جابت تلفونها من تلفون راجلها و اتصلت بيها و قالت ليها انتي يا شلابة يا خايبة يا عايبة دايرة شنو من راجل متزوج و عندو طفل من هناك ردت ليها واحدة قالت ليها نعم ؟ منو معاي
البركة: اسمعي يا عسل ابعدي من راجلي احسن ليك
من هناك قالت ليها انتي زوجت احمد ؟ هلا والله بي ضرتي
البركة: يابت ضرتك كيف يعني احسن ليك اتكلمي عديل معاي و إلا بكلم اهلك و اعمل ليك فضيحة احسن ليك
البت قعدت تضحك قالت ليها انتي مالك محموووقة كدا اصبري افهمي اول يا زولة أنا مرتو و نحنا عرسان جداد و كمان هو قال كلمك و وافقتي بس شكلو الموضوع مختلف بي هناك
البركة حست يدها ما شايلة التلفون و بقت تقول ليها انتي جادة في البتقولي فيهو دا
البت: اسفة لو جرحتك بس دا الحاصل و أنا والله ..... قفلت الخط
البركة انتظرت احمد لمن جا قالت ليهو انت متزوج يا عريس ؟ متيييين نحنا اتزوجنا عشان تمشي تعرس من وراي
أحمد: بكل دم بارد قال ليها من حقي ولا ما من حقي ؟ حرااام ولا حلال
البركة: دي طعنة في ضهري أنا لكن ماكلمتني و لا وريتني
أحمد: عايزاني استاذن منك ؟ لا يا شيخة
البركة بقت متنشنة و دمعتها في عينها و ما عااارفة تعمل شنو حست انو الحكاية الصابرة عليها بقت فووووق طاقتها و ما قادرة تواصل بس لكن سكتت بقت تقول في نفسها اصبري يا البركة يعني حيعمل شنو اكتر من العملو دا كلو اصبري و امسكي بيتك و بس ديك بي بيتها و انتي ما شايفاها افترضي انو في الشغل
سهي ضربت ليها و بتقت تبكي معاها و اهلها عرفو بس مافي حاجة يقدرو يعملوها لا هو عمل عيب ولا حرام و هي بس سكتت بترضي بالبجيبو ليها و جواها مكسسووورة و محطمة بس كلووو بهون عشان مهند ولدها عشان ما يتحرم من ابوه و عشان حاجات كتيرة بس يوم احمد ما جا بات معاها و هي مفترض يكون عليها اليوم دا طنشت و قالت يمكن جاب التالتة ما معروف بس اليوم التاني و التالت و الرابع وما جا قالت طيب اسال مادام اتاخر كدا مايكون حاصلة عليهو حاجة اتصلت عليه رد ليها بي كل برود هلا نعم
البركة: انت كويس
أحمد: والله الحمدلله انتو كيفكم ان شاء الله كويسين
طبعا دمعتها جرت حاارة في خدها و قفلت الخط في وشو معقول شديد و مالو ما جا علينا ؟ بسم الله قعدت بس في مصلايتها و تبكي و تبكي بعد شوية جاتها فكرة قالت النستخير في احمد دا ياخ لازم استخير فعلا استخااارت و قامت نامت و الصباح لما صحت لقت احمد قاعد في البيت و بلم في حاجات مشت عليهو فرحت قالت جا لمامشت عليهو لقتو بلم في حاجات
البركة: كيفك مالك ما بتسلم ق
أحمد: ايوة كيفكم شايفكم نايمين قلت ما ازعجكم
البركة: لالا مافي ازعاج مالك دا شنو
أحمد: والله يا البركة أنا جاني عقد عمل خارج السودان و أنا قبلتو و عملت اجراءاتي و خلاص بكرة بنسافر
البركة فرحت قالت ليهو: يا سلااام الف مبروك ماشاء الله يعني حنطلع برة السودان وين في السعودية ولا وين
أحمد: ايوة بس للاسف مابقدر اسوقكم معاي
البركة: لالا ما مشكلة بننتظرك بس انت انجز و بنحصلك بعد تظبط امورك و كدا
أحمد: لالا أنا حاسوق سعاد معاي
البركة: سعاد منو دي
أحمد: سعاد المرة التانية
البركة: ايوااا فهمت و جاتها عبرة خنقتها شديد و بقت تتمتم قالت ليهو طيب بتجو متين ؟
أحمد: إلا في الاجازات و كدا
عاينت ليهو قالت ليهو احمد طلقني ....
......
صحت البركة الصباح و لقت سهى قاعدة جنبها
سهى: اصحي اشربي الشاي
البركة: طيب دقائق امشي اتسوك و اجي
سهى: طيب تمام
مشت اتسوكت و صلت و غسلت لي ولدها وشو و جات قعدت تاكل في ولدها و سهى تعاين ليها ساااي البركة وشها مورم و عيونها ديل غاطسااات من البكا اللليل كلو سهى ختت كبايتها قالت ليها البركة انتي ما حكيتي لي الحصل شنو ليه احمد سببو عليك شنو مطلقك ولا عشان لقى الجديدة بقت ليهو حلوة أنا ما مصدقة في راجل بخلي ام ولدو عشان بت ماعندو منها حاجة
اتنهدت البركة و دموعها رقرقو تاني
طوالي سهى قالت ليها عااايني انتي لو بتتزعلي و بتبكي ما تحكي لي شي ما عايزة اعرف لكن لو عايزة تحكي ما عايزة اشوف دموعك ديل عليك الله وبعدين عايني لي وشك في المراية الزووول ياااا الله يتعرف عليك
البركة ابتسمت رغم القهر الجواها
امها جات داخلة عليهم وقعدت جنب البركة قالت ليها حسبي الله ونعم الوكيل يا بتي في راجل زي دا الله كريم علينا نحنا بس لكن ما قلتي لي الحصل مالو السجمان دا مطلقك ولا عشان عرس فيك و سكتنا ليهو عملك لعبة ابوك من قبيل بحاول يتصل بيهو تلفونو....
يتبع....
