POSSESSIVE 10: Lath Coleman

CHAPTER 22

CHAPTER 22

HINILAMOS NI HAZE ang mukha nang makabayad siya sa ospital. Wala siyang dalang pera, basta na lang siyang umuwi. 'Buti ay nakahiram muna siya ng pera kay Anniza nang tumawag siya kani-kanina lang. Ipinadala nito ang pera sa remittance center para madali.

"Salamat, anak." Walang patid ang pasasalaman ng kanyang ama.

Nginitian niya lang ito. "'Tay, wala 'yon. Ang importante, maayos na ang lagay n'yo."

Ngumiti ito. "Salamat pa rin, anak. Salamat sa pag-aalala."

Ngumiti siya at niyakap ito nang mahigpit. "Mahal kita 'Tay, siyempre mag-aalala ako sa 'yo."

Hinagod nito ang likod niya. "Mahal din kita, anak."

Hinalikan niya sa noo ang ama, saka inalalayan ito palabas ng inokupa nilang kuwarto at palabas ng ospital na yon.

Nagrenta siya ng tricycle para maghatid sa kanila sa bahay kasama ang ina at kapatid niyang babae na nasa high school pa lang. Nang makarating sa bahay, agad na inalalayan niya ang ama papasok sa loob para magpahinga. Siya naman ay doon natulog pansamantala sa kuwarto ng kapatid niya.

Haze was so tired, she fell asleep the moment her back hit the mattress.

HUMUGOT NG ISANG MALALIM na hininga si Lath bago buong tapang na kumatok sa pinto ng bahay nina Haze. Ilang minuto lang ang nagdaan nang bumukas iyon at isang matandang lalaki ang bumungad sa kanya.

"Sino ka?" Iyon agad ang tanong nito sa kanya sa istriktong boses.

Napalunok siya kasabay ng kaba na naramdaman. "Ahm, ako po si Lath Coleman, ang asawa ho ng anak n'yong si Haze."

Tumaas ang isang kilay nito. "Diyan ka lang, huwag kang aalis." Isinara nito ang pinto at nang bumukas iyon uli, may hawak na itong itak.

Shit!

"Kung wala kang magawang hinayupak ka sa buhay mo, huwag mong idamay ang anak ko!" Itinaas nito ang itak at ang tatagain siya.

Nanginginig ang kamay na hinugot niya mula sa bulsa ang marriage contract nila ni Haze at ipinakita iyon dito. "Nandito ang pruweba na kasal kami."

Natigilan ang matandang lalaki. Nakahinga siya nang maluwag. Shit! 'Buti na lang palagi niyang dala ang marriage contract nila ni Haze.

"Elizar, sino yan?" sabi ng boses mula sa loob.

Huminga nang malalim ang matandang lalaki at niluwagan ang bukas ng pinto. "Ang manugang daw natin, Haide."

Namilog ang mga mata ng ginang nang lumapit sa pinto at tumingin sa kanya mula ulo hanggang paa. "Manugang?"

Naiilang na ngumiti siya. "Opo, ako po si Lath Coleman. Ako po ang asawa ni Haze. At kung may dapat man kayong malaman tungkol sa akin, iyon pa ay mahal na mahal ko ang anak niyo. Sobrang mahal na mahal."

Lumambot ang mukha ng ginang. "Pasok ka, hijo."

"Nadala ka sa pinagsasasabi niya, Haide?"

Ngumiti ang ginang sa kanya, hindi alintana ang asawa. "Pasok ka na."

Ngumiti siya at pumasok. Thank heavens.

HINDI ALAM ni Haze kung ilang oras siyang nakatulog basta nang magising siya, gabi na. Naririnig niya ang huni ng mga hayop sa labas.

Nag-inat siya, saka bumangon mula sa pagkakahiga. She yawned and a startled gasp escaped her lips when she saw the man sitting on the edge of the bed.

"L-Lath?"