HINDI makatingin ng diretso si Rena sa mga mata ni Erman. Nahihiya siya matapos nitong ikuwento kung paano siya nagtapat ng damdamin niya para rito. Parang ayaw niya itong paniwalaan.
"Baka hindi naman talaga ganoon ang ginawa ko, Erman. Parang ang OA ko."
"OA ka naman talaga. Pero ang cute mo kapag nagdadrama ka. Pero siyempre hindi ka maniniwala dahil kuwento ko lang 'yon. Pero iyon talaga ang totoong nangyari. Pagkatapos noong nangyari sa yate, ang smooth na ng pagsasama natin. Kahit napakasalahe ni Derek, nagpapasalamat pa rin ako sa kanya dahil nakatulong kahit papano ang kalokohan niya para malaman kong mahal mo rin ako," sabi nito.
"Salamat, Erman. Salamat din sa cashew nuts."
"Ah, speaking of cashew nuts, may nakuha akong marami niyon sa isang grocery sa Maynila. Hiniram nga ni Sandro ang isa para daw ibigay sa 'yo."
"Puwedeng pahingi?"
"Ano ka ba? Para naman talaga sa 'yo ang mga 'yon." Tumayo si Erman.
Sumunod siya rito hanggang sa kuwarto nito. Napangiti siya nang makita ang isang malaking kahon na puro nakaplastic bottle na cashew nuts. Imported pa ang iba. Namili na siya ng isa na uunahin niyang kainin. Umupo siya sa kama ni Erman at doon binuksan ang isang bote at pinapak ang nuts.
Tumigil siya sa pagsubo nang makita niya si Erman na naghuhubad ng damit. Biglang uminit ang pakiramdam niya habang nakatitig siya sa maskuladong katawan ng binata. Naghubad na rin ito ng pantalon.
"I'll take a bat," sabi nito saka hinablot ang tuwalya na nakasabit sa likod ng pinto at ipinulupot sa ibabang bahagi ng katawan nito.
Tumango lang siya. Nagpatuloy siya sa pagsubo ng cashew nuts.
Nakalahati na niya ang laman ng bote nang lumabas ng banyo si Erman. Basa na ang buhok nito. Nalalanghap niya ang mabangong sabon na ginamit nito. Sinundan niya ng tingin ang binata hanggang sa huminto ito sa tapat ng malaking closet nito. Tumapat ito sa malaking salamin.
"Ang bango mo, babe," sabi niya rito.
Awtomatikong humarap sa kanya si Erman. Nakangiti ito. "Baka gusto mo ring maligo," anito.
"Hm?" tumikwas ang isang kilay niya.
Inilapag niya sa ibabaw ng misa ang bote ng cashew nuts saka niya binalikan ng tingin si Erman. Kumislot siya nang masipat niya ang imahe ng isang lalaki sa likod ni Erman buhat sa salamin. Nakaharap sa salamin si Erman habang nagsusuklay ng buhok. Kumurap-kurap siya. Biglang nawala ang lalaki.
Baka nagmalik-mata lang siya. Tumayo siya at pumasok sa banyo. Binuksan niya ang shower habang isa-isa niyang hinuhubad ang saplot niya sa katawan. Pagkuwa'y itinapat niya sa tumatagistis na tubig ang kanyang ulo. Mabilis ding nabasa ang buong katawan niya.
Sa kanyang harapan ay may malaking salamin. Dinampot niya ang sabon at mahinhing ihinagod sa kanyang katawan, lalong-lalo na sa kanyang dibdib. Pumikit siya. Habang lumilipas ang sandali ay nararamdaman niya na parang hindi na niya kamay ang humahagod sa katawan niya. Unti-unti ay inaalipin ng bayolenteng init ang kanyang buong sistema.
"Hmmmm..." umungol siya.
May naririnig siyang boses ng lalaki na bumubulong sa tainga niya pero hindi niya maintindihan ang sinasabi. Dumilat siya ng mga mata nang makaamoy siya ng malansang dugo. Pagtingin niya sa kanyang kamay ay binabalot ito ng dugo. Hinarap niya ang kanyang sarili sa salamin. Doon niya nalaman na hindi tubig ang lumalabas sa shower kundi dugo. Pero hindi siya nakadama ng takot, sa halip ay humihilab ang sikmura niya. Naroon pa rin sa sistema niya ang init. Kumurap-kurap siya. Biglang naglaho ang dugo. Pinihit niya pasara ang shower.
