High School Zero

Chapter Two

Chapter Two

"Alpha!" malakas na tawag ng isang estudyante habang kasalubong sa hallway ng school ang kanilang Alpha. "N-narinig nyo na ba ang balita?" humihingal nitong tanong.

Tinignan lang ni Alex ang kaklase. Hindi interesado sa sasabihin nito.

"Bakit, ano ba 'yon Joel?" tanong ni Lau na katabi ni Alex.

Ngumiti si Joel. "Hindi kayo maniniwala sa sasabihin ko—"

"Oh my gosh! Nandito ang tagapagmana ng mga Pendleton!" sabi ni Kyla na katabi ni Alex. Nakatingin ito sa cellphone na hawak.

Nakaramdam ng iritasyon si Joel sa babae. Siya dapat ang nagsabi non, hindi ito. Para saan pa ang pagtakbo niya para mahanap ang Alpha nila? Binigyan niya ito ng masamang tingin. Kaagad naman itong binatukan ni Lau nang mapansin.

Napatingin si Alex sa katabi. "Ano'ng sinabi mo?"

"Nandito siya. Sa class 1-A!" sagot ng girlfriend niya.

Hindi nag-aksaya ng oras si Alex. Kasunod niya si Lau na pumunta sa direksyon ng classroom ng mga first years.

Naikuyom ni Alex ang kanyang kamao at isang ngiti ang sumibol sa kanyang labi. Sa wakas ay dumating na rin araw na pinakahihintay niya! Makakaharap na niya ang anak ng pinakanire-respetong hari ng Pendleton High.

Nakita niya ang classroom ng class 1-A, pumasok sila ni Lau na walang pakialam kung may klase sa loob. Huli na nang maalala niya ang rules ng school. Mabuti nalang at walang teacher sa loob. Ngunit ang mas ikinagulat niya ay hindi siya ang nauna roon.

Nakita niya si Reo, ang alpha ng class 2-A. Hindi ito nag-iisa, kasama nito ang beta nitong si Gabe.

"Nasaan siya?" tanong ni Reo sa isang lalaking freshman.

Napansin ni Alex ang limang lalaking nakasalampak sa sahig. Kung titignan mabuti, mukhang may away na naganap. Mukhang pati si Reo ay nakalimutan ang school rules.

"Hah. Mukhang iisa lang ang ipinunta natin dito," puna ni Alex kay Reo.

Napatingin sa kanya si Reo saglit.

"H-hindi ko sasabihin kung nasaan siya!" matapang na sagot ng lalaking kausap ni Reo. May dugo ito sa gilid ng bibig at kahit halatang natatakot at nagawa parin magmatigas.

Nag-taka si Alex. Hindi niya maintindihan kung bakit nagmamatigas ang estudyante. Pinoprotektahan ba nito ang prinsipe? Tumingin siya sa paligid, nakatingin lang ang mga kaklase nito sa kanila. Halatang natatakot pero walang nagsasalita. Hindi kaya... Napili na ba ito bilang Alpha kahit na wala pang tournament? Imposible. Wala pang nagiging alpha dahil sa desisyon ng buong klase. Hindi iyon ang batas ng Pendleton High.

Dalawang oras palang simula nang mag-umpisa ang klase. Ano ang nangyari sa loob ng kakaunting oras na iyon? Paano napasunod ng taong iyon ang buong klase nito? Ganoon ba ito kalakas?

"It's no good, Reo," awat ni Gabe sa alpha nito. "Kung mag-aaksaya pa tayo ng oras dito, baka maunahan tayo."

"School rules, Reo. Hwag mong kakalimutan," paalala ni Alex. Tumingin siya sa freshman. "Hindi ko lang maintindan kung bakit nyo siya pinoprotektahan. Siya na ba ang Alpha ninyo?"

"M-maiintindihan ninyo kapag nakita nyo siya," sagot ng isang babae na nasa dulo ng classroom.

Kung ganon ay tama siya nang hinala. Natatakot ang mga ito na mag-salita. Dahil kung hindi iyon, ay wala na siyang maisip pang ibang dahilan para sa kilos ng mga ito.