الأم: الخير اقفل الموضوع دا و زح من وشي بلا البركة بلا كلام فارغ معاك
الخير: ليه يا امي حرام عليك والله انا دايرها على و غيرها ما داير
الأم: ما تدور ان شاء الله عنك ما عرست
الخير: خلاص يا امي ممكن اعرف السبب شنو؟
الأم: بس كدي دا
الخير: لكن يا امي هي بت اختك شقيقتك مالك ما دايراها و هي بت طيبة شديد والله و امها كمان و ما حصل شفنا منهم شي
الأم: انت بتشوف ؟. بشوف أنا دي و بعرفهم تمااام
الخير: يا امي اختك دي يعني كعبين ليه مالهم عملو ليك شنو
الأم: يا ولد اسكت دي اختي و انا بعرفها اكتر من اي زول زولة حاقدة و دنية و انا في خساستها ما شفت
الخير: ليه لكن يا امي نحنا طول عمرنا ما شفنا منهم شر والله و اطيب ناس في اهلنا ديل كلهم خالتي بخيتة و بناتها و كمان اكتر بنات مهذبات في العيلة و ما حصل شفنا منهن شي ...
جات اختو من جوة اسمها (منى ) قالت ليهو شنووو اكتر بنات مهذبااات ؟ ههههههههه و الله كاتلات ضلهن ساااي و البركة دي بالذات
قام الخير على حيلو و مشى عليها و قال ليها و هو بخبت فيها في كتفها : اوووول شوفي روحك بعدين اتكلمي عن البركة صورك المالية السوشيال ميديا و الانستا عليك الله اتلهي و امرقي من الحوار دا بالله
اتغاااظت و دخلت جوة رجع قعد جنب امو قال ليها : اها يا امي علييك الله يا امي وافقي ياخ
الأم: هوووووي يا ولد اختار اي بت في العالم دا كلو إلا بنات بخيتة اختي ديل
الخير: ليه لكن يا امي عليك الله
الأم: يا ولد ليه دي بعرفها أنا دي خليني انوم اسي عليك الله اختاني بالله
قام الخير من جنب امو وهو بنقنق و مر الزمن و هو زهجان و ما عارف يسوي شنو و مافي اي تواصل بينو و بين بنات خالتو بخيتة لانهن صعبات في الحاجات دي و ما جات مناسبة زاتو يقدر يطلب رقم البركة ولا كدا و بقى شغااال و في كل خطوة بقول دا عشان البركة و اولادنا رغم انو ما كان في امل امو توافق بس املو في ربنا كبير أنو يحقق حلمو دا و بقى بحلم باليوم البتلمي فيهو هو و البركة سوا
......
يا بت سهى تعالي هنا دا ياخ ساعديني في المطبخ مقهية لي اليوم كلووو في الموبايل
سهى: اي يا امي خلاص خلاص جيتك
ام سهى: حقو الزول بقلعة منك عشان تنتبهي لي قرايتك
جات سهى و بقت تساعد
امها قالت ليها انتي قطعي لي الخدار و اللحمة و انا بحش البصل
سهى: يا امي اللحمة لا ياخ أنا ما بقدر اقطعها
ام سهى: اجي مااالك ما بتقطعيها ما بتاكليها في بطنك دي
سهى: لالا يا امي لكن ريحتها بتمسك فيني
ام سهى: خلاص قطعي البصل أنا بقطعا
سهى: لالا يا امي ياخ اخير اللحمة كان كدا خلاص خلاص خليني بقطعها
بدو يجهزو في الاكل و بعد ما خلصو الباب دق مشت سهى سريع فتحت الباب لقت دي اختها الكبيرة البركة سلمت عليها
سهى: مالك اتاخرتي كدا
البركة: ياخ المواصلات والله كانت صعبة شديد كدي افتحي لي المروحة دي أنا عايزة اموت
جات البركة سلمت علي امها و قالت ليها امي عندي ليك مفااااجئة
الأم: شنو يا البركة كدي قولي لي سريع
البركة: ما هسي يا امي بحكي ليك علي رووواااقة بس افضي لي انتي
جهزو الغدا و ختتو البركة و جا ابوهم حاج ابراهيم و اخوهم ياسر و قعدو كلهم ياكلو و يتونسو مع بعض و اي زول يحكي يومو الحصل فيهو شنو و يدردشو بعد خلصو البركة قامت سوت الشاي و جابته ختتو كلهم قعدو يشربو قامت البركة شالت كبايتها و مشت غرفتها تتونس مع سهى اختها الصغيرة و يضحكو في مواقف و حاجات بحكوها بقو قاعدين كدا جا ياسر داخل عليهم
ياسر: اها احكو لي البضحك بقو يحكو ليهو كل واحدة تحكي بي جهة و هو يصنقع و يضحك و يقول ليهم بتجيبو الكلام دا من وين انتو قالو ليهو بحكو لينا ياخ دردش معاهم شوية و مشى غرفتو
سهى قالت للبركة: اللليلة مالك مبسووطة كدا شكلك مزاجك رايق
البركة: اصبري عندي موضوع بعد احكي لي امي بحكي ليك
سهى: شنو أنا متشوقة قوليهو
قعدت البركة تتبسم و تتضحك سهى قالت ليها مالك يابت دا شنو الموضوع الباسطك كدا دا
البركة: ياخ بوريك بعد شوية
امها جات قالت ليها : اها يا البركة احكي
عاينت البركة لي سهى قامت سهى ابتسمت و عايزة تتطلع قالت ليها لالا اقعدي ماتمشي بحكي ليكم الاتنين و بدت تحكي ليهم انو في واحد معاها في الشركة الشغالة فيها اسمو احمد فاتحها في موضوع زواج و ما زواج امها قالت ليها جد لينا جد لينا اها من وين الزول دا و اهلو وين بدت تحكي ليها التفاصيل سهى بقت تتبسم كانو جاين يعرسوها هي و فرحت لي اختها البركة شديد و قالت ليها خلاص البورة عايزة تفك ....
يتبع....
