جنون الهيام (الموسم الاول ) باللهجة الجزائرية

البارت الرابع عشر

الجزء 111🍷🥀

♣️جنون الهيام ♣️ ... عندما يهيم الشيطان بملاكه 🔥🍷

Sima jarisse A.Y 🍷🥀

الاورنجية 🔥🥀 ..... الجنون ... الهيام ... إستعدي صغيرتي 🔥

شوي ودخلت رفيدة قالتي تهاني وزادت وراها إبتسام قالتي صفا قتلها ايه حمد لله قالتي واش صرا قتلها ما صرا والو قالتي تتسمخري قتلها ولله والو غير تهاوشت انا وخوك كي العادة خزرت للخاتم حكمت يدي قالتي وشنو هذا قتلها راح نتزوجو شرعو عينيهم في زوج قالتي واااش قتلها علاه تشوكيتي قالتي جهاد يسما طلبك للزواج ؟ قتلها ايه قالتي ونتي واش كاين رايك قتلها محبيتش مع الاول على هذا شفتوني نبكي قربت مني حطت يدها على خدي قالتي علابلي صعيب بصح معندكش وين تروحي ياك هزيتلها براسي هي مش فاهمتني تحوس غير على مصلحة خوها باين شكون انا ووشكون هو ..قصص إدمان سيما .. قالتي المهم سقسيت جهاد راح ندي لولاد نكسيهم قتلها ايه غير روحي قالتي ... كنت حابة تروحي معانا مي هو محبش قتلها معليش اصلا مش حابة نخرج قالتي اوكي وناضت تحكي مع لولاد باه يروحو معاها لبستهم في ثلاثة من غير سجود قعدت عندي قرب زينو باسني قالي باي ماما قتلو باي عمري خرجو وانا عاودت تكيت على جنب نخزر للخاتم لي كان ذهب فيه زوج واحد صغير ولوخر كبير جيت نحيه من يدي منبعد تفكرت كلامو المسموم .... فات الوقت وانا قاعدة نخمم حتى سمعت صوت لاصونات لتحت مع الاول حسبتلي مكان حتى واحد خليت سجود تلعب في السرير ونضت نحل حتى شفت خالتي صليحة ديجا حلت وكان فارس  تبسمت نحسو انسان مسالم خاطيه الشي ما يهدر ما يداصر ما يدير صوالح خاطيين روحت ليه قتلو سلاااام شافني ضحك حتى هو من قلبو قالي تهاااني وقرب حضني وبعد قالي صفا ختيتي توحشتك هذي غيبة قتلو الله لا يغيبك ونتا صفا قالي لباس قتلو ارواح اقعد دخلنا للصالة قعدنا قالي سمعت واش صرا ياك صفا هزيتلو بكتافي قتلو حمد لله لي جات من عند ربي مرحبا  قالي وينهم لخرين قتلو ولله لبنات خرجو وخوك معرف نطقت خالتي وهي داخلة قالتي خرج حتى هو قتلها امم معليش قعدت معانا بقينا نحكيو ويسقسي فيا وجبدنا السوجي تاع بشرى المهم ما خلينا ما هدرنا حتى تفكرت وداد خزرت في فارس قتلو معليش تديني للمقبرة نشوف القبر  تاع وداد ورفيق ويما قالي ايه مشي مشكل قتلو اوكي ضك نلبس لسجود ونجي نطقت خالتي قالتي قولي لجهاد قتلها معندي ما نقولو مدخلوش فيا وطلعت للشمبرة لبست روبة طويلة روحت لشمبرة لبنات هزيت خمار وخرجت لبست لسجود هزيتها  وهبطنا ناض فارس قالي هيا قالتو خالتي يا فارس جهاد قالها راهي معايا معندو ما يهدر خويا ونعرفو خرجنا علاما هبطت من الدروج قابلوني زوج رجال لي جابهم جهاد مع الاول قالي مدام !! نطق ليه فارس قالو روح شوف خدمتك قالو منقدرش خويا جهاد موصينا قتلو عيطلو وخبرو قالي استناي دقيقة هز تلفون وعيطلو وفارس ناض يكفر بلمقلوب قالي خماج اسيدي جهاد مكانش هكا مفهمتش لاه مداير هذو الرجاال كامل ميخافش عليكم منبعد نهدر معاه اصبري قتلو ولله خنقوني قالي معليش .... شوي ورجع الgارد قالي تقدرو تروحو في دقيقتها صونا تلفون فارس قالي روحي ركبي هذا جهاد قتلو ايه طلعت في طومبيل خاين سجود لي حجري  وهو بقى يهدر معاه .. نخزر في ليgارد واقفين في السخانة .. اللقمة تاع الحلال صعيبة بزاااف للحظة خممت انو هو مدارهمش غير على جالي بلاك حب يخدم الخير ويخدمهم  مساكن ملقاوش خدمة مالغري كامل الله يبارك طوال وخشان ..قصص إدمان سيما .. جا فارس ركب قتلو واش قالي مكان والو هني روحك .. طول طريق وانا نخزر للخاتم ونزير عليه مخي يقولي ارميه منبعد نعاود نراجع ضك كون نرميه ندير المشاكل كثر وسجود تلعب في حجري وتحب تخزر من الكارو حتى لحقنا للمقبرة بلعت ريقي نشوف في القبور تاع الناس قتلو فارس شد سجود خليها عندك انا نروح ونجي قالي تعرفي وين القبر قتلو وي راني شافية عليهم حكمها من عندي وانا هبطت عدلت خماري دخلت من البورطاي قلت " السلام عليكم يا اهل المدينة انتم السابقون ونحل اللاحقون " .. هذا الكلام ديما نقولوه وقت ندخلو للمقبرة .. مشيت شوي ونقرا في الاسماء مع الاول تلفتلي منبعد لقيتو نخزر مكتوب اسمها وقريب ليها قبر يما ... دقيقة صمت غير صوت الحشرات دور والريح يضرب بشوي حطيت يدي على التراب قريت سورة الفاتحة .. ضحكت ههه ماما نتي هي لي مجابتنيش ونتي هي لي خليتني نعاود نعيش .. بصح علابلك واش صرا فيا وقت روحتي ههه ... نحيت الخاتم ومديتو للقبر دمعت عيني قتلها شوفي علابلي ضك تزعفي مني بصح هو غصب عليا هذا الشي مزال ما تقبلت واش نحكي يا ماما .. جهاد عذبني مخلاش فيا يا ماما تهموني وقالو بلي حوست نقتل وسام اناا نقتل بنتي شكون الام لي تقتل بنتها يا ماما عرفت بلي عندي عايلة وخاوة بصح .. بصح .. ثما طرطقت بلبكا هوما ستغلوني كانو راح يبيعوني كي السلعة خويا تحرش بيا ... تكيت على القبر  هدرت بشوي وجهاد كان راح يرمي سجود بنتك لي مشفتيهاش ولا شافتك مشميتيش ريحتها .. منيش حابة نتزوج بيه مي على جال ولادي نضحي
الجزء 112 🍷🥀