දෙ ඇස් 💗

21. 💗

" දඩක් ! "

ඩොක්ටර් මගේ දිහාම බලන් කියපු දේවල් එක්ක මම විශ්වාස කරගන්න බැරි තරමේ පුදුමෙකින් ඩොක්ටර් දිහා බලන් ඉද්දි මගේ එහා පැත්තෙන් ඇහුණු සද්දෙට මම ගැස්සිලා ගිහින් ඒ පැත්ත බැලුවා. ක්‍රිශා ආන්ටි ෆේන්ට් වෙලා.. ඩොක්ටර් රූම් එකේම හිටිය නර්ස්ලා දෙන්නෙක් ක්‍රිශා ආන්ටි ගැන බලන්න ගනිද්දි මට අනුකම්පාවක් වෙනුවෙට ක්‍රිශා ආන්ටි එක්කත් කේන්තියක් ආවා.

මේක අදහගන්න බැරි විදියෙ පුදුමයක් ! කෙනෙක්ට කිව්වත් පිළිනොගන්න තරමේ පුදුමයක් ! ඒත් ඩොක්ටර්ගේ වචන එක්ක සතුටටත් කලින් මට දැණුනේ දුකක්. මගේ කොල්ලා විශේෂ වුණු හේතුව මත ජීවිත කාලෙම මොන දුකක් විඳින්න ඇතිද ? අද මගේ පැටියා ඉන්න තත්ත්වෙත් එක්ක මට කීයටවත් මේ ඇහුණු දේවල් ගැන හිතලා සතුටු වෙන්න බෑ...

මට මගේ කොල්ලව තුරුළු කරගන්න ඕනේ... දෙයියනේ මට කෑ ගහලා අඬන්න ඕනේ... අපේම බබෙක් හදන්න වාසනාව තිබිලත් අනේ අපිට එහෙම බැරි වෙයිද ? මොන ලෝකෙන් මොන බෙහෙතක් හොයන් ඇවිත් හරි මගේ කොල්ලව මම හොඳ කරගන්නවා. මට දැන් ඕන මගේ කොල්ලව තුරුලට ගන්න විතරයි. රූම් එකෙන් එළියට දුවන්න හිතන් මම නැඟිට්ටත් අම්මි මගේ අතින් අල්ලලා මාව නැවැත්තුවා.

අම්මි... අම්මිත් මේ හැම දේම අහගෙන හිටියා. අම්මි... අම්මි නෙතූට අකමැති වෙයිද ? මගේ හිතට එක පාරම මහ බයක් දැණුනා.

" දුවන්න කලින් ඩොක්ටර් එක්ක හැමදේම කතා කරල ඉමු සුදු පුතා. දැන් ඔයා දුවන් ගිහින් පොඩ්ඩව බය කරලා හරි යන් නෑනේ... දවසක නෙත්රුගේ දරුවන්ගේ තාත්තා වෙන කෙනා නෙත්රුගේ තත්ත්වේ ගැන අනිත් කාටත් වඩා දැනගෙන ඉන්න එක වටිනවා. "

" අ..ම්..මී... "

මම කොහොමද එක තප්පරේකට හරි මගේ අම්මි කවුද කියන එක අමතක කරේ... අම්මිගේ වචන එක්ක මන් ඇස් වල කඳුළු පුරවගෙන අම්මිට තුරුළු වෙද්දි අම්මි මගේ පිට හරි ආදරෙන් අතගෑවා. නෙත්රුගේ දරුවන්ගේ තාත්තා... ඒක හිතට හරිම අළුත් ඒත් සෑහෙන බර හැඟීමක්. ඒ කියන්නේ මගේ මැණිකගේ විශේෂත්වේ මගේ අම්මි ප්‍රශ්න නොකරම පිළිගන්නවා. ඉස්සරහට මොන දේ වුණත් අම්මි අපි එක්ක ඉන්නවා කියලා දැනෙන ඒ හැඟීමම හිතට පුදුමාකාර සහනයක්.