الساعه 7 الصباح تحديدا غرفه سديم كانت تقرا كتاب وللحين ما نامت تحاول تلهي نفسها باي شي دق الباب محسن ودخل وقال : للحين ما نمتي ، سديم : لا ، محسن : بتداومين؟ ، سديم : اجازه ، محسن : زين انا موجود بالبيت لو تبين شي انا بغرفتي ، سديم : تمام ابوي متى يجي ، محسن : مدري قال يمكن بكرا واذا مرا طول بعد اسبوع تقريبا ، سديم : الله يوفقه ..
طلع محسن ولا يدق جوال سديم وكان لؤي ردت وقالت : هلا ، لؤي : سديم لازم نتكلم ، سديم : تمام بس الحين؟ ، لؤي : اي ، سديم : ما نمت انت ، لؤي : لا يلا سريع الحين انزلي ، سديم : تم تم ، قامت وغيرت ملابسها وراحت لاخوها محسن قالت له ونزلت بعدها ..
....
لؤي : اركبي ، ركبت سديم وحركوا وقالت : شفيك ، لؤي كان ساكت قال : اصبري ، وصلوا عند البحر الي هذيك المره فضفضوا لبعض عنده ناظرت سديم في البحر وناظرت فيه تكلم لؤي وقال : سديم ، سديم : وش فيك ، لؤي : انا بروح القصيم ، سديم : ليه ، لؤي : بسلم على عماني وبجي ، سديم ضاقت شوي بس ما حبت تبين وقالت : الله يوفقك ، لؤي : ما بتشتاقين لي ، سديم : مدري ، لؤي : تم وحرك وراح محل عصيرات وشرا لها عصير رمان وله بعد وقلها : ذوقي ذا بتدمنينه ، ذاقت سديم وقالت : بعتمده ، ضحك لؤي ولف لها وقلها : صدق سديم ما بتشتاقين لي ، سديم اخذت نفس وقالت : برايك وش ، لؤي : برايي اي ، سديم : رايك صحيح وبعدين انا كل يوم اطلع مع مين في غيرك؟ ، لؤي : يمكن ، سديم : ان بعض الظن اثم ، ضحك لؤي وحركوا مشاها شوي وغير لها جو وبعدين وصلها لبيتهم وودعها بس قالت له باي وراحت يوم دخلت البيت نزلت دمعتها جلست تقول : شفيني انا ليه ابكي ، ما كانت تعرف مشاعرها في هاذي اللحظه ...
....
لؤي حرك طبيعي لكن في صدره ضيقه حتى هو مايدري ليه ومن وش وصل لبيتهم سلم على اهله وقالت له امه : وين رحت انت ، دلع كانت تدري وين راح ، لؤي : عند مهند ، ام لؤي : زين استودعتك الله وسلم على اخته واخوه سعد وطلع ركب سيارته وراح عند مهند وصل ونزل دق باب بيتهم فتح مهند وشافه وقال : هلا بالخوي ، لؤي : هلا فيك ، مهند : امرني ، لؤي : ابد كنت رايح القصيم وقلت امرك اول اسلم عليك ، مهند : زين ما سويت ..
عند سديم تذكرت التعليقه حقت السياره في وحده ورديه في سيارتها شرت مثلها بس سوداء ونست تعطيه وشافت ستريكه ولقته مصور مع مهند قامت من مكانها وركبت سيارتها وراحت لهم وصلت ونزلت وشافت سيارته...
مهند : من ذي اوه ، لؤي : سديم؟ ، نزلت سديم وخرت شعرها عن وجهها واخذت نفس وقالت : نسيت اعطيك ذي ، اخذها لؤي وقال : مو من جدك ، مهند جلس يضحك ، لؤي : زين انتبهي لنفسك ولا تطلعين لوحدك بدون ماتقولين لاخوك وناظر في مهند وقال : تحت امانتك هي ، مهند : ازهل ، سديم : ماني نونو انا ، لؤي : الا نونو وشالها وركبها السياره وركب لها الحزام وهي ساكته بس تناظر فيه خلص وقفل الباب وقال : توكلي على الله ، دقت له تحيه سديم وراحت ، ضحك هو ورجع لمهند ، مهند : يولد انت تحبها واضحه وربي ، لؤي ارتبك وقال : مدري يخوي ، مهند : الا تحبها ، لؤي : يوم ارجع اقولك ودعه لؤي وركب سيارته وحرك ..
....
راح عند عبدالله ، عبدالله : ارحب يبو محمد ، لؤي : البقى وسلموا على بعض ، عبدالله : اخبارك ، لؤي : بخير ابشرك ، عبدالله : امرني ، لؤي : ابد كنت رايح للقصيم وقلت امرك ، عبدالله : زين ما سويت انتبه لعمرك ولا تلف يمين ويسار خلك سيدا فاهم قصدي صح ، لؤي : فاهم ازهل وودعه لؤي وركب سيارته وحرك وبدا طريق سفره كانت المسافه من الرياض للقصيم 3 ساعات و 44 دقيقه تقريبا حرك هو الساعه 8 تماما ..
مل لوحده بالطريق فا دق على سديم سديم وقتها كانت نايمه نامت بالغلط دق هو وصحت فتحت عينها وشافت انه لؤي ردت وقالت : همم ، لؤي : اوبس نايمه اسف مادريت ، قامت سديم غسلت وجهها وقالت : ياخي لاتقول اسف الا لشي يستاهل ، لؤي : سمي وجلسوا يسولفون جلست سديم معاه لمن وصل ، وصل الساعه 11:45 تقريبا يوم دخل القصيم قال : سديم ، سديم : هلا ، لؤي : بقفل انا الحين لا فضيت طمنتك ، سديم : تم وقفل راحت سديم اخذت شاور ولبست وجهزت لان كانوا ريماس ووتين جايين عندها وبما ان محسن طلع قالت لهم تعالوا الحين ..
...
عند لؤي وصل بيت عمه نزل من سيارته واستقبله ولد عمه سالم ، سالم : ارحببب يولد العم ، لؤي ضمه وقال : البقى ، سالم : تفضل حياك البيت بيتك ، دخل لؤي وسلم على عمته وعمه وعلى وسن وسن هاذي بنت عمه الصغيره كانت مرا تحب لؤي عمرها 5 سنوات ، لؤي : هلا بوسن وشالها وباسها ، ودخله ولد عمه المجلس عشان ينامون فيه سوا ، سالم : ها تاخذ غفوه ولا نروح للعيال ، لؤي : باخذ غفوه الصدق ، سالم : اجل نوم العافيه وفتح له سالم المكيف وطفا له الانوار ، لؤي : يجعلني فداك يولد العم ، سالم : اويلاووو يلا تغط زين وطلع من الغرفه ...
...
عند عبدالله كان رايح يوصل ريماس وصل لبيتهم وكان ينتظرها انتظرها ربع ساعه وبعدها نزلت ، ريماس : سلام ، عبدالله : عليكم السلام ورحمة ، بدري ، ريماس : من عمرك ، وحركوا وصلها بيت ابو محسن لف وقال لها : لا تتاخرين لا جيت ، ريماس : افكر ، عبدالله : هذا الي ناقص ونزلت ودخلت وحرك عبدالله ...
....
وصلوا البنات بيت ابو محسن ..
سديم : بسوي لكم باستا تاكلوني وراها ، ضحكوا البنات وقالت وتين : الحين كم بيحكمون عليه ، ريماس قرصتها ، وتين : شفيك ، ريماس : انتي غبيه يابنتي جايين نهون عليها انطمي شوي ، وتين : وجع طيب ، وقامت ريماس تولع شموع ، وتين :شموع في الظهر وضحكت ، سديم :الشموع حلوه باي وقت وجلسوا يسولفون البنات سوا ..
...
مر الوقت بدون اي حدث مهم الساعه 5 المغرب ..
دخل جد لؤي الغرفه فتح النور وقفل المكيف وضربه بالعصا : قم قامت عصبك يالمنتخي ، لؤي فز وقال : سم يبه قام وسلم على راسه ويده وراح دوره المياه غسل وخلص وتوض وصلى جلس يدور سالم عشان يرحون عند العيال وسالم الوحيد الي يفهم لؤي بكل كلمه يقولها ، سالم : يولد ابطيت كل ذا نيم ، لؤي : مكيفكم زين وضحك سالم راحوا للعيال يوم وصلوا ..
لؤي : ارحبوا شحالكم ، عامر : البقى ، ياسر : يولد الامور كلها دردبيس ، سالم : قلها بشكل اخر ، ضحك عامر وقال : الامور كلها ماهي بزينه ، لؤي : افا ياذا العلم وراكم ، ياسر : تونا صرنا بخير ، لؤي : يجعلني فدا ، عامر : سذوب ذا ، جلسوا العيال يشربون شاهي ، ذاق عامر الشاهي وقال : يوه يولد شاهيك دبس ، سالم همس للؤي : يعني حالي بزياده ، لؤي : اها ، ياسر : عنك ما شربت ، ضحكوا العيال وجاب سالم سوسن ، لؤي : علامتس متكدره ، سوسن تكلمت بصوت خفيف : ابي حلاو ، لؤي : الان اجيب لتس ، سالم : انثبر انت وهي ، لؤي : سم ...
.....
عند سديم كانت جالسه بالبيت لحالها في المجلس على جوالها ضافها واحد انستا اسمه عبدالرحمن جلسوا يتعرفون وطلع معاهم بنفس الحي من الصدفه وجلست تسولف معاه وكذا في الشات ، دحوم : عندك اصدقاء عيال ، سديم : اي عندي ، دحوم : حلو ، ولبست سماعاتها وشغلت حلقه من حلقات بودكاست فنجان وكانت تغسل المواعين ...
...
عند لؤي كان في عزومه رجال كانت الساعه 10 الليل ..
وصل وسلم على كل الموجودين وجلس جنب جده جاء سالم وجلس جنب لؤي وقال : حاول تفهم عاد لا تفشلنا ضحك لؤي وهز راسه ، جدهم : وش تشتغل انت ي لؤي والله شكلك سربوت ، لؤي : افا يجد ممرض انا ، جده : ايه اشوا وانت يالسربوت رحت البقاله ، سالم : رحت البقاله يجد مير القاها صاكه ، جده : يعله المغص ، جاء عامر وجلس وفي واحد في المجلس كانوا ما يحبونه قال لؤي : شوضعه ذا ، عامر : اسفهوه ، سالم يورع لا تغز ، سالم : واخزياه بس ، لؤي : خلاص ، سالم : يسد بالقصيمي ، لؤي : اهم شي فاهمين وبعدين فهموني وش يعني لا تغز ، عامر : لاحول ولاقوه الابالله ، سالم : يعني لا تأشر ، لؤي : اها دق جواله وشاف انها سديم سوا مشغول ، عامر غمز لسالم وضحك سالم ، لؤي : علامك انت وهو ، سالم همس بصوت مرا منخفض : تحب يولد هاه ، ضحك عامر ، لؤي : مريض انت وقام وطلع ، عامر : لا يكون زعل ، سالم : لا بس بيرد عليها ، وجلسوا يضحكون ..
...
عند سديم لبست وجهزت وركبت سياره واحد ماتعرفه والصدفه طلعت سياره عبدالرحمن سلمت عليه وقالت : سلام ، دحوم : وعليكم السلام سديم صح نفس الصوت بالفويس ، ضحكت وقالت : اي اي ، ودخل محسن السياره وسكتوا وجلست هي على جوالها صورت ستريك انها برا رد على لقطتها لؤي : انتبهي لنفسك ، سديم : كل هواء ، لؤي : اف اما زعلتي اسف ، سديم : حطت نقطه على رسالتها الي قبل الي هي كل هواء ، ضحك لؤي وطلع من المحادثه وقرر يمشي الصباح لانه تعبان ..
....
عند سديم دق جوال محسن رد وقال : لازم الحين ، لاحول ولا قوه الا بالله بس ناظر في سديم الي كانت تعدل طرحتها ، محسن : سديم ، سديم : همم ، محسن : راجعين البيت ، دحوم : خلها انا انتبه لها وراجعها قبل 12 ، محسن تردد شوي ، دحوم : ماعليك ازهل ، محسن : اجل انتبهوا وراح ، دحوم : يلا بوريك الملاهي تبين تلعبين؟ ، سديم : اي اي ليش لا ، دحوم : اجل تم بوريك البيب ، ضحكت سديم وقالت : يلا وريني تحمست ، وراها وقالت : امبيييه تهبل بسم الله عليها ، دحوم : اكيد دامها حقتي ، سديم : كل البنوتات حلوين قال حقتي ، دحوم : بتصير حقتي باذن الله ، سديم : كلكم تحبون الا انا وضحكت ، دحوم : لا تستعجلين على رزقك ، سديم : صابره ماعليك ودخلوا الملاهي ...
سديم : على حسابك ولا النص بنص ، دحوم فكر وقال : التذكره كلها على حسابي الي داخل على حسابك ، سديم : ماعندي مانع ..
....
لؤي جلس بعيد عن المكان وسوا شي محد يعرف انه يسويه الا مهند و سالم ، سالم : يولد للحين ما بعدت عنه ، لؤي : هموم الدنيا وانا اخوك ، كان لؤي جالس يدخن خلص و قام وقال لسالم : برجع الرياض انا ، سالم : الحين؟ ، لؤي : اي ضايق صدري وابي اجلس لوحدي ، سالم : استودعتك الله ودعه لؤي ودخل سلم على جده و عمانه وسوسن وركب سيارته وحرك ..
...
الساعه 11 الليل عند سديم ودحوم خلصوا لعب ناظر دحوم في سديم وقال : شفيك زعلانه ولا متضايقه فيك شي ، سديم ما كانت تدري شفيها ، سديم : مدري ضاق صدري فجاه ، دحوم : اعوذ بالله يلا ارجعك البيت لا ياكلني اخوك ، سديم : تمام ، وركبت معاه السياره ووصلها البيت وصلت ودعته دخلت البيت وراحت غرفتها اخذت شاور وبدلت ملابسها وطفت النور وجلست تفكر شوي ونامت ..
عند لؤي كان في خط سفر ناظر التعليقه الي اعطته ياها سديم وبعدها دق على عبدالله بما انه الاعقل فيهم ، عبدالله : ارحب ، لؤي : البقى يحب اخبارك ، عبدالله : بخير ابشرك علامه صوتك ضايق ، كان لؤي برضو يدخن رد وقال : والله مدري وانا اخوك جتني فجاه وطلعت من المكان وحركت وانا في خط سفر راجع الرياض ، عبدالله : امداك اشتقت ، لؤي : برايك مشتاق؟ ، عبدالله : شف وانا اخوك انا لو مر يوم نفسك وانا ما كلمت ريماس والله لا يضيق خلقي و مارح اقدر انام الا لمن اكلمها انت كيف مستحمل انا مدري ، لؤي : هي دقت اول بس كنت بمجلس الرجال وسويت لها مشغول وشكلها زعلت ، عبدالله : همم انا لو مكانك سويت كذا في ريماس يبي لي اسبوعين عشان ترضى ، لؤي : اوف ، عبدالله : انت وش تحس فيه يوم تكون معاها ، لؤي : بيني وبينك انسى همومي وكانها ضماد على جروحي ، عبدالله : يولد انت هيمان واضحه ، لؤي : اههخخ يخوي شقولك حسيتها مثل القصيده تمثلني بالحرف :
" يّاسعود ماليٌ وطّن بالعاضٌ الا وطّنها
قلبي غدا واستيسره لينِ العود محد يفك
القلب ياسعود منها ساطي وكفه قديحه وبارود"
❤️❤️❤️❤️❤️❤️❤️❤️❤️❤️❤️❤️❤️
....
عبدالله : صح لسانك يبو محمد ، يولد انت لازم تعترف لا ياخذها احد منك وبعدين احس انها هي بعد تحبك ، لؤي : صح بدنك يحب ، تهقى ، عبدالله : اي والله ، لؤي : خلني افكر مع نفسي و اشوف ، عبدالله : توكل على الله وقفل ..
يتبع...
