كيان التوأمان الجزء ١ و الجزء٢ (السودا)

الفصل العاشر

كان ايمن يجلس في مكتبه في انتظار دخول المريض فهذا اليوم هو المخصص للحالات المجانية

سمع ايمن طرف الباب

ايمن :اتفضل

: يابني هو احنا داخلين عليه الحمام ايه ده

:يا تيته خلاص خشي يالا

دخل شاب و هو يسند سيده كهلة

الشاب :مساء الخير يا دكتور

ايمن :مساء النور اتفضلي يا حجة اعدي

السيدة بتبرم :مسم قال يعني مش هعد كمان مستنيه اذنك اخس على شباب اليومين دول اخس انا زمان كنت اشوف راجل كبير بس معدي فالشارع أقف على جنب و اوطى راسي فالارض اخس

كان ايمن ينظر لها ببلاهة و الشاب بملل

ايمن :بتشتكي من ايه يا حاجة

السيدة :يا حبيبي مش انت دكتور و ابوك شقي و تعب عشان يجيب الجنيه و يكفي مصاريفك و امك طفحت الكوتة يا حبيبي ذاكر يا زفت الطين ذاكر عشان بعد كل ده تقولي بتشتكي من ايه اومال انت لازمتك ايه

ايمن؛ يا أمي اانا دكتور مش حاوي يا حجة قوليلي ايه اللي بيوجعك عشان اعرف مالك

السيدة بتكبر؛ عايزة اعمل شيش اب

ايمن :نعم

السيدة :شيش اب ايه مش دكتور و بتفهم حتى الطب مبقتوش تفهموا فيه طبعا مانت تلاقيك زي الموكوس اللي قدامي ده مبتسبش التليفون من ايدك ليل نهار ج

التفت ايمن للفتى الجالس بملل :يا بني رضوي الشربيني مالها

ضحك الشاب على تشبيهه؛ تيتة عايزة تطمن على نفسها يا دكتور ابوس ايدك قولها انها زي الفل مش لازم التشيك اب ده

نظر لها ايمن بمشاغبة :ايه يا سوسو دانتي اصبي مني هو في حد تعبان يبقى أمور كدة

نظرت السيدة أرضا بخجل :ده اللي انت شايفه يا دكتور

ايمن و قد قرر قلب الطاولة :هو لو انتي تعبانة انا هكذب يعني و بعدين مانتي مزة قدامي اهه عارفة انتي الشعريتين البيض دول اللي محليينك

نظرت السيدة لحفيدها؛ شايف يا موكوس مش اقولك تعبانة تقولي روحي للدكتور ماهو قال اهو انا حلوة و مفيش حاجة اكيد امك هي اللي عايزة تجيب اجلي انا عارفاها عايزة تاخذ ابوك تحت جناحها بس على مين دانا سعاد خدني يا واد على البيت جيل بايظ

ايمن باستحقار مصطنع؛ مش عارف و الله يا سوسو ايه ده اخس لا بجد اخس تيتة حلوة يابني 

السيدة و هي تقوم بنشاط :انا برضه بقول كدة يا حبيبي يلا سلام بقى

ايمن :سلام

اخذت السيدة حفيدها و هي تعنفه تاركة ايمن المزهول