فصلية وحب 2 💓

الحلقة ١٧

فصلية و حب 💗2

اليـدري شگـد أحبك لو طٌلب أي شي مـيحلفني غير بـداعة عـيونك .

لـ شاعرها

الحلقة ١٧

*الساعة الثانية فجراً مقبرة الكرخ

احمد رايح يدفن اول طفل اله ثمرة حبه من براء الطفل الي حارب علموده عشيرتين

جان يمشي بخطوات متثاقله ويا احد اصدقاءه لاول مرة من بعد فترة طويلة حس نفسه غريب تندم على بعض الامور منها انو ترك المشيخه

وصل للمكان الي جهزوه اله قبل بساعة دفنه و تذكر الامام الحسين عليه السلام من دفن طفله الرضيع

اهز بيدي ايا عيدي
يا يمة يميل گلبي ويه المهد لو مال
انا گبالي المهد خالي
اثاري گاع اهز گبركز ولا ع البال
جفن يبجي صرت احجي
دللو يا الگبر نامي الليالي طوال
فرغ مهدك حرت بعدك
دللو يا الولد إلمن بعد تنگال

جان يررد هالقصيدة و دموعه تجي و يا كل ذرة تراب تنزل

كمل من الدفن و باله يم براء و شنو رح تسوي و شلون رح تتقبل
ما يدري الي ينتظره اعظم و اكبر

اتصل على اهلها و حچالهم الوضع و طلب من امها تجي و امها ما جذبت خبر بنفس الساعة راحت لبتها للمستشفى

جانو ينتطرون براء تكعد من البنج لكن للصبح ما كعدت

و هالشي جان مريح احمد نوعاً ما بس بنفس الوقت خاف

خاف انو صار عليها شي ....

*الساعة الثامنة صباحاً مستشفى الكرخ العام جناح براء

فتحت براء عيونها شافت امها رجعت سدتها و بقت مغمضه

-براء

-ها يمه

-شلونج يبعد امج

-زينة

تفاجأت امها لان
ما حجت شي و لا سألت عن ابنها و لا عن وضعها

طلعت لاحمد و كلتله الي صار و هو هم تفاجأ

فات للغرفة و صار الي ما توقعه ..
اول ما فات و شافته براء عاطت بأعلى صوت عدها

- يممممممممممممما طلعيه طلعيه هذا خنزير

-يا اسم الله الرحمن شبيج يمه

-يمه طلعيه ما اريد اشوفه يمه يمه يريد يخنكني يريد يموتني

ظلت براء تشرمخ بوجها و تجر بشعرها و تعيد و كل الناس التمو احمد عباله من اثر الصدمة بس تذكر هي اساساً ما تدري شنو صار

تقرب خطوة راد يحجي وياها بس هي عاطت اقوى بعد

-ولك يمه اطلع شهرتنا خلي اسكتها و اجي وراك

طلع احمد و ما يدري شيسوي جان منتظر تكعد و تلمه و يلمها و كل واحد بيهم يواسي اللخ على مصيبته بس ما اجه بباله براء تسوي هيج

...
يمه شبيج ليش هيج سويتي

-يمه هذا خنزير يريد يكتلني يمه

-يمه هذا احمد رجلج يحبج و انتِ تحبينه

-يمه هذا مو احمد هذا خنزير

-حطت ايدها على راسها يمه صلِ على النبي 

عاطت براء لاااااا ما اريد ما اريد

صفنت امها و بدت شويه تستوعب الشي الي صاير على بتها

رادت تقره اي شي من القران بس هي ما حافظه و ما تعرف ...

حاجت الممرضة الي جانت واكفه تحط لبراء الابره

-اكلج يمه بنيتي تعاي حطي هنا قران بهذا التلفون خلي يهدي نفسيتها

-حاضر خاله

-انه حاطه بيه سورة البقرة بس ما اندل

-انطيني تليفونج حجيه

شغلت الصوت الممرضة و ويا الدقيقة الاولى براء ما تحملت حطت اذنها على راسها و ظلت تضرب على راسها حيل و تعيط و ما تحملت الصوت و تكلهم طفوه طفوه

هنا تيقنت امها بنتها مسحوره ...

-خايب براء مسويلها سحر اهلها

-خاله شني هذا الحجي مو عيب

-يا عيب يا فلك ولكم ما تخافوون الله الله الاحد ولكم كتلتو ابني و اجيتو تموتون هالبنيه الماعندي غيرها و لكم تكتلونها و تكتلون ضناكم ابطنها حسبي الله ونعم الوكيل بيكم يالشيوخ الله ينتقم منكم

احمد ظل بس صافن ما يعرف شيسوي و لا شلون يسكتها بس ام و ملچومه على بنتها

-خاله انت شلون عرفتي براء مسحوره

-لا تريدك و لا سألت عن الفرخ و من شغلت الها قران صارت زركه و موتت روحها شنهي معناها هاي معناها البت مسحوره

-لا حول و لا قوة الا بالله
رجع احمد لبراء يريد يحجي وياها بس سوت اكثر من السوته المرة الفاتت كامت تركع براسها بالحايط و الممرضات طلعوه و امها ظل تعيط و تتحسب عليه

طلع بره للحديقه و هو يبجي مايدري وين يلتفت لابنه الي دفنه قبل ساعات بأيده لو لبراء الي ما تقبل تباوع بوجها و ما طايح على علتها و مايدري شنو ينتظره

صفن و ربط الامور الي صارت بالايام الفاتت الاحلام الي تشوفها براء و هذيانها و بالشي الي صار هسه كدامه و فعلاً تيقن كلام امها صحيح براء مسحوره

ركب سيارته و اتوجه لديرة اهله

يتبع ...

لا تنسون التصويت و ارائكم ❤️

نور

بالنسبة للبنات الي يكولون الحلقة قصيرة ترى هي بالاصل القصة قصيرة يعني بالحلقة الجايه رح نختم 🌸