Hikbi
Ika-25 ng Marso 2010
Gabi-gabing agam-agam
Sa puso nakatarak ang dinaramdam
Pag-aalalang kanyang ikinaaaba
Damdaming mayroon lamang sa mga ina.
Pilitin mang bumangon sa maghapon
Walang magagawa ang pagiging abala at tikom
Panlabas ay mukhang mahinahon
Sa rosaryo ang kapit, malampasan ang hamon.
Ilang araw pilit nagpapakatatag
Sa labis na pag-aalala siya ay bihag
Kay hirap tumayo sa kuyos na haligi
Liwanag niya animu'y mapupundi.
Minsan sa buhay dumarating ang panahon
Pagsagwan taliwas sa nakasanayang alon
Manunumbalik din ang dating mithi
Uusbong ang mga bagong binhi.
Ngunit gaano man katatag at positibo
Magdasal man ng 'sang libong rosaryo
Bara sa lalamunan, maibalik ang sigla't ngiti
Kailangan maibuhos ang lahat sa isang hikbi.
BINABASA MO ANG
ANG MGA NAIKUBLING TULA ("The Kept Poems")
PoetryAng aklat na ito ay naglalaman ng mga orihinal na tulang isinulat ng may akda sa wikang Filipino sa nakalipas ng labing-limang taon. ("This book contains original poems written by Helen Cheng in Filipino in the past fifteen years.")