.البركة عايزة تتكلم بس ياسر قاطعها و قال ليها ما تتكلمي اسي و لا تنظري للخير بي منظور احمد و ما تردي اسي ردي لي بعدين و مشى خلاها .... البركة بقت تفكر بي جدية في الموضوع بس استخارت و سكتت عن الموضوع و ما جابت سيرتو تاني خالص ....عدى كم شهر و هي منهمكة في شغلها و جا تخريج سهى و كانت مبسوطة شديد و عزمو الناس للتخريج و جو ناس خالتها امال ام الخير و منى بتها و الخير كمان جا و كانو مبسوطين يا اللمة و الخير بس مركز مع البركة كانت لابسة ليها عباية عادية ....بعد وزعو الحلاوة و كدا مشى الخير للبركة وقال ليها ألف مبروك لي اختك ....الله يبارك فيك تسلم. و دنقرت راسها حست بالخجل ...والخير لسة مقهى فيها قال ليها اها ما عايزة تغيري رايك ....ابتسمت و قالت ليهو راي في شنو بالضبط .... قال ليها فيني ....قالت ليهو انت ما عندي راي فيك انت ما فيك كلام ....هي زاااتها ما عارفة نفسها قالت الكلام دا كيف ....قال ليها بي ضحكة كدا يااا زولة ؟ ...ضحكت و سكتت ....طيب ممكن رقم تلفونك ؟ .....قالت ليهو شيلو من ياسر اذا اداك ليهو خلاص ادا مااداك ليهو استعوض الله ....الخير ماااات بالضحك قال ليها لالا انا عايزو منك انتي لانو بفرق ....بفرق في شنو ..... لما تديني ليهو انتي بفهم براها ....طيب وين تلفونك ....اداها تلفونو عملت جرس في تلفونها و رجعتو ليهو ....حاسة البركة بي احاسيس ملخبطة و خايفة منها شديد خايفة تتخزل و راسها بودي و يجيب فكر يقول ليها الرجال كلهم واااحد و خونة و مجرمين و فكر يقول ليها لالا مستحيل الخير دا زول محترم ما شفت منو شي ما حلو ....جات امال من هناك قالت للخير دا شنو يا ولد الموقفك بي جاي شنو ....جيت ابارك يا امي ... خلاص باركت ارح رجعنا البيت خلاص طيب و ودع البركة و مشى ....اول ما وصلو البيت كانو تعبانين من الضيافة و غيرو وصلت البركةص و غيرت ملابسها كانت نعسااانة جاتها رسالة في تلفونها. ....( وصلتي حبيبتي ؟ ) .... قلبها قال شششح ....كتبت ليهو متييين هو ؟؟ استهدي بالله ماتقول لي الكلمة دي .... رد ليها بي سرعة حمدلله على السلامة حبيبتي ؟ و بعدين حبيبتي دي من زمان قبل ما تتزوجي انتي حبيبتي و روحي و كل حياتي و لما اتزوجتي حسيت حياتي انتهت و خلاص فقدت الامل اني اعيش بس الحمدلله ربنا رجعك لي و حياتي معاك ....البركة غلبها كلو كلو و بقت مايلة للخير وفي نفس الوقت خايفة ....اتواصلو الخير و البركة بعد فترة البركة قالت للخير انا موافقة اتزوجك بس ولدي ؟ قال ليها ولدك دا في عيوني الاتنين ان شاء الله ....اتبسطت جدا ...و مشى الخير لابوهو و قال ليهو انا خلاص قررت اني اتزوج البركة و هي موافقة و اخوها كلمتو و موافق باقي نمشي بس نتقدم قال ليهو خير نمشي ليهم المغرب رايك شنو ....خلاص تمام يا ابوي ....لكن ماتجيب سيرة لي امك فاهم ؟ لكن يا ابوي كيف .... يا ولد اسمع كلامي دا انا عندي فكرة في راسي و امك مابتوافق الا بالطريقة دي نختها أأمام الامر الواقع الخير خايف انو امو تعمل مشكلة وفي نفس الوقت خايف البركة تضيع منو زي المرة الفاتت فعلا المغرب الخير و ابوهو مشو بيت ناس البركة و قابلو اخوها ياسر و ابوها ابراهيم و طرحو ليهم الفكرة و ياسر سكت ابوهو عاين ليهو قال لي ابوهو الخير دا ما بنلقي زيو للبركة قام ابراهيم على اساس كلام ياسر بعرفو قال ليهم نسال البت و امها ....مشى سال امها بخيتة و قالت يتبااارك أن شاء الله الخير ولد اختي امال ما في زيو ادب و اخلاق و مننا و فينا و يا ابراهيم بتك موافقة ما عندها مانع كلمتني ....قال ليها على خيرة الله طيب تمام ربنا يتمم على خير ....مشي بشرهم و قال ليهم خلاص ابشرو البت و امها موافقين و نحنا اهل مافي كلام .....ابو الخير طوالي قال ليهم مدام كدا نعمل العرس بداية الشهر الجاي علينا دا ....الخير كان مخلوع بس ما قال حاجة ...ابراهيم قال ليهم خلاص ما في مانع مادام موافقين ماف مشكلة في المواعيد و ربنا يتمم على خير ان شاء الله. ..... الخير كان قلبو يرقص اليرم داك ما مصدق نفسو بس جواهو خوووف من امو .....و البركةص برضو كانت مبسوطة بس جواها خوف برضو من الجاي و على مهند ولدها و موقعو حيكون كيف مع الخير و افكار كثيرة بس كانت مطمئنة جواها شديد ....ابو الخير قال ليهو جهز شيلتك و حاجاتك كووولها و بعدها تجيبي نكلم امك قال ليهو لكن يا ابوي والله امي دي انا خايفها تعمل مشكلة ....امك دي خليها علي انا دا قلت رليك كمان عايزة تتحكم في الولد خليها تتحكم في بتها انت ما ليك دعوة بس اعمل البقولو ليك ....الخير اسبوع و جهز الحاجات و جابهم البيت و ابوهو دخل لي امو كلمها انو عرس الخير بعد تلاتة اسابيع و من البركة بت ابراهيم ....كيف يا حاج دا كلام شنو و كمان البركة متزوجة ووالدة ما بدورها ولدي شباب و ما اتزوج قبل كدا ...
يتبع....
