MARHAM

Ashq hain tu kya howa

Sameer ko hospital men thora kaam tha tu vo der tak ruka howa tha aur Haya ki tu adat thi ghar der se jaane ki. Haya apna kaam samet kar nikalne hi lagi thi jab ose Sameer apne room men kaam karta dikhaye diya tha. Haya ne ahista se darwaza khola aur andar chali gaye.

"Motu abhi tak ghar nhi gaye?"

Sameer ne foran oski taraf khafa si nazron se dekha.

"Dr.Sahiba hame mota keh kar hamari tauheen na ki jiye."

Vo khilkhila kar hasi thi Sameer ki baat pe.

"Aur khao kheer aur han Sameer konsi urdu adab ki classes le rahe ho."

"Men koi classes nhi le raha yaar yahan kaam se fursat nhi milti classes mene khaak leni hain."

"Ghar jaon gi tu nana poora interview len gi tumhare baare men. Chalo ghar chale jao der ho rahi hai."

"Jab men kehta hon tab tu meri baat manti nhi aur aap ko mera khayal kab se aa gay."

"Nana ki wajah se keh rahi thi men tu.

"Jee jee bilkul."

"Men ja rahi hon Allah hafiz, nana ko call kar lena warna saari raat pareshan rahen gi."

"Itna gussa na kiya karen Dr.Sahiba, bahir tak tu sath le jao."

"Acha jaldi karo."   

Vo apni cheezen samet'te khara howa tha. Vo gaari tak pohanchne tak khamosh hi raha tha.

"Kya howa Sameer itni der khamosh rehte tu nhi."

"Pata nhi kyun Haya aaj Mom Dad buhat yaad aa rahe hain."

Haya ko buhat bura laga tha Sameer ke lie.

"Tum tu lucky ho, atleast you got sometime to spend with them. Mujhay dekho men tu ye tak nhi janti ke vo zinda bhi hain ke nhi."

Sameer oski taraf khaali khaali nazron se dekha tha.

"Ajeeb hai na zindagi bhi, insaan ko kitna be bas kar deti hai Haya."
    
Vo sar han men hila gaye thi.

"Zyada serious nhi ho gya Sameer."

"Pinch me, is this really you Haya. Jo har waqt serious rehti hai vo keh rahi hai ke serious ho gaya zyada."

Vo muskurai thi oski baat pe.    
     
"Agar dost ka mood theek karne ke lie apko apni sanjeedgi khatam karni pare tu kya harj hai."

Vo bhari bhari ankhon se Haya ko dekhne laga tha.

"No this is not you Haya."

"Uff Allah!! Sameer."

"See Haya you can't tell me to go   men tu already bahir hon."

"Ghar chale jao warna mere hathon qatal ho jao ge."

"Acha acha ja raha hon."

Vo jane ke lie mura hi tha ke vo dobara palta.

"Nana ko bata dena ke I missed her."

"Bata doon gi aur koi khidmat mere laik."

"Nhi abhi ke lie yahi theek hai."

Vo ye keh kar mur gaya tha. Phir vo dono apni apni gaariyon men bheth kar ghar chale gaye.
                  ..........................
Haya ne ghar pohanch kar apne kapre badle the.

"Haya khana kha lo."

"Nana dil nhi hai."

"Is dil ko samjha lo warna maar khae ga ye mujh se."

"Nana waqei dil nhi hai, hospital ki canteen se snacks kha lie the."

"Apna khyal rakhti nhi ho pata nhi kya fazul cheezen khati rehti ho."

"Acha na nana mujhay na danten please."

"Tum nhi sudhro gi, acha mujhay batao Sameer kesa hai, aaj milne hi nhi aaya."

"Vo nana aaj osko kaam tha tu hospital men bhi der tak ruka howa tha aur aap fikar na karen ghar bhej ke aayen hon apke ladle ko. Keh raha tha ke nana ko bata dena mene onhe buhat miss kia."

"Theek tu tha na vo? Vo jab bhi pareshan hota hai tu apna work load bhara leta hai aur apne aap ko kamon men magan kar leta hai."

"Ab men aap ko bataon gi tu aap pareshan ho jaen gi."

"Nhi Haya mujhay batao."

"Mujhay keh raha tha ke ose oske mom dad yaad aa rahe hain."

Nana ke chehre pe pareshani saaf zahir ho rahi thi. Haya pareshan thi lekin osne zahir nhi kiya tha.

"Mujhay oske ghar le jao."

Haya chonki thi.    

"Phir ose bula lo aur Chand lala se kaho guest room saaf kar de."

"Relax nana men ose call karti hon.
Chand lala guest room saaf kar den."

"Men zara isko dhek aaon zaroor koi na koi kaam kharab kare ga."     
Nana waqei aik dam se buhat pareshan ho gayen thin, vo Sameer ke maamle men kaafi hasaas thin.
Haya ne apne purse se apna phone nikala aur Sameer ka number dial kiya. Haya ka number dekha tu vo jo apne mom dad ki pictures dekh ke ro raha tha, anso saaf kar ke seedha howa tha.

"Aslamalaikum."

"Walaikumaslam."    

"Sameer kya kar rahe the?"

"Vo men......kuch nhi."

"Sameer tum ro...rahe ho?"

" nhi yaar."

"Mujh se jhoot na bolo."

"Acha mujhay batao kheriyat hai is time pe phone kia?"

"Apki nana ko bata diya tha ke aap kuch theek nhi hain aur onhon ne poora ghar sar pe utha lia hai."

"Haya onko kyun bata diya vo younhi pareshan ho gaye hain."

"Vo mujhay keh rahi thi ke men onko tumhare ghar le aaon, phir jab mene kaha ke 12:00 baj rahe hain tu kehne lagin ke tumhe bula loon. Onhon ne tu guest room bhi ready karwa lia."

"Acha theek hai men ata hon."
                  ........................
Haya ose khud darwaza kholne gaye thi.

"Aslamalaikum."    

"Walaikumaslam."           

Sameer Haya ko dekh ke vese hi muskuraya tha jese vo pehle          muskuraya karta tha, apne har dukh aur dard ko chupae.

"Sameer kamazkam mera samne tu mat chupaya karo apni problems, muskuraya nhi ja raha tu mat muskurao."

"Men jitna marzi chupa lon, tumhe hamesha pata chal jata hai."

"Halka na lijiye ga mujhay."

Vo dobarah oski baat sun kar muskuraya tha aur chalte chalte vo dono ghar ke andar dakhil ho gaye the.

"Mera beta aa gaya."

Sameer ne jhuk kar nana se pyaar liya.

"Kesi hain aap nana?"

"Men theek hon lekin mene suna hai me mera beta kuch theek nhi hai."

"Oo hoo nhi nana men theek hon bas aise hi..."

"Haya khana garam kar lao tum ne khana nhi khaya aur mujhay pata hai Sameer ne bhi nhi khaya ho ga."

Sameer ne jese hi suna tha ke Haya ne khana nhi khaya tu vo aik nazar Haya pe daal gaya tha jo nazren churane men masroof thi. Vo janta tha ke osko parwaah hai lekin vo zahir nhi karti.

"Men khana le ke aati hon."

Vo ajeeb kashmakash men thi, wahan se chale jana hi behtar laga tha ose.
                      .......................