ثأر بلا إثم

الفصل الأخير

الروايه بالكامل من وحي الخيال والغرض الوحيد منها هو التسليه والخروج قليلاً من الحياه الواقعيه بكل ضغوطها@

كان غاضب بفعل خلافه مع شمس فزاده هذا الخبر غضب علي غضب..... كيف يفعل خاله هذا دون إعلامه وهو كان برفقته منذ ساعات..... صف السياره بغضب امام محل خاله لبيع الأجهزه الكهربائيه..... فتح باب المحل ثم تقدم منه هاتف بغضب رغم وجود العمال بجواره....
(ازاي يا خالي تعمل كده من غير ما تقول ليه حتي)

قلب عماد نظره بأنزعاج بين ابن شقيقته الغاضب وبين العمال الواقفين يستمعون لما يقال.... ثم تقدم من ابن شقيقته يسحبه من يده للدور الثاني حيث مكتبه قائل من بين أسنانه....
(تعالي معايه)

ادخله المكتب ثم دخل خلفه وبعد أن تأكد من إغلاق الباب جيداََ كي لا يصل الصوت للأسفل التفت إلي فارس قائل بغضب ....
(انت اتجننت يافارس.... ازاي تتكلم معايه كده قدام العمال)

هتف بغيظ....
(اتجننت من كلامك يا خالي.... ازاي تقول في القهوة ان فتحي سرقنا وان دا سبب موت ابويا مش اتفقنا من يوم العزا منقولش لحد علشان الناس متخافش وتوقف الشغل اللي شغال)

رماه عماد بنظرة عدم رضا ثم قال ببرود....
(وهو دا اللي معصبك أوي كده وخلاك تاجي تزعق ليا قدام العمال)
شعر بالخجل من فعلته مع خاله الذي طالما دعمه ولم يتخلي عنه يوم لذا قال بأسف حقيقي وان احتفظ بغضبه ....
(حقك عليا يا خالي... بس لما سمعت الكلام اللي اتقال في القهوة ما تمالكتش اعصابي)

رماه بنظر احتقار لأفعاله ثم سار لمكتبه وجلس عليه ببرود وهو يقول....
(تفتكر يا فارس انا عملت كدا ليه.... حب مني اني أذيك ولا غشامه)
شعر بعتاب خاله بين الكلام لذا نفي بسرعه....
(لأ طبعاً ياخالي.... انت اخر واحد ممكن يأذيني في الدنيا وحاشه لله اني اكون فكرت انك غشيم... انا بس مش فاهم سبب تصرفك دا وكمان ليه مقلتش ليا مع إني كنت معاك من كام ساعه)

ارجع ظهره على الكرسي قائل ببرود....
(مقولتش ليك علشان السبب كلام ماينفعش يتقال في البيت قدام حنان وشمس)
عقد حاجبيه بعدم فهم....
(ايه جاب القلعه جنب البحر.... مال مراتك وشمس بالموضوع دا)

هتف به عماد وقد انفلت عقال غضبه....
(الموضوع اصلاََ هو شمس.... الناس علي القهوة كانت بتخوض في عرضك وشرفة مراتك ونسب ابنك يا باشمهندس)

(ايه)
انفلتت من فمه مندهشه ليزيده عماد من الشعر بيت قائل بجساره....
(ايوه يافالح اللي بيقول انك غلطة مع شمس فابوك سيبك بنت عمتك قبل الفرح بساعات واتجوزتها علشان تصلح غلطتك.... واللي يقول الحمل دا من قبل الجواز واللي يقول سرقت ابوك واديتها علشان كدا طردك وقاطعك قبل موته... والكل متهمك انت وشمس انكم سبب موت ابوك بحسرته.... هاه كنت عايزني أوضح الحقيقه ولا افضل ساكت وأخلي شرف مراتك ونسب ابنك لبانه في بوق الناس)