LEGENDARY DEVILS BOOK 1: THE ACCIDENTAL HERO

CHAPTER TWO

Nanigas si Kaye ng pumitik ang mahiwagang lalaki. Sa isang pitik, lumutang ang butcher! Doon nawala ang kalasingan nito at napasigaw. Nagpapapalag-palag sa ere. Pero hindi rin iyon nagtagal dahil muling pumitik ang mahiwagang lalaki. Napanganga si Kaye ng biglang magdikit ang labi ng butcher at parang damit na tinahi!

"Give me your soul. It's dark. I want it," malamig ulit na saad ng mahiwagang lalaki at muling pumitik.

Impit na napatili ang butcher at nagkikisay-kisay ito sa ere. Nangilabot si Kaye ng biglang tumirik ang mga mata ng lalaki. Ilang segundo ang lumipas, mayroong itim na usok ang lumabas sa ilong at tainga nito habang nakatirik ang mga mata. Lahat ng usok ay nagpunta sa mahiwagang lalaki. Ngumanga ito at doon pumasok ang mga usok hanggang sa tuluyan naubos.

Matapos iyon at unti-unting natuyo ang butcher hanggang sa naging abo! Gulantang na napatitig si Kaye sa mahiwagang lalaki. Napaigtad siya ng pumitik ito at sa isang iglap, paraang mayroong kamay ang humila sa kanyang katawan para tumayo.

"S-Sino ka?" kinakabahang anas ni Kaye. Pambira. Papaano siya kakalma? Nakita niya ang lahat! Kung ibang tao lang ang nakakita noon, siguradong nahimatay na sa takot!

"You called me. Thanks for the meal. Now, it's your turn. You should die for disturbing me," malamig na saad nito saka nakakalokong ngumisi.

Napasinghap si Kaye. Isusunod siya nito! Hindi iyon puwede! Mukhang balak ding kuhanin ang kaluluwa niya! Tinawag niya ito para matulungan siya, hindi ang gawing meryenda! Pinaghandaan ni Kaye iyon kaya gagawin niya ang lahat para huwag mapahamak. Mabilis niyang pinagana ang isip. Inalala niya ang mga ritwal na kailangang gawin para sundin siya ng demon.

Dinaluhong niya ang isang maliit na mangkok sa gilid na naglalaman ng asin at isinaboy iyon sa mahiwagang lalaki. Napanganga si Kaye ng biglang umusok ito at napasigaw ito sa sakit. Gayunman, bago siya maunahan nito ay mabilis niyang pinagana ang isip.

"S-Signa eius magicis vires," kinabahang agad na dasal ni Kaye ng makitang pipitik na ang lalaki. Latin na encantation iyon na ang ibig sabihin ay 'seal his magical power'. Alam niyang sugal ang kanyang ginagawa pero wala siyang ibang choice. Iyon lang ang puwede niyang gawin sa ganoon pagkakataon: ang pagkatiwalaan ang mga nakuha sa internet na dasal.

Napaigtad si Kaye ng pumitik ang lalaki at mariing naipikit ang mga mata. Hinintay niya ang katapusan. Kinakabahan siya. Halos hindi na humihinga. Halos matawag na niya ang lahat ng santo dahil sa napipintong katapusan ng buhay.

"Fuck! What's happening?" takang tanong ng lalaki ng paulit-ulit itong pumikit. Nang walang mangyari, nagsalubong ang kilay nito at umakmang lapitan siya.

At natigilan ito pagdating sa dulo ng bilog. Nagtiim ang bagang nito at napayuko. Tumalon ang puso niya ng muli itong napatingin sa kanya at namula ang mukha sa sobrang galit!

At doon napagtanto ni Kaye na hindi magandang ginagalit ang ganitong klase ng nilalang. Tingin pa lang, gusto na siyang patayin! Ang sama-sama ng tingin nito sa kanya. Mabuti na lang talaga, mukhang nai-seal niya ang kapangyarihan nito. Siguradong hindi lang siya magiging abo kung nagkataon!

"You wicked bitch," naba-badtrip na anas nito. Nagpalakad-lakad ito sa loob ng bilog saka napasigaw sa sobrang asar ng wala itong makitang opening para makadaan! "Let me go!"

Napaigtad siya sa lakas ng boses nito. He was indeed demon. Walang galang. Ramdam niya ang itim ng budhi nito. Kita niya sa mga mata nito na hindi siya sasantuhin. Oras na mahawakan siya, siguradong mata lang niya ang walang latay.