فصلية وحب 2 💓

الحلقة ١٢

فصلية وحب 💓2
الحلقة ١٢

انه كتلك 
ياحبيبي الدنيا سوگ
وهاي شراية ملامح
محد يموت اعله حزنك
ذوله شراية رخيص وانت غالي
انت اغلى من العمر والعاشگين

لـ حسين المحسن

-استاذ احمد

صفن احمد حس هالصوت مار عليه

التفت و شاف شي ما جان يتوقعه

شاف دانه حب المراهقه و حب ايام الجامعة مر شريط ذكريات بباله

ايام المحاضرات و نظرات الحب ايام مشيهم بممرات الكلية و ايد بأيد كل وعودهم و خططهم حتى اطفالهم الي سموهم سوه و كل ذكرى حلوة جانت بينهم

قطع هالشريط صوت دانه

-ها استاذ معقوله ما اتذكرتني

-لا اكيد اهلا دانه شلونج شخبارج

-الحمدلله بخير اني و من شفتك صرت افضل شخبارك انت وين ما وين بعدك تركض وره امور العشاير

-ههههه لا وين عفت هالامور حالياً مستقر هنا اني و زوجتي بس

-اهااا حلوو تزوجت ؟؟ لعد و الفصلية

-براء هي زوجتي براء

-يااا صدك داتحجي يعني اخذت الفصلية لعد مو خدامةعدكم و من هالامور

ضاج احمد من حچيها بس كظم غيضه و حاول ما يبين ضوجته و غير الموضوع

-شنو انتِ طالبة لو تدريسيه

-لا دادرس انكليزي الشركة الي داشتغل بيها دائما يدزونا مؤتمرات خارج العراق لذلك قررت ادرس انكليزي و اقوي نفسي بيه

-اها ما شاء الله موفقه ست دانه

-ههههه شنو هالكلافه

-بعد لازم
يلا يابه اني لازم اروح الاهل بالانتظار عود اشوفج غير مرة و اذا احتاجيتي شي حياج الله

-مشكور استاذ عود لا تنسى سلملي على برو

-يوصل مع السلامة

-مشيت بخطوات متثاقله ما عرفت شسوي او شلون اسحب نفسي او حتى اتمالك اعصابي و ما اتوتر دانه حب قديم عشته و اخذ مني هوايه شلون رح اكدر اسيطر

خفت براء تحس و تتأذى و خفت على نفسي انجرف هواي افكار و امور تجمعت ببالي اسوق و بالي مو يمي بوقتها ردت ادعم وصلت للبيت بالف قل هو الله احد

اول ما فتت على البيت براء جانت تنتظرني بس لمحت عيوني و وجهي حست اكو شي

-حبيبي بيك شي ؟

-لا ماكو شي بس تعبان

-متأكد بس داحس مهموم و ضايج

-لا ماكو شي بس تعبان اريد اتغده و انام

الغدا جاهز ؟

-اي جاهز هسه كايمه اصب

حطت براء الاكل و اني طول الوقت صافن و ساكت و هالشي خله براء تتأكد لان مو مثل كل مرة من نكعد ابقى اسولف الها كلشي صار ويايا

-لازم اليوم كلشي ما صار بالجامعة

-ليش ؟

-اشو بس ظال صافن

-لا بس دافكر بكم شغله

-احمد افتح گلبك احجيلي

-ماكو شي براء كلها امور تخص الشغل و دافكر بأهلنا و هالامور

-زين لا تفكر التفكير يتعب ربك مقسم كل شي و كل اقدارنا مكتوبه

-و نعم بالله
شبعت رح اكوم انام لو تردين اساعدج

-لا لا اريدك سالم بس انت كلي ما تريد استكان جاي

-لا حبيبتي رح انام

بستها بگصتها و كمت للفراش ظليت اتكلب ما اجاني نوم بس افكر

مر هاليوم بتوتر مني و شك من براء

ثاني يوم داومت و شفت دانه يم باب الجامعة حسيت دانتظرني بس هي كالت انو صدفة و سلمت عليه و بقت واكفه شويه و راحت لقسمها و اني رحت لمكتبي

من بعدها ظلت عيون دانه تراقبني و بكل مكان اشوفها و بكل فرصة تصح الكاها قريبة مني و كثرت زياراتها لمكتبي بحجة تحتاج امور من العمادة او من اساتذة

حاولت ابتعد بكل طريقة لدرجة فكرت اترك الشغل بس المنعني هالشغل بالكوة لگيته و براء بالاصل شاكه ما ردت تتأكد انو اكو شي ورايه

و بيوم و مثل كل يوم ومحاولات دانه حتى تتقرب مني جتي للمكتب

-صباح الخير استاذنا

-صباح النور اهلا دانه

-شلونك

-الحمدلله و انتِ

-أسأل عليك

-تسلمين

-الله يسلمك
اكول أحمد ممكن طلب ؟

-أكيد تفضلي

-ممكن اشوف براء او اخذ رقمها

يتبع ......

لا تنسون التصويت ⭐️و ارائكم

نور

#فصلية_وحب2