ملاك تحت قناع الشيطان

5) الطبيب

داني للطبيب .. البرد و الشتا لقينا السبيطار عامر شي دري صغير عضو عقرب الموهيم بابا تدخل سبقوني أنا اللولة .. واحد الفرملية جات بقات كاتسولني أسئلة فشي شكل واش كاتجيك الضوخة واش كاترضي واش كايضرك راسك وقالت لبابا بلي خاصو يديني لشي طبيب يديرلي ليكوغرافي حيت هوما ماعندهمش (راكم عارفين طبيب المخزن ) الموهيم أنا دخلات فيا الشك بهضرتها حيت كانت دازت 10 يام على باش نعست معا علاء .. عطاوني نضرب واحد الشوكة جا واحد الفرملي بوغوص شفت فيه سهيت و نسيت لوجع قال لي هبطي السروال جاتني الضحكة ههههههه اللي فيا ما هناني.. الموهيم ضرب لي الشوكة فترمتي قاصحة ضراتني بزاف ولكن مابغيتش نبين قدامو .. خرجنا من السبيطار مشينا للطبيب اللول قالك ماكاينش مشا يتغدا الثاني نفس البلان التالت تاهو و الوجع غادي و كايتزاد و اللون توجهي تبدل صافي كانقول هادي هي اللخرة ليا شفت الموت .. وأخيرا لقينا واحد الطبيب دخلت دارلي ليكوغرافي قال لبابا عندها الgرن مقيوس ولا ماعرت شنو مهم بقا كايخربق على بابا قال ليه دير شي تحاليل وجيبهم لي نهار التنين .. وداك النهار يالاه الجمعة الله ياربي غانبقا نتوجع حتال التنين .. عطاني شي دوا و شواكي قال لبابا فوقما يجهاد عليها لوجع تضرب وحدة .. مشيت ضربت وحدة حسيت بالموت داك لوجع زاد جهاد ديك الشوكة جمداتني حسيت بالضو نازل لي معا رجلي عمرني فحياتي حسيت بداك الألم اللي تألمت داك النهار .. شرالي بابا الدوا ومشينا للدار و لوجع زاد جهاد و دارنا زادو تخلعو خصوصا مرا مرا كانفقد الوعي بكترت الألم صافي كانموت بابا وماما عرفو ببي لا ماداروش شي حاجة نقدر نمشي فيها قررو يديوني لواحد لكلينيك معا حنا داخلين الطبيب خارج غادي يركب فطونوبيلتو حيت ماساكنش فالسطات ساكن ف كازا .. معا دخلنا هضر بابا معا هاديك البنت الي فالإستقبال قالت ليه لقيتي الطبيب يالاه خرج تقدر تلحقو نتا وزهرك .. بابا مشا تبعو و هضر معاه تصاب كايعرفو ما قدرش يرضها ليه فوجهو قال ليه بنتي كاتموت شوف لي مالها.. دخل دار لي ليكوغرافي تنا لي رجلي وانا نغوت على حر جهدي خرج كايجري قال ليهم la pindicite وجدو قاعة العمليات بالزربة وبقا كايشرح لبابا و ماما وأنا مافاهما والو باش أنا مريضة وعلاش غاندير هاد العملية بكترت الصدمة والخلعة مابقيت كانحس لا بوجع لا والو قلت ليهم را وليت لاباس يالاه نمشيو بحالنا ههههههههه قلت ليهم والله لا درت هاد العملية شنو غايطرا غاع لا مادرتهاش غانموت ؟ خليوني نموت .. ماتقبلتش فكرة العملية كيفاش أنا غي فالصباح كنت فالليسي كانضحك و نقز ودابا غانعس فالطبيب؟ مايمكنش غايشرgو لي كرشي .. ماما بقات كاطلب فيا وكاتبكي وكاتحلف لي بلي ما غانحس بوالو وكلشي غايدوز مزيان بقات فيا ماما وانا ندخل هبطوني فلاسانسور دخلت لقاعة العمليات داكشي كانشوفو غي فالأفلام كلشي بيض و داك الماطيريال داكشي كايخلع .. نعست فديك الناموسية جا البناج لصق لي الصيروم ضرب لي الشوكة تالبنج بدا كايدي معايا ويجيب فالهضرة شنو سميتك فاش كاتقراي شنو باغة تولي فاش تكبري وكدا واحد اللحظة حسيت بالكحبة و الدوخة ماعقلت على والو حتا فقت لقيت الناس ضايرين بيا العائلة و صحاب بابا .. أول كلمة قلتها هيا فين بابا .. سبحان الله واخا داكشي كامل هوا أول واحد تفكرتو حيت كانبغيه بزاف واخا كانحقد عليه بعد المرات لقيتو عند راسي وشد لي يدي وباسها .. عقلا على هاد اللحظة مزيان واخا كنت مبنجة حيت أي تصرف زوين دارو معايا بابا كانعقل عليه مزيان .. بابا عمرو باسني حتال داك النهار كان أول مرة غانحس بالحنان ديالو مابغيتوش يطلق لي من يدي بقا شاد فيا .
الموهيم بديت كانهترف بسباب مفعول البنج درت الشوهة مرا كانقول ليهم بغيت نمشي لبحر وديك الساع الشتا خيط من السما حيت داك لعام ما سافرتش و مامشيتش ليه بقا بالي معاه مرا كانقول ليهم بغيت نمشي لمروكو مول مرا كاندوي بلغة مامفهوماش ماكاينا تا جملة مفيدة ماكايعرفوني علاياش كانهضر ههههههه و كاندوز ليهم من موضوع لموضوع و البيت عااااامر .. مرة كانقول ليهم بغيت موطور و بابا شاد لي فيدي قال لي غي تولي لاباس نشريلك موطور و اللي بغيتي .. شرالي لقلاوي نعاماس هههههههع .
بقيت كانهضر كانهضر ماسكتش وهوما كايخراو بالضحك واحد اللحظة قلت ليهم فين إيمان علاش ما جاتش تشوفني ؟ عرفاتني مريضة و ماجاتش عندي؟ ديك الساع الي فالبيت كاملين بداو كايبكيو فكرتهم فإيمان اللي ماتت و عرفوني باقا متعلقة بيها .. داك النهار داكشي اللي فقلبي كامل قلتو .. و قلت ليهم واحد واحد آش كايسوا عندي .. نتي كانبغيك.. نتا ماكانحملكش .. نتا عزيز عليا.. نتا كاتعصبني .