منى قالت لي امها بي زعل اووووومي معقووول البركة الشينة دي تعرس مرتين وأنا ولا مرة
امها: هوووي مرتين شنو مرة واحدة و طلقوها زاتو
منى: لكن ولدك دا يا امي امسكيهو عليك ما يقوم يركب رأس و بعدين هي زاتها عزبة بقت ياخ يعني ماف زول بعرسها موش يا اومي
امها : الخير ما بكسر كلامي و ما برضى بي عدم عفوي والله ولدي وانا بعرفو كويس رضاي عندو اهم شي في الدنيا دي ....
طلع الخير من الصباح بدري يلبس في ملابسو و يصفر و يدندن براهو من الفرحة و طلع مبسوط اول حاجة عملها مشى سلم علي ابوهو و قعد جنبو و قال ليهو يا ابوي أنا عايز احكي ليك حاجة
الأب: احكي مالك يا ولد
الخير بي توتر و تردد: انت عارف يا ابوي أنا زمااان كنت عايز البركة بت خالتي بخيتة بس امي رفضت رفضا باتا قدر ما حاولت معاها ما قدرت اقنعها
الأب: طيب يا ولد ما كلمتني ليه جاي تكلمني بعد البت عرسوها و عندها ولد
الخير: والله يا ابوي أنا قلت اخد موافقة امي اول و هي بت اختها و اخد رضاها بعدين اجي افاتحك في الموضوع و امشي اتقدم بس امي ما وافقت
الأب: والله توافق بس انت اشر لي علي اي بت انت دايرها و امك يخليها توافق
الخير بي تردد: اي يا ابوي لكن اسي البركة طلقوها
الأب: دا كلام شنو يا جنى طلقوها بتدور بيها شنو يعني مطلقة و بي جناها
الخير: يا ابوي والله دايرها بي جناها ما قادر انساها و غيرها ما بعرس
الأب: لكن دي كيف انت شوف لك بت غيرها يعني ما عندها اخوات
الخير: اي عندها اخت لكن انا بأسرها هي بس
ابوهو عاين ليهو و سكت ساااي قال ليهو يعني مصر عليها
الخير: اي مصر و تاني كان ضيعتوها مني ما داير اعرس زاتو
الأب: علي كيفك انت البتعيش معاها ...
هنا اتبسط الخير للضرس الاخير و قال ليهو اي يا ابوي أنا عايزها هي بس امي ما موافقة ياخ عليك اسوي شنو
الأب: امك دي خلها علي أنا بقنعها ليك تب
طلع الخير و هو فرحاان بس لسة البركة في العدة ما انتهت منها ...
البركة صحت من الصباح بدري قالت لي امها يا امي أنا عايزة اشوف لي شغل و لا ارجع لي ناس الشركة زاتها يمكن اقدر يرجعوني
امها: اجي يا بتي و العدة ق
البركة: ااااا اي صاح نسيت خلاص بعد العدة ب طلع
امها: خلاص احسن حاجة ما في مشكلة و انتي زاتك الخلاك تخلي الشغل للراجل شنو اسي كان نفعك شغلك دا وينو اسي راجلك
البركة: الله كريم الحمدلله على ما اراد الله
بس بتكلمو كدا الباب دق جرت سهى لابسة و ماسكة تلفوها عايزة تطلع تمشي الجامعة العربية بس لقت الخير في وشها نططت عيونها
سهى: اهلا الخير كيفك ان شاء الله كويس اتفضل
الخير: تسلمي يا بت خالتي يزيد فضلك كيف انتو
سهى: كويسين الحمدلله و كوركت لي ياسر قالت ليهو تعال ود خالتك امال دا جا قام ياسر جا سريع سلم عليهو و فضلو في الصالون و جاب ليهو موية
ياسر: والله انت اكتر زول مواصلنا في الاهل ديل كلهم كتر خيرك والله
الخير: أنا بواصلكم لكن انتو ما بتواصلو الناس
ياسر: والله بنواصل بس الناس ما دايرانا
اتخلع الخير و قال ليهو دا كلام شنو
ياسر: جيتك كم مرة في البيت بس خالتي الظاهر صعبة شوية
الخير هنا قال احم احم اي والله شوية فعلا لكن ما بتابا زول
ياسر: و الله جيت سالت منك يوم قالت لي بتدور بيهو شنو الخير ولدي ما عندك معاهو شغلة
اتحرج الخير و بقى يبلع في ريقو قال ليهو والله امي بالغت معاك لكن بجيكم انا مافي مشاكل
ياسر: يا زول دي خالتي و في مقام امي ما زعلان منها انا لكن بس ...كنت ... ولا خلاص
الخير: والله قول يا ياسر في شنو احكي عليك الله
ياسر: لالا ماف شي
الخير ما حاول يضغط علي ياسر عشان ما يسمع كلام اكعب من الصالة ليهو عن امو و سكت خلاهو... جابو الشاي و جابو العصير و الخير يشيل و يتلفت و يدردش مع ولد خالتو و مرة يتكلموعن الكورة و مرة عن الشغل و ياسر شغال في شركة خاصة و مرتبو كويس بس خايف ناس الشركة يستغنو عنو لانو بدو يعملو تصفيات و المهم الخير بعد شوية قال ليهو البركة كيف أن شاء الله كويسة
ياسر: يا زول ما سمعت انو الزول دا فكاها و الله و سافر
الخير فرك يدو كدا قال ليهو ا نا جيت بس عشان الموضوع دا بالذات
ياسر اتخلع قال ليهو: م افهمت عليك بس عايز يتكلم كدا ابوهو جا داخل قال ليهو الخير كيفك يا ولدي ان شاء الله كويس و كيف اخوانك و امك
الخير: الحمدلله كويسين يا عمي قام الخير علي حيلو و قال أنا استاذن ياسر فهمو ما عايز يتكلم جنب الوالد قال ليهو خلاص انا اتقدم معاك مواعيدي زاتها جات مشو مع بعض قام ياسر سالو قال ليهو عايز تقول شنو عن البركة .....
يتبع....
