كيان التوأمان الجزء ١ و الجزء٢ (السودا)

كلمتين عالسريع

من 3 سنين نزلت مقدمة كيان التوأمان

3سنين!!

ايون 3 سنين

نزلت المقدمة و انا مش عارفة هبدأها ازاي ولا هكتب ايه انا لسة مخلصة الديچا و نجحت نجاح مش متوقعاه و حاسة ان فكرة الرواية دي اكبر مني رغم ان تسجيلها مكانش كبير

كالعادة ماما جاتلها فكرة هنسجلها و اضيف انا حبة مشاهد عليها

تسجيل رواية كيان التوأمان الجزئين كان ساعة و نص فمقابل ان في روايات تسجيلاتها تتخطى الخمس ساعات لكن دي كانت ساعة و نص حرفيا و يمكن اقل

كتبت الجزء الاول و الصراحة مأبدعتش فيه اوي يمكن ابدعت فالسرد و ضيفت كام مشهد حلوين قربوني نفسيا من الرواية بس حسيت ان لأ انا لسة عندي احسن

بدأت فالجزء التاني بكل حماس و اللي بالمناسبة كان عبارة عن يقين و خالد فقط لا غير بس لقيتني دخلت كريم و امجد كمان معايا و ده كان تحدي بالنسبالي اني ادخل شخصيات كتير يمكن مش كتير اوي بس الروايات اللي قبل السودا كلهم كان الاساس البطل و البطلة فده كان تالت تحدي بالنسبالي لأن التحدي الاول اصلا كان الرواية و التحدي التاني اني أألف الشخصيات دي من غير الاساس اللي مفروض عندي

بدات اكتب بس للأسف جت اول عقبة و هي ثانوية عامة كنت فاكرة اني هعرف اوفق بين الرواية و ٣ث بس مقدرتش و سحبت الرواية بعد ما نزل 13 بارت كاملين و انتوا مشكورين تقبلتوا ده و بجد شكرا ليكوا جدا

بما ان بعشق الكتابة و فعليا بنسي نفسي معاها و اي ضغط نفسي بيخرج معاها فكان دايما لما اضايق امسك القلم و اكتب مشهد و ده اللي كان مهون عليا كتير

علفكرة مشهد يقين لما خطفت البقلاوة من قدام خالد  فشهر العسل ده اتكتب و انا فدرس الانجليزي 😂😂

خلصت ٣ث و مكنتش قادرة افكر فحاجة غير النتيجة و الحمد لله ربنا كرمني و حققت حلمي

خلاص بقا افضي للرواية و انزلها من تاني

بس بجد بجد بجد طلعت ٣ث ولا حاجة جمب الكلية انا اتطحنت حرفيا 😭🙂مكنتش بلاقي وقت انام و ده خلاني للأسف تنزيلي غير منتظم و ده كان مضايقني اكتر منكوا لان متعودتش اكون مش ملتزمةو الرواية شبه اتوقفت تاني و تالت و رابع انا بعترف ان الرواية مرت بظروف كتير وقفتها و خلتها تنزل بأوقات غير منتظمة بس بجد دي اكتر رواية انا حبيتها و ابدعت فيها و تعبت فيها

شكرا عشان تشجيعوا ليا دايما

شكرا عشان متابعتكوا

شكرا عشان انتوا كنتوا دايما داعم ليا و سبب اني ارجع بعد غياب

عايزة اشكر ماما كالعادة علي ابداعها فالبذرة و الزتونة بتاعة الرواية و شكرا اوي عشان دايما لو حاجة عصلجت قدامي كنت بروحلها و افكر معاها و تقولي فكرة اعملها و عارفة انها زعلت مني كتير عشان التأخير اللي كان بيحصل
ghadabader