MARHAM

Birthday Gift

Vo teeno raat ko hi London se wapis aaye the. Haya aur Sameer dono hi ko hospital jana tha subah. Sameer raat ko ghar chala gaya tha. Haya abhi hospital men hi thi jab Sameer oske ghar chala gaya tha.

"Bataya phir osse Doctor Sahab?"

"Nana abhi tu nhi bataya, baat baad men hoti hai mujhay bahar nikal jaane ko pehle bol det hai."

Nana hassin thi Sameer ki baat par.

"Soch lo Sameer abhi bhi waqt hai."

"Nana ye mera akhri faisla hai."

"Konsa akhri faisla motay."

Sameer aur nana ne mur kar dekha tu wahan Haya thi.

"Vo...kuch nhi aise hi."

"Haya betho men khana laati hon."

Sameer apni jagah se utha tha.

"Nana men chalta hon der ho gaye hai."         
               
Vo nana ke samne, pyaar lene ke liye jhuka tha. Haya ne jo hath ose rokne ke liye uthaya tha ose vo wapis apni god men rakh gaye thi.
                  ........................

"Haya kidher ja rahi ho?"

Sunday tha tu Haya ghar men hi thi.

"Nana vo aaj Sameer ki birthday hai na oske liye kuch lene jaa rahi hon."

Nana muskura gayen thin.
Ghante baad vo wapis aaye thi tu oske hath men aik safed rang ka pinjra tha jiske ander do Australian parrots the.

"Arre Haya ye kya?"

Haya on parindon se nazar hatate nana ki taraf dekhi.

"Nana, Sameer ko birds buhat pasand hain. Aapko yaad hai jab ham oske ghar gaye the tu wahan garden men aik aur chota sa garden tha, jo jaliyon se covered tha?"

Nana han men sar hila gayein thin.

"Wahan oske birds hain, mene andar ja ke tu nhi dekha lekin vo bahir se buhat khubsurat hai."

Nana ke chehre pe aik ajeeb sa itmanan tha. Nana kuch der baad kitchen men apne ladle bete ki pasandeed kheer banane chalin gayen thi. Haya ne os pinjre ko table pe rakh tha, vo khud on parindon par nazar jamaye bethi thi. Onko uchalta dekh kar vo khilkhila kar has rahi thi. Kuch der baad ose ehsas howa ke koi ose dekh raha hai. Pinjre ki dosri taraf osne Sameer ko dekha tha, vo hamesha ki tarah muskura raha tha.
Vo aik dam se osse dekh kar sanjeeda hoi thi.

"Aslamualaikam doctor sahiba."

"Walaikumaslam."

"Haya parindon ka shauq kab se ho gaya?"

"Ye meray thori na hain."

Sameer uljha tha.

"Tu phir kis ke hain?"

"Birthday hai na tumhari ....tumhare liye hain ye."

Sameer heraan howa tha.

"Tumhe yaad tha?"

Vo sar han men hila gaye thi.

"They are adorable Haya, thankyou so much."

Vo muskurai thi.

"Your welcome and yes Happy Birthday."

Vo sar hila gaya tha, parindon ko dekhne men zyada hi masroof ho gaya tha vo.

"Happy Birthday Sameer."

Nana, Sameer  ke mun men kheer ka chamach daalte bolin thi.       
       
"Thankyou so much nana."

Haya on dono ko dekh kar muskurai thi. On logon ne sham ki chaye ke sath hi cake kata tha. Nana ab kuch der araam karne gayen thi.

"Haya."

Vo dono lounge men bhethe the.

"Bolo."

"Pata hai jab mom dad zinda the na tab meri har birthday ham sab celebrate kiya karte the aur mujhay gift men vo bhi birds gift kiya karte the. Mujhay buhat acha laga ke tumne meray liye vo khareede."
"Mujhay kushi hai ke vo tumhe pasand aaye."

"Lekin os se zyada khushi mujhay tumhe on ke sath khilkhila kar haste dekh ke hoi thi."

Vo uljhi thi oski baat par.

"Aaj kal buhat uljhi hoi baaten karte ho khair hai?"

"Khair hai bhi aur nhi bhi, kisi ko kuch batana hai lekin vo sunta hi nahi."

Haya bare gaur se oski baat sun'ne lagi.

"Meri advice hai ke oske pas jao aur gusse se kaho ke baat sune aur jo kehna hai vo bol do."

"Aur agar gussa os shakhs pe na kiya ja sake tu?"

"Phir bhi gussa karo."

"Har cheez gusse se karwaane ka plan hai madam ka."

"Kya kaha?"

Vo sar na men hila gaya tha. Vo khara howa tha apni jagah se, Haya osse sar uthaye dekh rahi thi. Sameer ki height lambi thi aur Haya bhethi hoi thi. Sameer ne apna sar jhukaya howa tha.

"TU SUNO KAAN KHOL KAR, ACHI LAGTI HO TUM MUJHAY."

Haya ka mun khula ka khula reh gaya. Vo kuch der baad sans bahal kar ke boli thi.

"Ye baat araam se nhi ki jaa sakti thi."

"Khudi tu kaha tha gussa kar ke baat sunaon."

"Uff Sameer! Acha meray sath bahar garden men chalo kuch batana hai."

Vo ose apne sath bahar le ke gaye thi. Vo dono garden ki kursiyon pe aamne samne bethe the.

"Jaante ho men London kyun gaye thi."

"Kyun ke tumhe laga ke mene tumhara yaqeen tor diya aur tumhe itni ehmiyat bhi nhi di ke zindagi ki itni bhari khushi tumse chupai."

"Nhi Sameer ye wajah nhi thi. Mujhay tum pe yaqeen tha aur men janti thi ke ye sab jo ho raha hai koi baat tu zaroor hai. Men yahan se chali gaye jab mujhay ehsas howa ke jis din tumhari sach men shadi ho gi tab kya ho ga. Pichle kuch maheenon men jo hamare beech men betaqalufi aa gaye thi men os se dar gaye thi. Mujhay bahana chahie tha tumse door jaane ka. (Vo ro rahi thi.) Mujhay maaf kar do Sameer lekin mujh men dubara tootne ki himmat nhi thi."

"Mujh se baat tu karti, tumhe kya zaroorat thi yun sab kuch chor jaane ki."

"Ham dono buhat alag hain Sameer, tum meray se achi larki deserve karte ho. Tum hamesha kush rehne waale insaan ho lekin men, men tu khush rehna jaanti hi nhi hon. Pata hai Sameer ham insaan jo hote hain na, vo hamari khud ki wajah se nhi hote. Hamare aas paas maujood log aur halaat hame vesa banate hain jese ham hote hain. Mene bachpan se buhat dukh dekhen hain. Meray lehjay men vohi talkhi hai jo mene sahi hai."

"Haya tum nhi tu koi aur nhi aur khabar daar kisi aur ki baat ki,  tum jesi ho mujhay vese pasand ho. Men kisi farq ko nhi janta, aur na hi mujhay koi farq parta hai."   

Vo rote howe muskurai thi.

"Reh lo ge mujh jesi sariyal insaan ke sath?"

"Begair aitraaz kiye doctor sahiba."

"Vo nana...."

"Apse pehle onko bataya tha."

Vo ghoor gaye thi Sameer ko.
                     .......................