسماعها وقال:
-:تضيعين وقتس على أكاذيب!؟
-:أحب ..أقراء..حتى شخصيـ..ـة البطلة حلوة...وشعرها قصيـ..ـر ،شكلي...بقص شعر..ي.
ناظر فيها بحدة:
-:قصيه تشوفين كيف أقص إرقبتس
كشرت بضيق:
-:ليه!؟..تغيّر لشكلـ..ـي
-:شكلتس مابه شي ،إعقلي لاشيل عنتس هالكتب
ناظرت فيه بقهر ،كان ودها تقص شعرها من كثر حبها للشخصية،على إن شعرها جميل جداً طويل وكثيف،ولكن تبي تشوف شكلها بالشعر القصير.
—————————————
قالت بإستهزاء وهي تسند على الباب:
-:هذا إللي حسيتيه(حكيتيه) قصة مسلسل؟ويش بتزوجتس لشايب كحيان(حالته حاله) وتأخذ مهرتس،أذنتس تسمع ويش يحتّسي به لسانتس
ناظرت فيها العنود بـ أمل إنها تصدقها،على إنها كانت متوقعة إن ورد مابتصدقها :
-:ماأسذب عليتس ،الله يشهد على حتّسي حرف حرف.
ورد كانت مصدومها ماتدري هل فعلاً كلامها صح؟أو هي تخترع كذبة لهدف معين؟
-:وش سحر؟ وحابسه بنات ببيتها؟ هذا حتسّي المسلسلات،ماعندنا أحد بديرتنا تسذا؟
قالت برجاء:
-:صدقيني مابتسذب عليتس،الحرمة تظن إن أهل هالديرة كلهم تحت أمرها،ولاتظنين إني بزيف حتّسي لجل تصدقيني
قالت ورد وهي تبتسم بسخرية وهي بالأصل تجاري العنود لان الكلام إللي قالته ماقد سمعته بديرتهم
-:شلون تثبتين لي؟
قالت بأمل:
-:راقبوا بيتها، إيه راقبوه،ميّر لاتحس فيكم لأنها والله ماراح تفككم ،راح تقّوم أمة محمد كلها
-:وين بيتها؟
-:بأخر الديرة ، قريّب من المستشفى
ناظرتها ورد بعدم تصديق وهي متعجبة، وين هالحرمة إللي تشتغل بأعمال السحر ،وغير كذا البنات إللي خاطفتهم وحابستهم ببيتها!شلون قدرت تسوي هالأشياء من دون ماأحد يحس فيها،طلعت من عندها وسكرت الباب بذهول.
——————————-
وصلوا الديرة ،وتحس إن قلبها بيوقف من الخوف والتوتر،تخاف من ردة فعلهم ،أكيد حتكون ردة الفعل حتكون قوية ومصدمة ،ولكن تخاف إن ردة هالفعل تكون مخزونة في الذاكرة ،تتمنى إنهم مايتعرضون لها ،ويكون عتبهم وكلامهم لولدهم فقط
،شافت صقر يأشر لها بمعنى تعالي ،راحت معاه وهي متوتره قالت:
-:الأغراض!؟
-:ماعليتس أنا بجيبها
دخلوا وكان البيت هادىء جداً ،صاح بصوته الجهوري:
-:يمه.
إنتظر للحظات ثم شاف أبوه مقبل عليه وهو يهلل ويرحب:
-:يامرحبا تراحيب......
سكت أبوه بتعجب وذهول ،قال بعدم إستيعاب:
-:من ذي ياولد!؟
تقدم صقر بإبتسامة وهو يُقبل رأسه وقال:
-:زوجتي
ناظر فيه أبوه وهو يحاول يستوعب،كيف تزوج؟ومتى؟وشلون يتزوج من دون علم أحد ؟
-:ياولد ويش زواجه؟ويش تحتّسي؟
-:زوجتي على سنة الله ورسوله
رد أبوه بغضب وصوته إرتفع من شدة غصبه
-:مجنون؟جايب وحدة مانعرف أصلها ولا فصلها!وتقول زوجتي!ناوي تفضحنا بالديرة!؟
كانت جميلة صامتة وخايفة بنفس الوقت ،شافت حرمة مقبلة عليهم خمنت إنها أمه ،تسلسل صوتها لمسامعها
-:ياهلا ياصقر والله إني فقدتك
صاح أبوه بإعلى صوت:
-:لاترحبين بـ أسود الوجه ،جاي وجايب معه حرمه مانعرف أصلها من فصلها
قال صقر بحزم:
-:هذي الحرمة زوجتي على سنة الله ورسوله
إبتسمت أمه:
-:وإذا متزوج ياأبوا صقر!؟
ناظر فيها بصدمة:
-:إنهبلتي ياحرمة!؟ الرجال تزوج من دون علمنا ،ناوي يفضحني قدام أهل الديرة.
-:إهدا يابو صقر،أهقى إن صقر ماأختار إلا زينة البنات،وإذا على أهل الديرة نسوي حفلة ولاعشاء نسكتهم