MARHAM

Haq se

Haya, Sameer aur nana, sham ki chai pee rahe the.

"Sameer, Haya tum dono jao aur kapre le aao. Men zyaa dair chal nhi sakti, apni pasand se le aao ja ke. Agle jumme ko nikkah ke sath aik chota sa function rakh lete hain. Tum dono ke doston ko bula len ge."

Vo dono nana ki baat par sar hila gaye the.

"Nana aap mujhay meray suite ka colour decide kar den, mujhay itne saare colours men samajh nahi aaye ga."

Haya ne nana se kaha tha.

"Sameer se pocho, vohi bataye ga."

"Nana phir wahan ja kar hi dekh len ge, vese bhi doctor sahiba ki shaan ke mutabik cheezen kam hi milti hain."

Haya, Sameer ko ghoor gaye thi.

"Aur beta ghar ki koi cheez.."
"Nana aap mujhay apna beta kehti hain na tu in mamlaat men mat paren Haya ki har zaroorat meri zimahdaari hai."

Nana muskura hi saki thi oski taraf dekh kar.

"Beta men tumhare hone ka jitna shukar ada karon utna kam hai."

"Men apne aap ko aap ka beta keh kar khud ko buhat khushnaseeb samajhta hon."

Sameer ki baat khatam hote hi Haya khaans gaye thi, apne hone ka ehsaas dilane ke liye.

"Mujhay bhi koi pooch le."

Vo dono has gaye the Haya ki baat pe.

"Men tu kehti hon aaj hi lene chale jao kapre phir agar size wagera men masla howa tu time par theek bhi ho jae ga."

"Chalen uthen doctor sahiba."

Vo apni gaari ki chabiyan hath men liye khara howa tha jab Haya bhi apni gaari chaabiyan thaame uthi thi.
Nana Chand lala ke pas kitchen men gayein thin.

"Kya dekh rahe ho?"

"Chaabiyan."

Vo pehle oske hath ki taraf dekh gaya aur phir apne hath wali chabiyan Haya ko dikha gaya.

"Mera sath jana hai apne."

"Pooch rahe ho ya bata rahe ho?"

"Bata raha hoon, haq se."

Vo muskura gaya tha apni baat mukamal karte.

"Haq ki baat na karen abhi, doctor sahab."

Vo khikhila kar hassa tha oski baat par aur os ke hasne ki awaaz sun kar vo muskuraye bager na reh saki.

"Dost hi samajh kar chalo mere sath."

Vo sar han men hila gaye thi apni gaari ki chabiyan hath se table pe rakhte.
Vo dono gaari men khamosh hi rahe the, shayad yahi behtar tha. Kuch der baad vo market pohanche the, kapron ke ooper nazren duraate vo idher udher dekh rahe the.

"Haya mujhay tu kuch samajh nhi aa raha."

Vo uktaya howa bola tha.

"Mujhay bhi."

"Acha aik kaam karte hain, mera lie tum select karo aur men tumhare liye karta hon."

"Theek hai."

Kuch der baad on dono ne kapre select kar liye the. Haya ne oske liye dull gold sherwaani select ki thi aur Sameer ne oske liye white colour ka lenga select kiya tha, jispe buhat kam kaam hua tha. On dono ko hi aik dosre ki pasand par koi aiteraz nhi tu vo kapre onhon ne khareed liye. Nana ko bhi vo kapre buhat pasand aaye.
                    ......................

Haya kitchen men chai banane gaye thi tu Sameer oske peeche kitchen men gaya tha.
"Kya kar rahi ho?"

"Chai bana rahi hon."

Vo shelf se laga khara tha.

"Haya tumne kuch bola nhi bas sar hilaya tha jab mene kapron ke baare men poocha, jo mene meri pasand se liye the."

"Mujhay vo waqei buhat pasand aaye hain, kitna sochte ho Sameer."    
"Nahi mujhay pata nhi tha na ke tumhe kya cheez pasand hai."
"Mujhay vese bhi white colour pasand hai."

Vo muskura gaya tha ye jaan kar,       osko bhi safed rang buhat pasand     tha.

"Ab has kyun rahe ho?"

"Baad men jaan jao gi."

"Uljhi hoi baten tu men kiya karti thi, ye tumhe kya ho gaya hai."

"Pyaar....nhi paani....peena hai mujhay."

Vo foran wahan se hat gaya kyunke vo janta tha ke vo osse kuch na kuch utha ke maar de gi. Vo oski harkat par hassi hi thi sar jhukaye. Vo glass men paani bharte hi kitchen se bahar chala gaya tha.

"Sameer kuch keh diya osne?"

Nana Sameer ko bahar ata dekh kar bol gaye.

"Is baar mene keh diya tha."

"Kya?"

"Kuch nhi nana."

Nana sar hila gayen thin.
Kuch der baad Haya chai le ke aai thi.
Sameer ne cup utha kar chai peena shuro ki thi aur kuch der baad jab nana ne chaye pi thi onko chai karwi lagi thi.

"Sameer chai kesi lagi?"

Nana Sameer se pooch gaye.

"Nana buhat achi hai."  
   
Nana sar hi hila saki thi.
Vo bager waqt lagaye keh gaya tha. 

"Haya chai men kya dala hai beta?"

Haya kuch na samajhte howe apni chai men se ghoont bharte ajeeb shakal bana gaye.     
 
"Uff, nana mene namak daal diya chai men galti se."

"Aur in sahab ko dekho bagair kuch kahe chup chap chai pee gaya."

Nana Sameer ko dekhte keh gayein.

"Men khud bana ke laati ho chai."

Nana uthin thin.
Vo khamosh bethe rahe the nana ke jaane ke baad, thori baad Haya ne bola tha.

"I'm sorry Sameer."

"Sorry waali kya baat hai Haya, galti tu sab se ho jaati hai."

"Nahi peeni thi na chai, bol tu dete karwi hai."

"Jisne itni mehnat se banai thi ose bura lagta."

Vo muskura gaye thi.

"Tum nhi badal sakte, kabhi apne baare men bhi soch lia karo."

"Tum ho na, soch lia karna mere baare men."
                   ........................

Nikkah ka din aa gaya tha. Nana ke lakh baar kehne pe Haya makeup karwaane ke liye raazi hoi thi. Driver ne osse parlour chora tha. Jumme ki namaz ke baad nikkah tha aur sham ko aik chota sa function tha.

"Ma'am aapne baal khule rakhne hain."

Vo jo oske baal bana rahi thi os se pooch gae thi.

"Aik minute men apko batati hon."

Haya kuch na samjhte howe Sameer ko text kar gaye.

"Baal khule choron ya bandh loon."

Vo oska message dekh kar has gaya tha.

"Bandh lo."

Vo oska message parhte os larki se keh gaye.

"Aao mere baal bandh den."

"Okay ma'am."
                     ........................