مقفول اخوه قال ما عارف سبب المشكلة و اخوه سافر حسبي الله كان علي الاقل يدينا سبب ياخ دا اكعب نوع
البركة : امي والله صراحة هو ما طلقني براهو أنا الطلبت الطلاق
امها اتخلعت و ختت يدها في خشمها : سجمي يابت ليه تخربي بيتك ما تقولي لي عشان المرأة الجديدة معقول عاد لكن بالغتي تخلي ليها الجمل بما حمل انتي عويرة والله يا البركة
سهى: ليه يا البركة طلبتي الطلاق والله الناس تلومك و يقولو انتي كعبة
امها : اخزي الشيطان يابتي و ارجعي لي راجلك عليك الله قبل ما زول يعرف
البركة قعدت تبكي بي صوت لمن بقت تشهق قالت ليهم حرااام ععليكم ماف زول بحس بي أنا ما كنت متزوجة عديل كدا انا كنت عايشة في جحيم مايعلم بيهو إلا الله أنا لي قريب شهرين ماف زول جاني و احمد ما جا البيت خالص بس قاعدة منتظرة و بصرف من القروش الفي الدولاب و كان محرم علي زول يجيني ولا يمشي مني ولا امشي لي زول حتي صحباتي وقفت التواصل معاهم أنا كنت براي بس زول حاسي مافي و في الاخر فى النهاية جا قال لي مسافر برة السودان أنا زي الهبلة فرحت و اتبسط و قربت استف عفشي قال لي ما بسوقك انتي بسوق الجديدة و ما بجي ا لا في الاجازات يعني انا ما عايزك بالواااضح كدا و لمن قلت ليهو طلقني نظام زعلانة و كدا و قلت حيقول لي دا كلام شنو و استهدي بالله وويسوقني معاهم قال لي طالق أنا زاتي اتصدمت في حتتي انتو فاركريني اسي أنا مبسوطة ولا مرتاحة أنا مقهووووورة بقت تدق في صدرها و هي بتتشهق و ما قادرة تاخد نفسها من البكا
سهى و امها بقو يبكو معاها قالو ليها يعني مااا صدق انو اتخلص منك معقولة وولدو يا البركة قال شنو ما حيصرف عليهو
البركة: يابت يصرف عليهو شنو كانو ما ولدو مشى خلانا و عمل فيها زعلان و انا صراحة اتذليت قلت عشان ولدي ما مشكلة جريت وراهو قلت ليهو أنا اسفة دي كانت لحظة زعل و مسكت الشنطة الكان شايلها و قعدت فيها و قلت ليهو ما بتمرق مننا زعلان نحنا بننتظرك ماف مشكلة قال لي قومي علي حيلك البيناتنا انتهي و الاتكسر ما بتصلح و الله انا ندمانة علي الكلمة دي رغم الحياة معاهو ما حياة زاتو بس اكون في ضلو
سهى بكت شديد و قالت ليها يا زولة ربنا اراد يا البركة
بقت البركة قاعدة الاكل دا ما بتدخلو في خشمها و الدنيا دي مسخانة عليها و بقت الليل كلو تعاين لي ولدها و تبكي و تقول أنا خشمي دا اعمل ليهو شنو طوالي قلت طلقني ياخ اقسم بالله أنا عويرة شديد و غبية اسي ولدي اهلي بقدرو يعلموه ولا يقدرو على اكلنا و شرابنا بعد المعفن الاسمو احمد دا طلعني من الشغل بدون اي سبب قطع عيشي فكرت مسافة و قالت الله كريم و غلبها النوم لانو تعبت و جسمها تعب من الزعل ....
الخير جا راجع من الشغل تعبان لقى امو و منى اختو يتونسن و يضحكن قالت ليها طلقها قالو عشان لقى الجديدة اسمح منها و زولة ارقي منهم بي كتير يا زولة ديك مزززة اساليني أنا قالت ليها ها خليها سمحاتها اسي البركة دي في زول بعرس واحدة سموها البركة دا اسم شنو دا قالو اختارو ليها ابوها يا بت مني قعدت تضحك قالت ليها فعلا يا امي اسم ما عصري خااالص و عامل زى أسماء الحبوبات
جا الخير في اللحظة ديك داخل قال ليهم أنا شايفو اجمل اسم خلقو ربنا و مميز و ما كتير
الأم: هوووي يا ولد انقرع امش شوف شغلتك دا كلام نسوان
عاين لي منى قلتي لي البركة طلقوها دا احلى طلاق سمعت بيهو و يا امي أنا بعرسها
الأم: هوووي يا ولد اسمع هنا دا والله تفكر فيها كمان بعد بقت عزبة و بي ولدها أنا ما عافية ليك دنيا ولا اخرة
الخير: يا امي انتي وقت كانت فتاة ابيتيها ليه
الأم: يا ولد انت بتقل ادبك علي الحالة بقول انت اكتر ولد فيك الخير في اولادي كلهم و اسمك شبهك بس شكلك عايز يطلقها تعصاني
الخير: يا امي أنا عشان فيني الخير زي ما بتقولي دي بت خالتي و لحمي و دمي و في محنة لازم اقيف معاها في محنتها دي و يمكن دا كلووو الحصل ليها الانتو شمتانين فيهو دا خير بالنسبة لي و ليها و ما معروف
الأم: هوووي يا الخير أنا قلت ليك غضبي بلحقك في الدنيا دي قبل الأخرة احسن ليك قلت ليك ختينا بخيتة و بناتها و فكر في اي بت تانية
مشى الخير يتبسم براهو و كان قلبو دا مسوووط من جوووة و قال المرة دي ما بفوتها من يدي مهما حصل و اتذكر امو ما بتعفي ليهو قالت بقى متضااايق من النقطة دي شديد و حاسي بيها عقبة و بقي يفكر امي دي مشكلتها شنو بالذااات مع خالتي بخيتة رغم انو خالاتي التانيات ما عندها معاهم مشاكل بس انا عايز تفسير و بقي متضايق بس فرحان بي البركة الادتو امل و اصلا ما فكر في ولدها لانو الحب الجواه اكتر من انو يفكر هل هي بنت او مراة أو ولدت قبل كدا و لا لأ و بي جناها أو من غير ....
يتبع....
