#شقيقه_النعمان
#البارت (٢١)
" ماعُدتُّ أرضى باعتذارِكَ أَعْتَرِف
جُرحِي عَميقٌ لا يُداويهِ الأسفْ
والرُّوح عرّاها الأنين
والنّفسُ مأواها حزين
زمنًا مضيتُ بقوّتي ، والآنَ ما حولِي تَلف "
كنعان....
الدنـيت صارت ليل والحارث ما اجه ، چنت واگف اشرب گهوه بالبلكونه ،عندي خفاره بالمستشفى
اجاني اتصال من كـارمن
ابتسمت وفتحت خط ، "هلا والله؟"
"هلا بيك، شنو بشرني شلون صحة أختك ؟"
ذبيت حسره وباوعت على السمة بـيومها ضلمه ومغيمه بداية شته شهر ال١١ ...
"بـعدها حابسه روحها وما تقبل لا تاكل ولا تشرب "
"الرب يساعدها كنعان الي فقدته مو شوي
واني عرفت منك هي مخطوبه اله من سنتين! يعني مو شي بسيط"
"اي هي كلش متعلقه بي"
حطيت الكلاص على السياج وحمحمت
"تأخرت الخطبه بعد اعذريني"
"لا كنعان عفيه لتگول هيج ازعل، ميخالف اني انتظرك عمر "
ضحكت دا احچي وأشوف ظل يتحرك بالحديقه!
راح للباب من وصل يم الاظويه
هتااان!!
"كارمن شوي واحجي وياج"
قفلت الخط ، وركضت انوب الحذاء سنه ينلبس ما اندل وين شحاطات البيت ،
لبست الكلاو وركضت نزلت من الدرج وطلعت بسرعة للشارع
وين راحت بهالوقت!! ،انوب كلشي ملابسه بس ملابس بيت
شفتها تمشي يم الشارع ، رحت ركض
"هتااان" جريتهها من أيدها اندار عليه ضفنت بوجها!! مو اختي هاي!! مو اختي والله ....
كلشي بيها يختلف ،الوجه احمر دم والعيون مزلغه.
"شجاااي تسوين!! احجييي!
تعالي وياي اعالج جروحج"
وگفت تباوع عليه وهي ضايجه ، "تگدر تعالج روحي؟ أنت مو طبيب، كنعان روحي دا توجعنيييي عالجها حبـاب"
ضليت ساكت اباوع عليها، كامت متعرف توكف
رادت توگع جريتها بسرعه حضنتها حيل دموعها ما وگفت ،ضليت امسح على شعرها
هي تبچي..
"ادعيله بالرحمه ما يصير الي تسوي ياروحي"
"كنعان ليش الله ميحبني ،والله جاي اصلي اله واصوم وادعي ليش ميحبني؟ ليش كل ما اتعلق بأحد يموت؟ امي ابوي ،وهسه وقااص ليش؟"
وخرت من يمها ولزمت وجها بأيدي ومسحت دموعها
"لأن الله يحبج ، الله اذا احب عبدًا ابلاه ،
يريد يشوف أنتِ صدگ تحبي وايمانج خالص
وقاص هسه بأذن الله شهيد ،مكانة الشهيد عند الله مو شي بسيط
كدامج الحـارث، تتذكرين من توفت زوجته؟
شسوه احجي تتذكرين؟"
"معاف الصلاة ضل يدعي الها شهر كامل اعتزل الناس"
"شفتي؟ أنت هسه ليش جاي تلطمين
وقاص جاي يشوفج هو شهيد وهم أحياء
لاتخلينه يزعل منچ ،امشينه هسه نروح
نتوضه اني وياج ونقيم الصلاة وندعي اله " .
اومأت براسها نزعت الجاكيت وغطيت شعرها من گامت تمطر
لزمت ايدي قوي ورجعنه للبيت ...
الحـارث....
گاعد على الرصيف والدنيا تمطر عليه، مشبك ايديه سويه وصـافن على السمه، كلشي بهت بعيوني ...
أنت تقرأ
ما ملكت أيمانكم
Romanceمـا ملكت أيمانكم " رواية عاطفية تجمع قصص مُختلفة في غطاء الدين وهل سيثبت الدين مع كل مُغريات الحياة؟ " هتان، كنعان والحارث" تلاث اخوه لكل منهم قصة مختلفة في هذه الحياة، تابعوها معي رواية" مـا ملكت أيمانكم" وارجع واكرر، الرواية ليست رواية اباحية ولا...
